ZING'ANO 8
8
Lizominya lio vogeri
1Hulira! Vogeri vulangirizaa.
Limanyiriza ligiinga mwoyo.
2Vogeri vusingiraa ku zisonga zie vigulu himbi ninzira,
kandi ha vwavukaniru vwizinzira.
3Ha vwingiliru vwi lidaala linene,
vulangiliraa himbi ni virivwa;
4“Mugoonyaa mwinye mwosi;
nangiliraa vuli mundu oveeye mulirova.
5Mukikili nu lwana? Mwigi kuva vahindira.
Muveeye vasiru? Mwigi kuva ni limanya.
6Hulira makuva gange gaveeye malahi ligali;
goosi ga muvooleraa gaveeye malungi
7Gambolaa gaveeye geligali
vovehi voveeye vusigu ku inze.
8Chambolaa, choosi keveeye chiligali;
kivula ho keveeye chu vugadi anoho chokogotiza.
9Ku yavo avaveeye ne limanya lio mugati, galang'aminyiywi
ku uyu wamanya gekolekaa.
10Tovola miigizu gange muvogono vwi ifeza;
tovola limanya kuvita kotovola izahabu indahi.
11“Inzi mbeeye novogeri, mbeeye mulahi kuvita magina gu vuguli;
sihaveeyeho ni cha wenyaa kufananywa ninzi mba.
12Inzi mbeeye vogeri, kandi mbeeye ni limanya lio mugati;
mbeeye ni limanya kandi ni likalaga lia geligali.
13Kusuura vudamanu ni kuhaana ku Yahova luyali;
ndasuura kwelola nu kwigingira,
ni zinzira zindamanu na makuva go vovehi.
14Ndohizaa miyinzi no kugikola
mbeeye ni limanya, kandi nizinguru.
15Ngonyaa vami kwamiiha
kandi vamiihi kolomba malago malahi.
16Ngonyaa vuli mwamihi mu lirova kwamiiha;
vosi vanene harara ni vizinyumba ziu vwami.
17Nyanza yavo vanyanza;
uyu onyenyaa alanyoola.
18Mbeeye nu vutugi kandi luyali komeedeka kwi miandu nu kwinyaliza kuhaana.
19Cha onyoora kutura ku inze kiveeye kilahi
kuvita izahabu indahi ligali,
kandi kuvita ifeza inyuki ligali.
20Ng'endaa kunzira yu vulungi;
nondaa zinzira ziageligali.
21Mbana vutugi kuyavo vanyanzaa,
nzizuliza zinyumba ziavo na mavikiru.
22“Yahova yaatanga konomba imbiri wi vindu viosi,
jaali miyinzi jije ju kutanga kale ligali
23Ndaalombwa mulitanga,
lwu kutanga ligali kivala kikikiri kolombwa.
24Ndivulwa zinyanza zikikiri kuvaho,
kandi lwi visinukiru via mazi vikikiri kuvaho.
25Ndiivulwa vigulu vikikiri kuvaho,
kandi vikikiri kuvikwa mu vugono vwavio.
26Ndivulwa Nyasaye nakikiri kolomba kivala ni milimi,
kali nakikiri kolomba marova gukutanga makekeeke.
27Ndali ho lwa yalomba ligulu naalivika haliveeye,
lwa yavambalariza vwerefu kunyanza.
28Lwa yavika malesi mu vwerefu,
lwa yigula visinukiru vienyanza
29kandi nalaga mazi ginyanza
gavuli kuvita hayaali nalagizi.
Ndaali ho lwayavika musingi gwi kivala.
30Ndaali himbi kuli mwumbaki,
ndaali kitinya chu vuyanzi kuye vuli ing'inga
ndaali nu vuyanzi imbiri weve kazozo.
31Kuva nu vuyanzi ni kivala
kandi kuyaanzizwa na vandu.
32“Kalunu mwinye vana vange, mbulirizi,
mukore kuli mboraa na mulava nu vuyanzi.
33Muhuliri ga mwigizwa.
Muve ni limanya; mutagaleki mba.
34Yavo vambulirizaa valava nu vuyanzi.
Yavo vaalindilira ha muliango gwange vuli lidiku,
vaalindilira mu vwingiliru vwa hango hange;
35ku yavo avanyoora, vanyoola livamwoyo.
Kandi Yahova alavayaanza.
36Yavo vatanyoolaa visalilizaa vene,
ku woosi oveeye nu vusigu ninzi
yayanza likuza.”
©Bible Society of Kenya, 2019