ZING'ANO 23
23
Lugano lwa -6-
1Lwa wikala kulia nu mwamihi, weteve muziganagani ni vwaha oveeye imbiri woovo. 2Niiva oveeye nuvuha vunyingi vwi chukulia wigaye. 3Utava ni likayirwa ni chukulia kilahi chakoheye mba, anyala kuva nakogerizaa.
Lugano lwa -7-
4Utakola miyinzi minyingi konyoora vutugi mba; ove nu vogeri vunyingi vwokoleka yaga. 5Vutugi vuvwo vunyala kogota kutura ku ivi vwangu, kuli vomeli zimbaha nukuburuka kuli indizu.
Lugano lwa -8-
6Utalia komesa yu mundu mwimani anoho utakayirwa chukulia kilahi chakoheye mba. 7Avoora, “Hamba uvuguli chukulia kindi,” navuzwa siavolaa geligali mba. Siaganagana nindio aveeye. 8Ulaluka chukulia choosi cha umali kulia kandi vovehi vuvwo vulava vwavuzwa.
Lugano lwa -9-
9Utageriza komoloma makuva govogeri ku mundu musiru mba, kigira si alagavugilira mba.
Lugano lwa -10-
10Utasunda kigingi kikulu chu lwako uvuguli mulimi gwa vavisandu mba. 11Yahova aveeye mukingi wavo wizingulu kandi alavoora makuva gaavo mu kiyaalo kigira ivi.
Lugano lwa -11-
12Uhulirizi mwigizi woovo kandi wigi amanyingi kuli unyala.
Lugano lwa -12-
13Utalindagilira kuhaana mageri kumwana mba. Lihaana mageri lilahi kumwana silinyala kumwita mba. 14Niiva ulamukuya nulusala, ulahonyia livamwoyo lilie kutura mulikuza.
Lugano lwa -13-
15Mwana wange, nuva mugeri ndava nuvuyanzi. 16Ndava niliegingira lwambulira nomoloma makuva govogeri.
Lugano lwa -14-
17Utava ni likayirwa ku vandu avoni mba, navuzwa uzizagiliri kutia Yahova madiku goosi. 18Gaveeye agiligali ndi Lisuuvirizwa liveeye ho kuivi, kandi lienya liilio sililatulizwaho mba.
Lugano lwa -15-
19Mwana wange uhulirizi ove mugeri kandi uganagane ligali kuli omenyi. 20Utahambana navandu vanwezaa iwaini inyingi mba, anoho avalizaa chukulia kinyingi mba. 21Avahambiki na vahuvali valagwa vadaka. Niiva chokolaa vuzwa nukulia nokogona, nonoho ulatanga kwivika madari.
Lugano lwa -16-
22Huliriza baba woovo; alavula kuva oyo siwaali omenye mba. Lwa mama woovo ahindiraa umanyie vuyanzi vuvwo kuye.
23Agiligali, vogeri kwiga kandi lihulira lilahi yivi viveeye mutungu mulahi, navuzwa viveeye nu vuguli vonene niiva ulavigulanyia.
24Baba wumundu mulungi aveeye ni kivuni chu vusangali ligali. Oyo wiivula mwana mugeri alakave nuvusangali naye.
25Okole baba woovo na mama woovo vave nu vuyanzi. Oleke uyu wakwivula asangale.
Lugano lwa -17-
26Mwana wange huliriza kandi uvuguli limenya liange live amigizu kuive. 27Mukali muheyi aveeye kuli liliina liu luliva; mukali utaveeye musuuvirifu aveeye kuli ovogo vong'erere.
28Vakulindilira kuli aviivi kandi valomba avasaza vanyingi kuvula kuva avasuuvirifu.
Lugano lwa -18-
29Nivwaha oveeye nuvudinyu vunyingi? Nivwaha oveeye novovereri? Nivwaha oveeye nu vwigani? Nivwaha wigana? Nivwaha oveeye ni zingwagu vugira kindu chazileeta? Nivwaha oveeye ni zimoni zinzakanyu? 30Ni yavo avamenya ku iwaini. Yavo avazizaa kuzazama iwaini yasuganywa.
31Utahenza iwaini neveeye inzakanyu mba, lwa itavagiraa mu kekombe yiginga ma yidoloka hasi. 32Mu limalirika ilakuluma kuli enzoka yu vusungu, kandi kuli kihirigoma. 33Ulalora vindu vigeni, kandi ulamoloma vindu viu vuchamu. 34Ulava kuli mundu ogoni hagati hi inyanza kandi kuli mundu ogoni kondongozi kwu mulage.
35Ulavoola, “Vakunduya, navuzwa sisaliyi mba, vakunguya navuzwa simbuliyi mba. Ndavuka ing'inga ki? Inzi ndeenya iwaini yindi nwi.”
©Bible Society of Kenya, 2019