ZING'ANO 7
7
1Mwana wange, wizulizi gambolaa na utivilira changuvooleraa mba. 2Okole cha mboraa, na ulahindira. Ulindi nokolonda miigizu gange kuli ulindaa endolero ye emoni yooyo. 3Uviiki amigizu gange zing'inga ziosi, ugaviiki mu mwoyo gugwo. 4Uvuguli ovogeri kuli mbozo wowo, na limanya liu musi live kuli mulina woovo wa himbi. 5Valakokola welehe ku vakali va vasaza vandi kandi, welehe ku vakali vaveeye na makuva go kogoonya.
Mukali muheyi
6Lidiku lilala ndahenza ichova kuvitira mu lidilisia lienyumba yange, 7ndaalora vayaayi vasoleri avakikiri kuva ni limanya, navuzwa muvo ndaalora mundu musiru ligali. 8Yaali nagenda ku inzira ahimbi hu mukali wundi yamenya. Yaali naavitira himbi ninyumba yeeye 9hamugorova lwi kisundi chaali ni chakaduuka. 10Maku mukali oyo yagana nu muyaayi oyo, mukali oyo yaali ni yiviiki zinguvu zizie kuli liraya na aveeye ne lilohiza lilie. 11Yaali nengolo kandi vugira zisoni, yaali niyamenya na agendaa mu zinzira 12anoho kusingila mukoona kulindilira, zing'inga zindi munzinzila na zing'inga zindi mu viitu. 13Yakumbelera muyaayi oyo, naamuvusa, namwumika vulungi muzimoni navoora, 14“Mali kuhaana kihanwa change kalunu kandi mbeeye ninyama kutura ku visiuviliru. 15Kunangwa nzizi kukwenya. Ndaakukwenya, na kalunu mali kokonyoola! 16Mali kwala kidali change ne zisuka ziuvulidadi zialombwa ni pamba kutura Egebeti. 17Mali kuvaka kidali change vifunya mwayu kuli manemane, kimuli nu mudalasini. 18Hamba kuyaanzane uvudiku vwosi! Kulava harara ni kugumilani. 19Musaza wange siaveeye hango mba; Yaziiyi mu logendo lutambi. 20Yavugula mabese manyingi ligali kandi si alilana vwangu mba kuduuka lwa masiza gaviri gaavita.” 21Kunangwa mukali oyo yamugeriza no vuyanzi vwivwe, na muyaayi oyo yavugilira limoloma lilie lihoma lio kogoonya 22Nonoho muyaayi uyu yalonda mukali oyo kuli igiriki izizaa mukisinziru kandi kuli kisusu kitumaa mumutego 23hu muvano gwuvuta gukitumita mumwoyo. Yaali kuli linyonyi lizizaa mu neti. Siyamanya ndi livamwoyo lilie liveeye muvuhimwa mba. 24Avana vange, kalunu mumbulirizi, muhulirizi gambolaa 25mutaleka mukali kuli uyu amulegelere muziganagani mba. Mutagendagenda kumwenya mba 26Yamala kudiviza vasaza vanyingi kandi yakola vandu vanyingi ligali kukuza, 27Niiva ulazia munyumba yeeye, umanye oveeye kunzira yukuzia mukivala chavakuzu. Yiyi eveeye inzira inyimbi yilikuza.
©Bible Society of Kenya, 2019