ZING'ANO 27
27
Utigingira mba
1Utiyizominya kigira mugamba mba. Siumanyi kinyala kwekoleka kalunu na mugamba mba.
2Oleke vandu vandi vakwizominye kali avageni, navuzwa utiyizominya ivi mwene mba.
3Magina nu muyeke viveeye vilitu, navuzwa vulitu vwu musiru aletaa, voveeye vuliduhu ligali kuvita viombi.
4Uvutima voveeye vululu kandi lidiviza, navuzwa si kiveeye kindu ni voleng'anywa nembodoka mba.
5Ni vulahi kugaya mundu havulavu kuvita koleka aganagane ndi siumuhendera mba.
6Unyala kusuuvira mulina uhaanaa mageri ku ivi kukwigiza navuzwa livuusa liu musigu liveeye vugadi vuzwa.
7Numali kwiguta ulasuula kulia vwuki, navuzwa noveeye ninzara kali chukulia kilulu keveeye kenoru.
8Mundu oveeye ihale kutura hango, aveeye kuli linyonyi liveeye ihale kutura kunyumba yalio.
9Maguta gu mwayu ni kimuli vikoleteraa uvuyanzi mumwoyo, navuzwa uvudinyu vwononyaa elielemeliza lie zing'anagani.
10Utivilira valina vovo anoho valina vababa woovo mba. Niiva oveeye nu vudinyu utateeva vokonyi kutura ku amwavo woovo mba; mutende wa himbi anyala kokokonya kuvita amwavo woovo oveeye ihale.
11Mwana wange, ove mugeri na inzi ndava nu vuyanzi; ndava ni litivuli ku mundu woosi ondeva makuva gataveeye ni kivuni. 12Mundu mugeri alolaa vudinyu nivuza ma yeleha kuvwo, navuzwa mundu utaganagana alingira muvwo ma yidula lwinyima. 13Mundu oveeye musiru ligali kulaga kusingilira kutunga ligovi liu mugeni, genyekaa vutugi vwivwe vuvugulwi kuduuka lwatunga ligovi yili. 14Uyu uchelizaa mutende weve nu mwoyo munene, na avukaa mu mavwevwe, alavalizwa kuli mulaami. 15Mukali mulembani aveeye kuli amazi gatonyatonya do-do-do mu ing'inga yi imbura! 16Unyala kumukiring'anyia ndi? Wageriza ku kusingiliza vukindu anaho wageriza ku kugumira maguta mumukono gugwo? 17Avandu viga kutura kuvandi; kuli kivia kihiagalaa kivia kindi. 18Osembelere mukuyu na ulanyora makuyu gu kulia.
Oyo ulindaa vanene veve alahevwa luyali ligali. 19Mumoni mumwo nimwo mwololaa nimulolekelaa mu mazi, kandi niive mwene umanyi agaveeye mu mwoyo gugwo. 20Liegomba liu mundu liveeye kuli kivala cha vakuzu; liegomba si liheraa mba. 21Muliru gogerizaa izahabu ni ifeza; liiva liu mundu linyala kandi kogerizwa.
22Kali niiva ulakuba mundu musiru kuduuka ave masamba makuzu, si ulatuliza uvusiru muye mba. 23Ulindi magondi googo ni zing'ombe zizio vulahi ligali kuli unyala, 24kigira vutugi si vuhindira mihiga ni mihiga mba; kali ndio zihiiri sizihindiraa mihiga ni mihiga mba.
25Utimuli vunyasi vwumu kandi utimuli vunyasi vuvisi kundulu kwi vigulu lwu vulimu vundi vwu kwuminya vukiviluka.
26Unyala kulomba zinguvu kutura ku vwoya vwa magondi googo, kandi unyala kugura mulimi na mabese gonyooye ni wakaguliza zindala ku zimburi zizio.
27Zimburi zitigaye zilakuha maveere harara na vinyumba yooyo kandi ku vatumikiri vovo vi kikali.
©Bible Society of Kenya, 2019