1 KORINTUS 3
3
Pelayan-pelayan Allah
1Saudaro-saudaro, sebeneane uku coa dapet miling ngen udi awei ngen tun de temuan Roh Allah. Uku cuma dapet miling ngen udi awi ngen tun de masiak idup temurut kelok duniawi; ewai ngen tun de masiak cupik lem kepercayoanne ngen Kristus. 2#Ibr. 5:12-13 Bel'o uku cuma dapet melei ngen udi kembuk cupik, iso kembuk tun lai; sebab udi ati cukup kuet utuk o. Tapi uyo kulo udi masiak ati kuet utuk o, 3kerno udi masiak manusio duniawi. Sebab amen udi masiak iri atei, selisiak do ngen de luyen, do'o kemten bahwo udi masiak idup temurut manusio duniawi, awei tun-tun de coa kemnal Allah. 4#1Kor. 1:12 Amen ade de madeak, “keme motoa Paulus,” ngen de luyen madeak, “Uku motoa Apolos,” do'o kemten bahwo perbuatan udi awei tun-tun dunio.
5Sebeneane api Apolos o? Ngen Api Paulus o? Keme cuma pelayan-pelayan Allah, de sudo melei nasihat ngen udi utuk pecayo ngen Kristus. Keme cuma maneu kerjo de Tuhan nelei ngen keme masing-masing. 6#Kis. 18:4-11, 24-28 Uku temanem, Apolos semiram, tapi Allah suangba de menea tanem o idup. 7Jijai de penting adeba Allah, sebab Siba de midupne. De temanem ngen de semiram coa penting. 8Baik de temanem atau de semiram adeba serai. Memasing bakea temimo upeakne sesuoi ngen usahone suang. 9Keme adeba samo-samo kerjo utuk Allah; ngen udi adeba awei kebun Allah.
Saudaro-saudaro adeba awei gedung Allah. 10Sesuoi ngen anugerah Allah, uku sebagai ahli bangunan bi mpek pondasi utuk gedung o, tun luyen temgok gedung neak das pondasi o. Tiep tun harus kemliak bebaik awei ipesi mbangun neak das pondasi o. 11Sebab Allah suang bi mpek Yesus Kristus sebagai dodone pondasi utuk gedung o; coa ade pondasi de luyen. 12Ade de temgok gedung o neak das pondasi kunei mas, ade de makei pirok, ade de makei butau permata, ade kulo de makei kieu, dukut ke'ing atau jerami. 13Kerjo tiep tun bakea keten be pado waktau Kristus teko igai. Sebab pado bilai o opoi bakea menea kerjo tiep-tiep tun bakea keten. Opoi bakea melei bukti baik coane kerjo o. 14Amen gedung de temgok tun neak das pondasi o taen opoi, tun o bakea temimo upeakne. 15Tapi amen asea kerjo tun o tunun, si bakea rugai; si suang bakea selamat, tapi awei tun de selamat kunei opoi.
16 #
1Kor. 6:19; 2Kor. 6:16 Jano udi namen bahwo udi adeba Bait Allah? Ngen bahwo Roh Allah tinggea neak lem udi? 17Amen ade tun musak Bait Allah, Allah kulo bakea musak tun o. Sebab Bait Allah adeba khusus utuk Allah bae, ngen udi adeba Bait Allah o.
18Jibeakba suang tun kulo mike diraine suang. Amen ade tun neak antaro udi asai diraine bijaksana temurut ukuran dunio yo, tun o harus jijai bodong, supayo si jijai benea-benea bijaksana. 19#Ayb. 5:13 Sebab de nanggap bijaksana ngen dunio adeba bodong bagiak Allah. Lem Kiteb Sucai tetulis, “Allah temakep tun-tun bijaksana lem kecerdikan tobo'o suang.” 20#Mzm. 94:11 Ade kulo tetulis awei yo, “Tuhan namen bahwo pekeran tun-tun bijaksana adeba pekeran de coa beguno.” 21Kerno o, jibeakba suang tun kulo mujai manusio, sebab kutene o bi jijai ko de temuan: 22Paulus, Apolos, Petrus, dunio yo, idup ngen matei, zaman yo jano zaman de bakea teko, kutene o adeba ko de temuan. 23Ngen udi adeba de Kristus temuan, ngen Kristus adeba de Allah temuan.
Currently Selected:
1 KORINTUS 3: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
