ZING'ANO 24
24
Lugano lwa 19
1Utakayirwa vandu vadamanu mba, kandi utageriza kuhambana navo mba. 2Kutangiza vudinyu nigo gavaganaganaa vuzwa ing'inga yoosi lwavamoloma kuduuka lwa vasaliriza mundu.
Lugano lwa -20-
3Inyumba yumbakwa novogeri, kandi ihindiraa mu lihulirizana. 4Havundu hi limanya liveeye ving'oze viayizula vutugi vunyingi kandi vindu viu vuguli vudinyu.
Lugano lwa -21-
5Kuva no vogeri nu vulaha kuvita kuva nizinguru, yee limanya liveeye ni kivuni kuvita zinguru. 6Kali ndio gakuduukiraa welohizi vulahi nukikiri kuzia mu vulwani, kandi amigizu amanyingi galakuha liguuta.
Lugano lwa -22-
7Zing'ano zio vogeri ziveeye zindinyu ligali ku mundu musiru kuzimanya sivaveeye ni kindu cho kovora lwa makuva gi kivuni gamolomekaa ha vandu vaganira mba.
Lugano lwa -23-
8Oyo olohizaa uvudamanu ing'inga yoosi, alalaangwa mundu oletaa uvudinyu. 9Lilohiza liosi liu musiru aganagana liveeye vwoni. Avandu vasuura mundu utaveeye ni kindu chokovoora, navuzwa kuchaya vuzwa avandi.
Lugano lwa -24-
10Niiva oveeye mudedekere mu ing'inga yu vudinyu, zinguru zizio zilageha ligali
Lugano lwa -25-
11Okonye avandu vaveeye ahimbi kwitwa, kandi wilanyie yavo avazizaa kwitwa. 12Unyala kovora yaga ngamanyi mba, navuzwa Nyasaye yamanya, kandi akalagira lienya liilio. Akohenzerizaa kandi yamanya. Alakuha amadanyi kolondekana ni miyinzi jijo.
Lugano lwa -26-
13Mwana wange, ulie uvwuki kigira voveeye vulahi. Uvwuki vwidolokaa kutura ku kisaganyi, voveeye vonolu ku lulimi lulwo. 14Umanye kandi, ovogeri voveeye vulahi ku ivi. Niiva ulavonyoola, ulava ni lisuuvirizwa ku madiku gaaza; na lisuuvirizwa yili si lilahelizwa mba.
Lugano lwa -27-
15Utava kuli avandu avachamu valohiza kunuura vandu valungi mba, anaho kwingira mu zinyumba ziavo mba. 16Vandu valungi vagwiza haali saba kandi vavuuka, navuzwa kivi kiladiviza vandu vuvuchamu.
Lugano lwa -28-
17Utayaanzilira lwu musigu woovo anyoora kivi mba kandi utasangala lwa yikigatiraa mba. 18Yahova alamanya niiva ulayaanzilira, na sialayaanza mba, kandi sialahaana mageri kuye mba.
Lugano lwa -29-
19Utahenda mwoyo kigira vandu vadamanu mba, kandi utakayirwa vandu vachamu mba. 20Mundu mudamanu siaveeye novomenyo mba, Itaya yu mundu muchamu ilasima.
Lugano lwa -30-
21Mwana wange utie Yahova kandi uhaane luyali ku mwami. Utahambana na vandu vibaara kuvo mba. 22Vandu kuli yava valadivizwa vwangu. Unyala kumanya kivi cha Nyasaye anoho chu mwami aletaa?
Zing'ano zindi zinyingi zio vogeri
23Avageri vavoola vindu yivi kandi; sivoveeye vulahi avakalagi kuva ni liyaanzilira avadamanu mba. 24Niiva alavoora mundu muchamu aveeye vugira imbara, avandu valamulaama kandi zihiiri zilamusuula. 25Navuzwa yavo avagondokelaa vandu vachamu, valava nuvusangali kandi valagasizwa.
26Litivuli liuvusuuvilifu ni kimanyiru chuvulina vwa giligali.
27Wetegekizi miyinzi jijo, wetegekizi vindu viosi mu mulimi ni wakamala kwetegeka wumbake inyumba yooyo.
28Utava muloli kumutende woovo vugira kivuni kandi utava mugadi mba. 29Utavoola ndi ndamukolera kuli yangolera mba. Ndamutungiza kisaalia kugayangolera!
30Ndagenda mumilimi ni vizabibu viosi viu mundu mugata kandi musiru, 31viali ni viayumba kandi vizura vuzwa mulitu gwa mafwa. Lidiji lia magina lia gukumberizaa liali ni liagwa. 32Ndahenza kuyaga, ninganagana ku go kandi ninziga kutura kugwo. 33Osose kandi ogone hakekeke niiva venya uvulingi makono googo ma osose hakekeke, 34navuzwa lwuva nogonaa, vudaka vulakwingilira kuli munuri wiyavaye viugi.
©Bible Society of Kenya, 2019