ZING'ANO 28
28
Malago ga Nyasaye gaveeye gi kivuni
1Avandu vachamu virukaa lwu mundu atavakunga, navuzwa vandu valungi vaveeye valuviliri kuli isimba.
2Lwi ihiiri ekolaa vwoni, yamifwaa na vami vanyingi, navuzwa ihiiri eveeye na vimiliri vi limanyiriza kandi limanya ilazizagilira kuva ni zinguru.
3Umwamihi udambiza vadaka aveeye kuli imbura idiviza vitagwa.
4Yavo avasuuraa malago vizominyaa vandu vachamu, navuzwa yavo avalindaa malago sivaveeye harara navagasulaa mba.
5Avandu vadamanu si vamanyi uvulungi mba, navuzwa yavo avasigamiraa Yahova vamanyiriza uvulungi vulahi.
6Mudaka oveeye musuuvirifu numulahi kuvita mutugi utaveeye musuuvirifu.
7Mwana utizaa malago aveeye mugeri, navuzwa oyo uhambanaa na valina venya lilia linyingi, aveeye zisoni ku baba weve.
8Mundu onyoora vutugi vwivwe mulimeeda vukala, avungizilaa oyo oveeye ni zimbavasi ku vadaka.
9Niiva siulatia malago ga Nyasaye, sialavugilira lisaala liilio mba.
10Niiva ulimilira mundu mulungi kokora vudamanu, ulagwa mu mutego gugwo, navuzwa avandu vataveeye nimbala valanyora miandu milahi.
11Mundu mutugi aganagana ndi aveeye mugeri kazozo, navuzwa mundu oveeye mudaka nilimanya liu mugati amanyi ligali.
12Lwu mundu mulungi anyoora vwami vandu vosi vavezaa nuvusangali, navuzwa lwa vandu vachamu vamiiha, avandu vivisaa.
13Mundu uvisaa vwoni vwivwe si alagasizwa mba, navuzwa oyo wiyama no koleka vwoni alanyoola zimbavasi kutura ku Nyasaye.
14Aveeye nuvugasu mundu utizaa Yahova kazozo, navuzwa oyo oveeye ni kirage aladivizwa.
15Mundu muchamu wamihaa avadaka aveeye kuli isimba ihuuma anaho iduba esetaa.
16Mwamihi utaveeye ni limanyiriza, aveeye mudambizi mululu, navuzwa oyo usulaa vuchamu alamedwa madiku gelimenya lilie.
17Mundu onyooleka na mahiolo gukwita wundi alima kilindwa chichie vwangu ligali kuli anyala, utageriza kumugaya mba.
18Mundu oveeye mulungi alahonywa kutura muvudinyu, navuzwa oyo utaveeye musuuvirifu alagwa mu liliina.
19Mulimi uyinziraa ni zigulu alanyoola viukulia vinyingi, navuzwa mundu ogotiza vuzwa vwiyangu zing'inga ziosi, alava nuvudaka zing'inga ziosi.
20Mundu musuuvirifu alanyoola vugasu, navuzwa oyo udidikanaa konyoora vutugi alahevwa mageri.
21Kuva ni liyaanzilira sivoveeye vulahi mba, navuzwa konyoora viambeti vikekeke mundu akolaa vudamanu.
22Mundu mwimani adidikanaa kunyoola uvutugi, navuzwa siamanyi ndi vudaka vulamunyoola mba.
23Wigizi mundu na lwinyima alayaanzilira miigizu googo.
24Mundu wivilaa baba weve anaho mama weve kandi na vola yivwo sivoveeye vwoni mba, ahambana numundu udiviza.
25Mundu wenya lilia linyingi aletaa vudinyu, navuzwa oyo usuviraa mu Yahova alanyoola vutugi.
26Mundu wisuuvirizaa aveeye musiru, navuzwa oyo ogendaa muvogeri alahona.
27Mundu uhaanira ku vadaka, sialadaka mba, navuzwa oyo wivisaa kutura ku vadaka vandu vanyingi valamulaama.
28Lwa vandu vachamu vanyoola uvwami avandu vivisa, navuzwa lwa vachamu vadivaa, vandu avalungi vamiiha kandi.
©Bible Society of Kenya, 2019