MATAYO 3
3
Lilwaza lia Yohana Mubatizi
(Mar. 1:1-8; Luk. 3:1-18; Yoh. 1:19-28)
1Mu madiku yago Yohana Mubatizi yaza, natanga kwilwaza mwigendanyama lie Vuyuda navoora, 2“Mwiganiri, kigira Uvwami vwu mwigulu voveeye ahimbi.” 3Yohana uyu niyie wu muporofeti Isaya yamoloma amakuva geege na avoora,
“Umwoyo gwu Mundu guhanzukaa mwigendanyama:
‘Mulombe inzira yu Mwami,
mulungikizi mihanda jije.’ ”
4Yohana yiviika inguvu yanavwa ku uvwoya vwi ing'amia, nayeevoha musibi gwe kesero mu kekenge chiche. Viukulia vivie viali zisigi nu uvwuki vwu mu mulitu. 5Kunangwa vandu vazia kuye kutura Jerusalemi, kutura mu kivala choosi chi Ivuyuda ni zimbega ziosi iziali ahimbi nu mugera gwa Jorodani. 6Viyama uvwoni vwavo, naye navabatiza mu mugera gwa Jorodani.
7Navuzwa lwa Yohana yalora Vafarisayo na Vasadukayo vanyingi ni vazaa kuye avabatizi, yavavolera, “Munyi avana vi zinzoka! Nivwaha uwaamugerihiza mwiruki vutima vwa Nyasaye vuzaa? 8Gamudukira mukore ivikolwa vimanyia ndi mumali kwiganira. 9Mutiganaganyia aveene kovora, ‘Kunyi koveeye na guuga wiitu Aburahamu!’ Muvooleraa agiligali, Nyasaye anyala kolombera Aburahamu avana kutura ku magina yaga. 10Kali kalunu imbaazi iviikiywi mu vitinya vie misaala. Musaala gwosi ugutaama makuyu amalahi gulatemagwa, ma goteevwe mu muliru. 11Inzi mubatizaa mu mazi kumanyia ndi mumali kwiganira. Navuzwa uyu uzaa inyima wange aveeye ni zinguru kuvita inzi. Inzi sindukana kali ku mugingira vilato vivie mba. Uyu alamubatiza mu Roho Mutakatifu kandi mu muliru. 12Aveeye ne kesesero chiche mumukono gwigwe. Kandi alalaviza oloze lwilwe ligali, nuvuswage alateera mu kedeera, navuzwa umukuzi alagusaamba nu muliru gutasimikaa.”
Libatizwa lia Yeso
(Mar. 1:9-11; Luk. 3:21-22)
13Maku ing'inga yeyo Yeso yaza natura Galilaya naduuka ku mugera gwa Jorodani, nazia ku Yohana amubatizi. 14Navuzwa Yohana yaageriza kumugaya navoora, “Kigira ki uzaa ku inzi ngubatizi lwa ivi wenyekaa umbatizi?”
15Navuzwa Yeso yamutivulira, “Leka gave ndio kalunu kigira ni vulahi kuduukizi uvulungi vwosi vwa Nyasaye yenya.” Hene yaho Yohana yaavugilira.
16Lwa Yeso yaali niyakabatizwa, yatura mu mazi vwangu. Henza iligulu liakunuka, Roho wa Nyasaye yika kuli ilikuulu, ni yaza kuye. 17Kandi henza, umwoyo gwatura mu ligulu ni govoora, “Uyu nu Umwana wange muyanze wandayanza.”
Currently Selected:
MATAYO 3: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019