MIKA 3

Mika agondokeraa Aviimiliri va Isiraeli

1Maku ndavoora, “Muhuliri, munyi aviimiliri va Yakobo, munyi avamihi va avandu va Isiraeli! Gamudukira mumanye uvulungi. 2Munyi mudunyiraa uvulahi na muyanzaa uvudamanu; avavagaa amagondo kutura ku avandu vange nivaveeye mwoyo kandi avatuliza zinyama ku vigumba viavo. 3Mulizaa zinyama zia vandu vange. Munyenya amagondo gaavo, kandi muvunanyiaa iviguumba viavo. Muvitemanyia kuli inyama iviikwa mu kifuria kandi kuli inyama iviikwa munyingu? 4Ing'inga yiza iya mulisara ku Yahova, navuzwa sialimutivulira mba. Ku ing'inga yeyo, alakavisi mumoni mwimwe kutura ku munyi kigira uvudamanu vwa mumali kokora.”

5Yahova avoora, “Avandu vange vamali kugadwa na avaporofeti avasuuvirizaa mirembe ku yavo avavatuungaa navuzwa vatihiza nuvulwani yavo avatavahezaa kindu. 6Kulwayago, uvudiku vulaza ku munyi vugira malola, kandi kisundi kiladuuka ku munyi vugira uvusigitiri. Iliuva lilayelera avaporofeti, kandi lidiku lilava kisundi kuvo. 7Avaloli valava muzisoni; kiyira ligutwa liavo. Vosi valakunika minwa jaavo, kigira Nyasaye sialavativulira mba.”

8Navuzwa, ku lwa inzi, Yahova yizuliza mu inzi Roho weve kandi zinguru zizie, kandi yambeza likalaga liu vulungi nuvuluviliri ukwilwazira avandu va Isiraeli vwoni vwavo. 9Mumbulirizi, munyi avamihi va Isiraeli, munyi avadunyiraa likalaga liuvulungi nukuchaminya malungi kugwa amadamanu. 10Mwumbakaa lidaala liene lia Nyasaye, Jerusalemi, ku muse gwu uvulumindi kandi ugutali nilikalaga liu vulungi. 11Aviimiliri valio vamiiha kigira viambeti, avasaalisi valio vigiza ku vaduuki konyoora mitungu, na avaporofeti valio vaangora ovoporofeti vwavwo kunangwa vaduuki konyoora amabese; navuzwa vidiira ku Yahova nivavoora, “Yahova si aveeye hagati hiitu? Uvudamanu sivulaza ku kunyi mba.”

12Kunangwa, kigira munyi, Ziyoni ilalimwa kuli umulimi, Jerusalemi lilava kitumi cha amang'anye na kiguru chi Litembeli kilagwa umulitu.

Currently Selected:

MIKA 3: LOGOOLI

Highlight

Copy

Compare