ZING'ANO 26
26
Utava musiru mba
1Lizominya mundu musiru liveeye lia vuzwa, liveeye kuli ibarafu mu ing'inga yu mbasu anoho imbura inyingi mu ing'inga yi ligesa. 2Vilaamo sivinyala kukusaliriza niiva siuduukiraa ulaamwe mba, gaveeye kuli manyonyi gilitonderizi ni iminyi gaaburukaa kandi sigagwizaa mba.
3Gakuduukiraa ukuyi ibarasi, uviiki lijamu ku Ibunda kandi ukuyi mundu musiru.
4Niiva uhaana litivuli ku liteeva liu vusiru, ulava musiru kuli mundu uliteevi.
5Uhaane litivuli lisiru ku liteeva lio vusiru kandi uyu uliteevi alamanyiriza ndi siaveeye mugeri kuli aganaganyia mba.
6Niiva ulatuma mundu musiru ahili makuva, gakuduukiraa kali ukalage vilenge vivio; ovezaa nuweyenyeraa vudinyu.
7Mundu musiru anyala kutumikira zing'ano kuli mundu wafogoya anyala kutumikira vilenge vivie.
8Kwizominya mundu musiru gaveeye kuli kovoha ligina ku mugoye gwo lokova.
9Livoora liu lugano lwa vandu avasiru, liveeye kuli liifwa litozaa mu mukono gwu mundu muhambiki; 10mundu mwene miyinzi, uvugura mundu musiru anoho muhambiki kumuyinzilira, asaliriza vandu vandi avayaanzaa miyinzi yijo.
11Mundu musiru okolaa kindu chu vusiru lwa kaviri, aveeye kuli imbwa yirana kulia maluki gayo.
12Mundu musiru ligali aveeye mulahi kuvita mundu uganagana aveeye mugeri lwa ataveeye ndio mba.
13Mundu mugata avoora ndi isimba eveeye munzira, isimba eveeye ku mbalabala.
14Mundu mugata agirung'aniraa mu vogono kuli muliango govodong'aniraa ku zimbada ziagwo.
15Avandu valala vaveeye avagata ligali. Si vanyara kali kuviika chukulia muminwa jaavo mba.
16Mundu mugata agangana ndi aveeye mugeri kuvita vandu saba avanyala kuhaana mativuli gaavo vulungi.
17Mundu wingira mu lihing'ana litaveeye lilie, aveeye kuli mundu uzizaa kunzira ma agimira matuu gi imbwa.
18Mundu mulalu ulasa zisese ziu muliru kandi mivano juvuta jilikuza, aveeye kuli 19mundu ugadizaa mutende weve navoora ndi, akubaa vuzwa zimbaka.
20Zingu nizitaveeyeho, muliru gumanyaa gusima; vugira limonya, lirembana liheraa.
21Amaka galombaa zisese kwaka, zingu zilomba muliru kuzizagilira kwaduka, kandi vandu valeta vudinyu, valomba lihing'ana kuzizagilira.
22Makuva gumundu mumoonyi gaveeye kuli chukulia kenoru, kandi gingilaa musi mumwoyo gwumundu ligali.
23Limoloma litaveeye liagiligali livisaa chuganaganaa, liveeye kuli ifeza ikikiri kusihilwa iviikiywi kunyingu yo vodohi.
24Mundu mwigadi avisaa vusigu vwivwe mu makuva geege guvugadi.
25Makuva gege gahulirika vulahi, navuzwa utamusuuvila mba, kigira mwoyo gwigwe gwayizura uvusigu.
26Anyala kwigadiza mu vusigu vwivwe, navuzwa vuli mundu alalola vindu vidamanu viakola.
27Avandu vategera vandi mitego vagimilwa ni mitego jaavo.
Mundu utangiza kogomogominya ligina, limwilaniraa ma limusionolanyia.
28Gakuduukiraa udunyiri mundu ukusaliriza no vovehi. Limoloma litaveeye lie giligali liletaa lidiva.
©Bible Society of Kenya, 2019