ZING'ANO 5
5
Lieganihiza kigira Voheyi
1Mwana wange, huliriza ovogeri vwange kandi gelimanya liange. 2Maku ulamanya kuli uva ni miima milahi, na makuva googo galamanyia ndi oveeye ni limanya. 3Munwa gwu mukali muheyi ginyala kuva milahi kuli vwuki kandi livuusa lilie lihomolokaa kuli maguta ga muzeituni, 4navuzwa yaga goosi nigakavita si alakolekela kindu, nitali vululu nu vuzunu. 5Alakuvugula kuduuka mu kivala cha vakuzu; inzira ya agendaa ku ni inzira yi likuza. 6Siagunzaa kunzira yi livamwoyo mba; navuzwa agendagendaa ichova, na siyizuliza chekoleka mba.
7Avana vange, kalunu mbulirizi, mutivilira gambolaa mba. 8Mwerehe ku mukali kuli uyu! Kali mutisuunda himbi ni kiliango chiche mba! 9Niiva ulakola ndio, vandu vandi valavugula luyali lwa mwalange nalwo kale, na mulakuza nimukikiri vana mu makono ga vandu vataveeye ne zimbavasi. 10Yee, avageni vatamanyikani valavugula vutugi vuvwo vwosi, na viawagamulira ku vilava viu wundi mundu. 11Ulagona mukidali chicho chi likuza nokenyaa muvuzunu na zinyama ziu muviri gugwo zilalivwa, 12na ulavoola, “Kigira ki niimbura kwiga? Kigira ki niimbura koleka mundu angelihizi? 13Sindenya kuhuliriza ga vigizi vange mba. Sindahulira ga wavoola mba. 14Nonoho ndanyooleka mu zisoni muzimoni zia vandu.”
15Ove musuuvirifu ku mukali woovo na uhaane vuyanzi vuvwo kuye yeng'ine. 16Vana va onyoora na vakali vandi si valakokolera kindu kilahi mba. 17Vana vovo vaduukana vaviluki vaduuki kokokonya, vatakonya vageni vatamanyikani. 18Kunangwa uyaanze mukali woovo kandi ove nu vusangali naye 19aveeye mulahi ligali kandi wu vuyanzi kuli kisusu. Leka vuyanzi vwivwe vukuyanzize, leka akukumbele nu vuyanzi vwivwe. 20Mwana wange kigira ki uhaane vuyanzi vuvwo ku mukali muheyi?
Kigira ki uyanzaa mukali wu musaza wundi? 21Yahova alolaa vindu viosi via okolaa. Hauzia hoosi, akohezaa. 22Uvwoni vwu mundu muchamu voveeye mutego. Agumililwa mu muluvu gwu vwoni vwivwe. 23Akuzaa kigira sianyala kwilinda mba. Vuyingu vonene vwivwe vulamuhila kuduuka mu kilindwa chiche.
©Bible Society of Kenya, 2019