VARUMI 4

1Kunangwa kulavoola ki ku Aburahamu, guuga wiitu? Yanyoora ki ku lugano lwu muviri? 2Aburahamu naava niyakolwa kuva mululungi kigira uvugulu vwi miyinzi jije, aveeye ni kindu chu kwiyizominya ku. Navuzwa sianyala kwiyizominya imbiri wa Nyasaye mba! 3Mang'oda Matakatifu gavoora ki? “Aburahamu yasuuvira Nyasaye, kandi kigira lisuuvira lilie, Nyasaye yamuvugilira kuva mulungi.”

4Muyinziri atungwa mitungu; mitungu jije jiveeye kihanwa, navuzwa jiveeye amadanyi gologeli lwilwe. 5Mundu utakola miyinzi, navuzwa usuviraa Nyasaye okolaa vachamu kuva valungi, Lisuuvira lilie livalizwa kuva lirungi. 6Yaga nigo aga Daudi yavoola lwa yamoloma kigira uvuyanzi vwu mundu wa Nyasaye avugiliraa kuva mulungi, natavalizi agandi goosi gumundu uyu akolaa:

7“Vaveeye nu vugasu avamahiolo gaavo gasamiihiywi,

kandi avuvwoni vwavo vukunikiywi!

8Aveeye nu vugasu mundu uyu wu Mwami avulaa kuvaliza vwoni vwivwe!”

9Kunangwa uvuyanzi vwa Daudi avoora yivu vukaveeye ku yavo Avakevwa venyine naho? Awa! Voveeye kandi ku yavo avatakevwa. Mang'oda Matakatifu gavoora, “Aburahamu yasuuvira Nyasaye, na kigira lisuuvira lilie, Nyasaye yamuvugilira kuli mulungi.” 10Yaga gekoleka ing'inga ki? Geekoleka nakikiri mugasa, anoho namali kokevwa? Geekoleka lwa yaali na akikiri kokevwa. Sigali lwa yaali niyamala kokevwa mba. 11Aburahamu yakevwa inyima, na likevwa yilio liali kelolero chamanyia ndi Nyasaye yamuvugilira kuva mulungi kigira lisuuvira lilie lia yaali nalio nakikiri kokevwa. Kulwayago, Aburahamu yaduuka kuva baba wa vosi avasuuviraa Nyasaye, kandi avavugilirwa naye kuva valungi, kali niiva sivakevwa mba. 12Aveeye baba kandi wa yavo avakevwa, agaveeye kovora, wa yavo, komeeda ku likevwa, vamenyi liiva lielisuuvira lia baba wiitu Aburahamu yamenya nakikiri kokevwa.

Lisuuvirizwa lia Nyasaye kuvitira mu Lisuuvira

13Nyasaye yasuuviriza Aburahamu harara ni visukululwi vivie ndi, lirova lilava liavo. Lisuuvirizwa yilio siliahaanwa kigira Aburahamu yatia Lilaga mba, navuzwa kuvitira mu vulungi vwi lisuuvira lilie yili iliavugilirwa na Nyasaye kuva uvulungi. 14Niiva icha Nyasaye asuuvirizaa kilahevwe yavo avatizaa Lilaga vuzwa, kunangwa lisuuvira liu mundu si liveeye kindu mba. Lisuuviriza lia Nyasaye liveeye liavuzwa. 15Lilaga lileetanga vutima vwa Nyasaye, navuzwa Lilaga nilitaveeye ho, ilivula kutia, Lilaga siliveeye ho mba.

16Kigira yaga, lisuuvirizwa liatura ku lisuuvira; kunangwa lisuuviriza liduuki kuvikwa ku muhuri ni kihanwa cha Nyasaye yahaana vuzwa ku visukululwi vosi va Aburahamu. Sigaveeye vuzwa ku yavo vatizaa Lilaga venyine, navuzwa ku yavo kandi avasuuviraa kuli Aburahamu yakola. Aburahamu aveeye baba wiitu kunyi vosi mu Roho. 17Kuli Mang'oda Matakatifu gavoora, “Mali kokora ivi baba wi zihiiri zinyingi.” Lisuuvirizwa yili liveeye lilahi imbiri wa Nyasaye, wa Aburahamu yasuuvira muye, Nyasaye uhaanaa livamwoyo ku vakuzu, kandi ku malago geege aleetaa vitaveeye ho, kuva ho. 18Aburahamu yasuuvira no kohenzerera, kali vugira kivuni kilahi cho kohenzerera, na ndio, yaduuka kuva, “Baba wi zihiiri zinyingi.” Kuli Mang'oda Matakatifu gavoora, “Visukululwi vivio vilava vinyingi kuli ndi!” 19Yaali wi mihiga ahimbi imia ndala; navuzwa lisuuvira lilie si liadedekera lwayaganagana ku muviri gwigwe ugwali gwu vusakulu mba, anoho kigira mukeere weve Sara waali utanyala konyoora avana mba. 20Aburahamu si yahayahayiza lilagana lia Nyasaye kuvitira mu livula kusuuvira mba, navuzwa lisuuvira lilie liazizagilira kuva ni zinguru nu kukuminya Nyasaye. 21Yaali nagiligali ndi Nyasaye anyala kokora cha amali kulaga. 22Kigira lisuuvira lilie, Nyasaye yaavugilira Aburahamu kuva mulungi. 23Navuzwa amakuva, “Yaavugilirwa kuva mulungi” si gang'odwa kigira oyo yenyine mba. 24Navuzwa likuva yili liveeye ku kunyi, avakusuuviraa ku Nyasaye wasimugukiza Yeso, Mwami wiitu kutura mu vakuzu. 25Yahaanwa yiitwi kigira vwoni vwitu, kandi yasimugukizwa kunangwa kunyi kuduuki kokolwa avalungi imbiri wa Nyasaye.

Kokolwa mulungi imbiri wa Nyasaye

Currently Selected:

VARUMI 4: LOGOOLI

Highlight

Copy