LEVI 3
3
Kihanwa chu vuhambani
1Lwu mundu woosi ahaanaa ku Yahova ndala ku zing'ombe zizie kuli kihanwa chi mirembe, gaduukanaa eve igiriki anoho erori itali nimbara. 2Mundu zana alaviika mukono gwigwe mulungi ku mutwi gwi kihanwa chiche na alagisinzira ha vwingiliru vwi Lihema liu kuvuganira mu na Yahova. Kunangwa, avasaalisi, avayaayi va Haruni valuuha masahi gayo mu zimbega ziosi zine ziu uvwali. 3Kutura ku kihanwa chi mirembe zana, alahaana vidonye vie kisiuviriru yivi ku Yahova: itinya yoosi eveeye ku vindu viumunda viosi, 4Zimbigu ziombi nitinya eveeye kuzio himbi kandi kedonye kilahi ligali chi ingudumani yatulizwa harara ni zimbigu. 5Avasaalisi valasaamba yivi viosi ku uvwali harara ni Vihaanwa viu kusambwa. Lifunya mwayu gwi kihanwa chi chukulia yiki liveeye liu kuyanziza ku Yahova.
6Niiva ligondi anoho imburi itumikiywi kuli kihanwa chi mirembe ku Yahova, kinyala kuva kekole anoho kisuveni, navuzwa kuduuka keve vugira imbara. 7Niiva mundu alahaana kememe chi ligondi ku Yahova kuli kihanwa, 8alaviika mukono gwigwe mulungi ku mutwi gwalio, ma alisinziri havwingiliru vwi Lihema liu kuvuganira mu na Yahova. Avasaalisi valuuha masahi galio kuzimbega zine ziosi ziuvwali 9kandi alahaana viungu vie inyama yivi kuli kihanwa ku Yahova, itinya yacho, itinya yoosi yu musembe nigukaliywi kutura ku kigumba chu mugongo, itinya yoosi ifumaa vindu viu munda viosi, 10zimbigu ziombi harara nitinya eveeye kuzio, kandi kedonye kilahi ligali cha ingudumani. 11Musaalisi uva nakora muyinzi yigu, alavisaamba viosi ku uvwali, kuli kihanwa chi chukulia kihaanwaa chu muliru ku Yahova.
12Niiva alahaana imburi, alageleeta imbiri wa Yahova, 13kandi alaviika mukono gwigwe mulungi ku mutwi gwayo ma agisinziri imbiri wi Lihema. Avasaalisi valuuha masahi gayo ku zimbega ziosi zine ziu uvwali. 14Alahaana vidonye vie kisiuviriru yivi kuli kihanwa chi chukulia ku Yahova. Itinya yoosi eveeye ku vindu viu munda; 15zimbigu ziombi, kandi itinya eveeye kuzio, kandi kedonye kilahi chi ingudumani. 16Musaalisi alavisaamba viosi ku uvwali kuli kihanwa chi chukulia, chu kuyanziza Yahova. Itinya yoosi eveeye ya Yahova.
17Mundu wa Isiraeli woosi atalia ku itinya anoho masahi mba. Yili ni Lilago lia vandu va Isiraeli vosi vaduukana valindi madiku goosi havundu hoosi ha vava nivamenyi.
Currently Selected:
LEVI 3: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
