ZING'ANO 6
6
Lieganihiza ku Uvusiru
1Mwana wange, niiva wayihaana kuva kihambiliru ku mutende woovo, kandi niiva wahaana lilagana liilio kigira mugeni utamanyikani, 2maku umali kwevoha na makuva googo umwene, kandi umali kwivika mumutego kigira lilagana liilio. 3Maku mwana wange, kigira oveeye nuvunyari vwokohona: Uzie kuye, ma umugoonye akovoholore. 4Utazia kogona anoho mu kososa mba. 5Utuli mu mutego yigu kuli linyonyi anoho kisusu kehononokaa mu mutego gwu muhimi.
6Avandu vagata gavadukiraa vanyoore liega kuli amage gamenyaa. 7Sigaveeye nu mwimiliri, mwamihi anoho munene mba, 8navuzwa gavikaa viukulia viago mu ing'inga yu mbasu, magetegeka ku ing'inga yu vukindu. 9Mundu mugata alazizagilira kogona kuduuka ng'inga ki? Alavuuka ng'ingaki? 10Avoora, “Ndagona hakekeke vuzwa, kandi ndalinga makono gange nokososa vuzwa hakekeke.” 11Navuzwa lwava naveeye mu zindolo, uvudaka vulamwingilira kuli umwivi yevohi ni viungi viu vulwani.
12Avandu vachamu avatakonya kindu vagendagenda nokovoora uvugadi. 13Vasimiraa zimoni ziavo, virenge viavo kandi videte viavo nokovoora uvugadi. 14Valohiza uvudamanu mu mioyo jaavo, nukuzizagilira koleta ikivihiri havundu hoosi. 15Kigira yaga, kivi kiladuuka kuvo vugira kumanya, nonoho valadivizwa ligali.
16Yivi ni vindu sita anoho saba via Yahova adunyiraa:
17Lihenza lidamanu, kovora vugadi,
kwita vandu vataveeye nimbala,
18kuganagana kolohizi uvuchamu,
kunyagula kokora uvudamanu;
19Muloli uhambanaa mu livoora vugadi
kandi mundu utangiza makuva gu kuhangaliza kuvandi.
Lieganihiza Kokora Ovoheyi
20Mwana wange, ugumiri amalago ga baba woovo, kandi utaleka miigizu ga mama woovo mba. 21Uhuliri amakuva gaavo, kandi ugaviiki mu mwoyo gugwo. 22Amigizu gaavo galakwimilira lwa ogendaa, galakukinga mu vudiku, kandi galakuha zing'anagani mu ing'inga yu mbasu. 23Amalago gaavo gaveeye kuli ling'ereng'ana liu vulavu ku ivi, amigizu gaavo galakumanyia limenya. 24Galakokola welehe ku vakali vadamanu, kandi welehe ku makuva madamanu ga vakali vaheyi. 25Utakayirwa uvulahi vwavo mba, kandi utavugilira vakusimi ni zimoni ziavo mba. 26Musaza anyala kugura liraya ku mutungu gwe kedonye chu mugadi, navuzwa mukali muheyi alavugula uvutugi vwu musaza vwosi.
27Mundu anyala kuginga muliru ku kiritu chiche ma avuli kusamba zinguvu zizie? 28Anoho mundu anyala kogenda ku manda gu muliru ma avuli kuhia virenge vivie? 29Yaga gaveeye vuzwa madamanu kuli musaza okolaa ovoheyi nu mukali wu musaza wundi. Oyo okolaa yaga, alakahevwe mageri. 30Avandu sivadulaa mwivi ni yivi viukulia lwaveeye ninzara mba. 31Navuzwa niiva alagumirwa, gamuduukira atungi haali saba. Kuduuka ahaane vindu viaveeye navio viosi. 32Mundu okolaa ovoheyi siaveeye novogeri mba. Oyo okolaa yaga yidivizaa mwene. 33Musaza uyu alakuywa kandi sialava nu luyali mba, alava mu zisoni mihiga ni mihiga. 34Embodoka ekolaa musaza wu mukali okoli ovoheyi kuva nu vutima kandi sialava ni zimbavasi lwavanzaa kisaalia mba. 35Sialavugilira mitungu josi mba; anoho vihaanwa vinyingi sivilahomatiza uvutima vwivwe mba.
©Bible Society of Kenya, 2019