MIKA 2

Keheri cha yavo avadambizaa vadaka

1O, vayaayi, kivi keve kuyavo avasavira kokora uvudamanu; kandi avalohizaa kokora uvudamanu mu vidali viavo! Lwa vuchezaa, nonoho lwa vaveeye nuvwiyangu, vakora uvudamanu vwavalohizi kokora. 2Lwa vakayirwa imilimi, vajivugula; lwa vakayirwa zinyumba vazivugula; vadambiza umundu na avinyumba yeye, nu kuvugura miandu jije.

3Kunangwa Yahova avoora, “Saaviraa koleta kivi ku munyi, na simulakahononoke kucho mba. Muzizaa kunyooleka munyi vene mu vudinyu, maku simulagenda ni liegingira kandi mba kigira ilava ing'inga yi kivi. 4Lwi ing'inga yene yiyi iduuka, avandu valatumikira makuva ginyu kuli kelolero chi kivi, na valimba ulwimbu yilu lwu kukuza mwoyo. Kigira vindu viamwavitiramu:

Kumali kudivizwa ligali!

Yahova umali kuvugura milimi jietu,

kandi ujigavuliyi yavo avakuhila muvuhambe.”

5Kulwayago, lwa ing'inga iduuka kivala chietu ukwiranyirwa avandu va Yahova,

sihalavaho ni kidieli ku mulala ku munyi mba.

6Avandu vanzilwaziraa nivavoora, “Utakwilwazira mba. Utilwazaa amakuva yago goosi mba. Nyasaye siazizaa kukuviika muzisoni mba. 7Muganaganaa vandu va Isiraeli valamwa? Muganaganaa Yahova umali koleka uvwikuziri vwivwe? Muganaganaa anyala kokora vindu kuli yivi? Omolome novohooma ku yavo avakolaa uvulungi?”

8Yahova ativulaa, “Munyi mwingiliraa vandu vange kuli avasigu. Avasaza viranaa kutura mu vulwani, nivaganaganaa vaveeye mu mirembe yengo, navuzwa uwene yeyo, mulindiliraa kuvanyaga amakooti gaavo. 9Mukungaa avakali va avandu vange vatuli mu zingo ziavo ziavayaanzaa. Mumali kunyaga avana vaavo uvugasu vwange mihiga ni mihiga. 10Muturi yaaha na muzie; hano sihaveeyeho ni likingwa kandi mba. Uvwoni vwinyu vumali kwononyia havundu hano nu kuhadiviza.

11“Niiva mundu umugadi yaza nokovoora, ‘Inzi ndaporofetera munyi ndi iwaini na malwa galidoloka, uyu niyie muporofeti wa avandu yava vayaanza.’

12“Navuzwa ndamuvungiza harara ligali, avandu vosi va Isiraeli avatigara. Ndamuvungiza harara kuli amagondi gilanaa mu kego. Kuli chayo chizuuyi amagondi, kivala chienyu kilava kandi na vandu vanyingi.”

13Nyasaye alavigulira inzira, nukuvimilira vatuli mu lihaminywa. Valavunaga nu kuvitira mu virivwa vie lidaala linene kandi vazie novovoholore. Mwami wavo, Yahova Wuvunyali alavimilira.

Currently Selected:

MIKA 2: LOGOOLI

Highlight

Copy

Compare