LIKUNULA 15

1Ndaalora kandi kelolekizu kindi mwigulu ekenene chukuhuga kandi chokogenyia. Ziali ho ni zingelosi saba avaari nuvulwaye saba vudamanu vwu kumaliriza. Kuvitira muvwo vutima vwa Nyasaye vumali kohera.

2Ndaalora kandi kindu chaali kuli inyanza yi gilasi enengeru, izuganyiwi mu muliru. Ndaalora kandi avandu yavo avaguuta king'ang'a yicho ni kifananyi chacho, kandi oyo wi lieta lilie ni livaliza lisingira mu vogono vwalio ninamba. Avandu yavo vaali nivasingiyi kundulu kwinyanza yi gilasi enengeru yeyo nivaveeye nu vukana vwa Nyasaye yavaha. 3Vaali nivimba ulwimbu lwa Musa umutumwa wa Nyasaye, kandi ulwimbu lwu Mwana wi Ligondi, ni vavoola:

“Mwami Nyasaye Wuvunyali,

miyinzi jijo jiveeye minene kandi jokogenyia!

Ivi Mwami wizihiiri ziosi,

zinzira zizio ziveeye ziu uvulungi ni zieligali!

4Nivwaha unyala kusuura kulandiza ovonene vuvwo?

Ivi weng'ine oveeye umutakatifu.

Izihiiri ziosi zilaza kandi zilasigamira Ivi,

vikolwa vivio via giligali vilolangwa na vandu vosi.”

5Inyima wi vindu yivi, ndaalora Litembeli liu mwigulu ni liguliywi, Lihema litakatifu liali mu. 6Zingelosi saba yavo avaari ni vagingi vulwaye saba vaatura mu Litembeli, niviviiki zinguvu zindavu ni zing'ereng'ana, kandi nivevohi zingova zie zahabu mu viritu viavo. 7Kilala ku vilombe iviveeye mwoyo vinene, chaahaana zibakuli saba ku zingelosi yavo zie izahabu ni vizuyi uvutima vwa Nyasaye oveeye mwoyo mihiga ni mihiga. 8Litembeli liizula umwoki kutura ku uvukumi nu ku zinguru zia Nyasaye, kandi sihaali ho nu mundu uwaali yakanyala kwingira mu Litembeli yilio kuduuka ko keheri chu vulwaye saba vwi zingelosi saba valeta mba.

Zibakuli ziu uvutima vwa Nyasaye

Currently Selected:

LIKUNULA 15: LOGOOLI

Highlight

Copy

Compare