ZING'ANO 31
31
Zing'ano ziu Mwami Lamueli
1Yaga namakuva gumwami Lamueli wa Maasa, aga mama weve yamwigiza.
2“Ivi oveeye mwana wange wandayanza ligali; oveeye mativuli gilisaala liange. Nyara kokovoolera ki? 3Utamalira zinguru zizio kuvakali mba, kandi utavaha mabese googo mba. Avakali yava vamali kudiviza vami avanyingi. 4Lamueli, hulira; sigaduukana vami vanwi iwaini anoho kwanira linwa mba. 5Lwavanwezaa iwaini vivilira malago kali valeka kuduukiza lienya liavandu. 6Amalwa gaveeye gavandu vakuza, ni iwaini eveeye ya vandu va veeye mu vudinyu ligali. 7Leka vanwi ma viviliri vudaka vwavo, kandi vovereri vwavo.
8“Molomera vandu vatanyala kwemolomera vene: ukingi lienya lia vandu vosi avatinyalizaa. 9Uvamolomere ma ove mukalagi wa giligali. Ukingi lienya lia vadaka harara na vatinyaliza.”
Mukali wi Miima Milahi
10Nivwaha unyala konyoora mukali mulahi? Aveeye mulahi ligali kuvita magina guvuguli.
11Musaza weve aviikaa lisuuvira lilie muye, kandi sialava mudaka mba.
12Lwaveeye mwoyo amukoleraa malahi, kandi sianyala kumukolera sianyala kumusaliriza mba.
13Mukali uyu atovoraa vwoya vwa magondi ni zimbusi ziokolomba zinguvu na makono geege gu vugulu.
14Aveeye kuli zimeri ziavakiranyi ziletaa viukulia kutura ihale.
15Avukaa nivutaacha nokolombera avinyumba yeeye chukulia kandi kovoolera vayinziri veve vikikali chokokola.
16Ahenzaa mulimi kandi agugula, kandi atagaa mizabibu na mabese ga anyooye.
17Aveeye muyinziri mugulu okolaa makono geege gaava nizinguru.
18Amanyaa vukala vwa vuli kindu chalombaa, kandi ayinzilaa kuduuka vudiku.
19Alombaa zimbusi zizie kandi anavaa zinguvu zizie mwene.
20Aveeye muhaani ku vadaka kandi ku avaveeye ni lienya.
21Siahendaa mwoyo ing'inga yu vukindu mba, kigira amanyi ndi vinyumba yeeye vaveeye ni zinguvu ziuluya.
22Alombaa zisuka zievidali nokwiviika zinguvu zindahi zie mizambarao.
23Musaza weve yamanyikana ligali, aveeye mulala ku vimiliri vi lidaala.
24Alombaa zinguvu kandi misibi, ma aziguliza ku vakiranyi.
25Aveeye nizinguru kandi wokohevwa luyali, siaveeye nuvuti kugazaa imbiri mba.
26Amolomaa novogeri vwagalaha kandi aveeye wi liegiza lisuuvirifu.
27Vuli ing'inga akolaa miyinzi jukulinda vinyumba yeeye nukuhaana via venya.
28Avana veve vamusandizaa kandi musaza weve amwizominyaa.
29Avoora; “Vakali vanyingi vaveeye avalahi, navuzwa ive oveeye mulahi kuvavita vosi.”
30Vulahi voveeye vwu vugadi, ni ligondo liveeye vuzwa, navuzwa mukali uhaana luyali ku Yahova adukanaa yizominywi.
31Adukanaa asandizwi ku viosi viakolaa kandi vandu vosi vaduukana vahane luyali kuye.
©Bible Society of Kenya, 2019