ZING'ANO 25
25
Zing'ano zindi zinyingi zia Solomoni
1Yizi ni zing'ano zindi zinyingi zia Solomoni zia vamiihi vamenya munyumba yu vwami vang'oda ing'inga yu mwami Hezekia yaali naveeye mwamihi wikivala chi Ivuyuda.
2Kwizominya Nyasaye kuvindu via viswa, kwizominya vami ku vindu viavivaalaa.
3Siunyala kumanya zing'anagani ziumwami mba; zing'anagani zizie ziavita zigangani zietu. Zing'anagani zizie ziveeye kuli muvwelofu vwumwigulu, anaho mululiva lwinyanza.
4Nutuliza mandu ku ifeza ma uhaane kumutuli, muturi uyu alalomba kindu keveeye kilahi ligali kutura ku mandu yaga.
5Suunda ihale avigizi vadamanu, ihale kutura kumwami na vwamihi vwivwe vulamanyikana kigira vulungi. 6Lwa usingira imbiri wu mwami, utageriza kumuyanziza kandi kwigadiza kuva mundu wi kivuni mba. 7Voveeye vulahi koteevwa wikale kondeve yuvukumi kuvita kuteevwa uhaane vwiyangu vuvwo ku mundu wundi wikivuni.
8Utava vwangu kuzia mumayaalo kigira kindu chumali kolola mba. Niiva muloli wundi alavuula uvudamanu vuvwo ulakola kindiki?
9Niiva mulembanaa nu mutende woovo, mulohizi makuva ginyu, mutaleka vandu vamanye makuva ginyu gu muvwivisu mba.
10Nigaveeye ndio, vuli mundu alamanya ndi ivi sioveeye mundu unyala kuviika makuva gu muvwivisu mba, na siulatula mu zisoni mba. 11Amakuva gavakovoolera vulahi gaveeye kuli izahabu yalombwa vulahi, ma niviikwa mu ifeza. 12Mundu mugeri niyiganihiza mundu oveeye ni lienya kuhulira aveeye vulahi kuvita ebede yizahabu anoho magina guvuguli galombeywi kutura kuzahabu indahi ligali. 13Umutumwa oveeye musuuvirifu aveeye kuli amazi maziliru mung'inga yumbasu yiligesa. Aveeye wu kuyaanziza kumunene weve. 14Avandu valaga kuhaana vindu ma vavura kuduukiza lilagana liavo, vaveeye kuli malesi kandi vukindu vutaletaa imbura. 15Limoloma lia galaha lilegelelaa vuhingili vonene kali linyala kwizamiliza vamiihi. 16Utalia vwuki vunyingi kuvita kegero mba, kigira vwuki vunyingi ligali vulakokola uluki. 17Utahongelera kuzia wu mutende woovo mba, ulamuluhiza naye alakuduunyila. 18Liyaala lio vovehi lita kuli kivavi, kigulume, anoho muvano mwugi gwu vuta. 19Kusuuvira mundu utaveeye musuuvirifu mu ing'inga yu vudinyu, gaveeye kuli kogeriza kulia noveeye ni linu liadengeya, anoho kogenda ne kelenge chafogoya.
20Kwimbira mundu oveeye no vovereri gaveeye kuli kumutuliza zinguvu mu lidiku liu vukindu anoho kuli kuvaka ijumbi mungwagu.
21Niiva vasigu vovo vaveeye ninzara, uvahe chukulia; nivaveeye nuvuluhu, uvahe chavanwa 22ulavakola vaduuki mu zisoni, na Yahova alakuha madanyi. 23Makuva gavuzwa galetaa vutima kuli vukindu vuturaa Ivaale voletaa imbura. 24Ni vulahi komenya igulu kunyumba kuvita komenya munyumba harara nu mukali mulembani. 25Lwu kumaliriza, kuhuliraa makuva malahi kutura mukivala chihale gaveeye kuli kunwa mazi maziliru lwoveeye nuvuluhu. 26Mundu mulungi uvugilira makuva gu mundu muchamu, gaveeye kuli kisinukiru chaduvuka kandi kidaho chuvusungu. 27Uvwuki vunyingi voveeye vudamanu ku ive, kandi ni ndio gaveeye konyoora lizominywa linyingi. 28Mundu utanyala kugumira vutima vwivwe, aveeye vuzwa kuli lidaala litaveeye na madigi, linyala kwingilirwa ing'inga yoosi.
©Bible Society of Kenya, 2019