MATAYO 2
2
1Ing'inga Yeso yiivulwa mu lidaala lia Bezelehemu, mu kivala chi Vuyuda, mu madiku ga Herodi yaali mwami, henza, avageri avukutunyiriza zing'ereng'ani vaatura Ivugwi, ni vaduuka Jerusalemi. 2Na vateva, “Aveeye hayi, uyu umwana uwivuliiywi kuva mwami wa Vayuda? Kigira koololi eng'ereng'ani yeeye Ivugwi, na kuuzi kumusigamira.”
3Lwu Mwami Herodi yahulira yaga, yaahenda mwoyo harara na avandu vosi va Jerusalemi. 4Kunangwa yalanga harara avasaalisi vanene vosi, na avigizi vi Lilaga, navateeva, “Mesia alivulwa haliha?”
5Navo va mutivulira, “Mu lidaala lia Bezelehemu, mu ikivala chi Vuyuda, kigira nindio gang'odwa nu muporofeti:
6‘Na ivi O, Bezelehemu, mu kivala chi Vuyuda,
si oveeye ligali muke hagati ha avamihi vi Vuyuda mba kigira kutura ku ivi,
alaza mwami uliva mwayi wa vandu vange, Isiraeli.’ ”
7Kunangwa, Herodi yalanga avageri vaazana muvwivisu, na yavateveleriza kandi naamanyiriza ing'inga yeng'ereng'ani yaloleka. 8Yavatuma kuzia Bezelehemu, navavoolera: “Muzie, kandi mwenyelerizi ligali amakuva gu umwana oyo. Ni mumali ku munyoora, muuzi kombolera, ninzi kandi nzie ku musigamira.”
9Lwa vamala kuhulira amakuva gu mwami, vazia. Henza, eng'ereng'ani yavalola Ivugwi, yaavimilira, kuduuka lwa yasingira higulu hu umwana yaali. 10Lwa valora eng'ereng'ani yeyo, vasaangala nu vuyanzi vonene ligali. 11Vingira munyumba, ni valora umwana na Maria mama weve; na viinama imbiri weve ni vamusigamira. Vavoholora iziakiiba ziavo, ni vamuha vihaanwa viezahabu, ikimuli na manemane.
12Nyasaye yaviganihiza nukuvagerihiza mu maloto vatirana ku Herodi mba. Kunangwa virana mu kivala chavo kuvitira kunzira yindi.
Kwirukira Egebeti
13Lwa avageri yavo vaali nivakazia, henza, engelosi wu Mwami yaloleka ku Josefu mu maloto namuvolera, “Vuka, uvuguli umwana harara na mama weve, wiruki uzie Egebeti. Omenye yo kuduuka lwa ndikovoolera, kigira Herodi azizaa kwenyeleriza umwana uyu kuduuka amwiti.”
14Kunangwa Josefu yavuka, navugura umwana harara na mama weve, natura vudiku, nazia Egebeti. 15Yamenya yo kuduuka lwa Herodi yakuza. Yaga gekoleka gaduuki kuduukizwa agu Mwalni yavoola kuvitira mu muporofeti: “Ndaalanga Umwana wange kutura Egebeti.”
Avana vayaayi vakekeeke viitwa
16Lwa Herodi yalora vageri vaamugadi, yavihilirwa ligali ma yaatuliza lilago ndi avana vayaayi vosi vu mulidaala lia Bezelehemu na vikivala chaali ahimbi, viitwi; avaari nivaduuki mihiga giviri kandi vosi avaari nivakikiri kuduuka. Yaga gaakolwa kolondekana ning'inga ya vaali vamuvooleye.
17Na ndio gaadukizwa makuva gavoolwa kuvitira mu muporofeti Jeremia:
18“Mwoyo gwaahulirwa mu lidaala lia Rama,
lilira ni lisioma linene.
Raheli asiomeraa avana veve,
kandi yasura koleminywa mwoyo,
kigira vosi vaali ni vakuzi.”
Lirana kutura Egebeti
19Inyima wi likuza lia Herodi, henza engelosi wu Mwami yaloleka ku Josefu mu maloto mu Egebeti, 20namuvolera, “Vuka! Vugula umwana na mama weve, wirane kandi mu kivala cha Isiraeli, kigira yavo avenyaa kwita umwana, vamali kukuza.” 21Kunangwa Josefu yavuka navugura umwana harara na mama weve, ni virana mu kivala cha Isiraeli.
22Navuzwa lwa Josefu yahulira ndi Arikelao, umwana wa Herodi, ugwiyi mwami wi Ivuyuda mu vogono vwa baba weve, yatia kuzia yo. Lwa yamala kogerihizwa mu maloto, yazia mu kivala cha Galilaya. 23Yazia komenya mu lidaala lialangwa Nazareti. Na ndio gaduukizwa makuva gavoolwa kuvitira mu vaporofeti: “Alalaangwa Munazareti.”
Currently Selected:
MATAYO 2: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019