LIKUNULA 14

1Ndahenza, nindora Mwana wi Ligondi nasingiyi ku Kiguru cha Ziyoni kandi avandu 144,000 vaali harara naye, avaari ni lieta lilie kandi ku uvweni vwavo vaali nivang'odeywi ku lieta lia Baba weve. 2Ndaahulira kandi mwoyo nigutura mwigulu kuli mwoyo gwi kihilira cha amazi manene kandi kuli gwi lihirigana lie inguba enene. Mwoyo gwa ndaahulira gwaali kuli mwoyo gwa avimbi vakuba uvukana vwavo. 3Vimba ulwimbu luhia imbiri wendeve yu uvwami, kandi imbiri wi vilombe viveeye mwoyo vine kandi imbiri wa vakulundu. Siyaali ho nu mundu uwaali anyala kwiga ulwimbu zana yilwo nivataveeye vuzwa avandu vaali 144,000 yavo avahonywa mu lirova na Nyasaye vave avandu veve.

4Yava nivo avasaza avilindaa na vavula kokora ovoheyi na vakali; aveene vayilinda kandi vaveeye avagima. Yava nivo avalondanga Mwana wi Ligondi hoosi na hoosi aha azizaa. Yava vahonywa kutura mu avandu vandi vaveeye va Nyasaye amakuyu gukutanga kuhaanwa ku Nyasaye kandi ku Mwana wi Ligondi. 5Sivanyooleka kuva avavehi mba, kigira sivaveeye nimbara anoho kindu kidamanu kuvo mba.

Zingelosi zivaga

6Ndaalora kandi engelosi yindi nibulukaa hagati hu uvwerefu, na yaali ni Ivangeri yi mihiga ni mihiga ya Nyasaye kwilwaazira vandu avamenyaa mu lirova ku vuli zihiiri, ni zinimi, kandi avandu va amagondo vosi. 7Yavoola kandi nu mwoyo umunene, “Muhe Nyasaye luyali kandi mumukuminyi, kigira ing'inga yi likalaga lilie imali kuduuka. Musigamiri uyu walomba ligulu, lirova, inyanza, ni ivisinukiru via amazi.”

8Engelosi wa kaviri yavoola, “Ligwiyi, ligwiyi, lidaala linene lia Babiloni lianwehiza zihiiri iwaini yalio, iwaini induru yi likayirwa lio ovoheyi.”

9Engelosi yindi ya kavaga yavalonda ziu kutanga ziviri navoora nu mwoyo munene, “Umundu woosi nasigamira king'ang'a yiki ni kifananyi chayo, nu kuvugilira ku viikwa chukumanyirwa ku, ku vweni vwivwe anoho mu mukono gwigwe, 10Ye umwene kandi alanwa iwaini yu vutima vwa Nyasaye imali kuzukwa mu kekombe vugira kuzuganywa nu uvutima vwa Nyasaye! Kandi alasalirizwa nu muliru gwi kibiriti imbiri wi zingelosi avatakatifu kandi imbiri wu Mwana wi Ligondi. 11Umwoki gwu muliru gwi kivi ni lisalira liavo gulavuuya mihiga ni mihiga. Sihaveeye ni lisosa mbasu nu vudiku ku yavo avasigamiraa king'ang'a ni kifananyi chavo mba; kandi mundu woosi uvugilira chukumanyirwa chi lieta liayo.” 12Yivu nivwo uvwikuziri vwa vandu va Nyasaye avagumira amalago geege ni lisuuvira lia Yeso, 13Maku ndaahulira mwoyo kutura mwigulu nigovoora, “Ng'oda yaga: Vaveeye nu vugasu avakuzu vakuziraa mu Mwami kutura kalunu.”

Yee, Roho avoora, “Vaduuki kosoosa kutura mu miyinzi jaavo. Kigira miyinzi jaavo jilondekanaa navo.”

Iligesa lie lirova

14Ndahenza kandi, nindora lilesi lilavu. Ku lilesi zana yilio mulala yikala ku yaloleka kuli mundu, aveeye ni taji yi izahabu ku mutwi gwigwe, na engonono inzugi ligali neveeye mu mukono gwigwe. 15Na engelosi yindi yatura mu Litembeli, nihanzuka nu mwoyo munene, nevolera uyu uwikala ku lilesi, “Leeta engonono yooyo ogese, kigira ing'inga yi ligesa imali kuduuka.” 16Uyu wikala ku lilesi yanuya engonono yeeye ku lirova ni lirova liageswa.

17Engelosi yindi yatura mu Litembeli liu mwigulu, nayo yaali nengonono inzugi.

18Kandi engelosi yindi, eveeye nu vunyali ku muliru, yatura mu vwali. Yalanga, engelosi yaali nengonono, inzugi, nu mwoyo munene nemuvolera, “Vugula engonono yooyo inzugi ukalage muzabibu gwi lirova; kigira amazabibu gagwo geengi ligali.” 19Engelosi zana yanuya engonono yeyo ku lirova, naahalula umuzabibu gwi lirova, navungiza amazabibu gagwo nu kugaviika mu kiminiru kenene chu uvutima vwa Nyasaye. 20Mizabibu jakamulirwa mu kiminiru keveeye ichova wi lidaala linene. Amasahi gasunduka kutura mu kiminiru kuli umugera gwizuuyi nigusurunguta kuduuka uvutambi zikilomita zimia zivaga, nuvutambi vwu kuzia musi vwali ahimbi zimita ziviri.

Amaduywa amanene ge keheri

Currently Selected:

LIKUNULA 14: LOGOOLI

Highlight

Copy

Compare