LEVI 18

Ovoheyi nu Vudamanu

1Yahova yavolera Musa 2avolere avandu va Isiraeli, “Inzi mbeeye Yahova Nyasaye winyu. 3Mutalonda likora lia avandu va Egebeti wamwamenyaa mba anoho likora lia avandu vu mukivala cha Kanaani wa inzi muhiraa mba. Mutalonda malago gaavo mba. 4Kuduuka mulonde malago gange kandi mukore ga Inzi mulagaa. Inzi mbeeye Yahova Nyasaye winyu. 5Mulonde likora kandi malago ga Inzi muheezaa. Mulahonyia livamwoyo lienyu mu likora ndio. Inzi mbeeye Yahova.”

6Mundu woosi ataheya nu mwiko weve mba. Inzi mbeeye Yahova. 7Utaha baba woovo zisoni ku ligona harara na mama woovo mba. Aveeye mama woovo utavimbula chahonyo chiche mba. 8Utaha baba woovo zisoni ku liheya na mulala ku vakali veve mba. 9Utaheya na mbozo woovo naveeye mukaana wa baba woovo yivula nu mukali wundi mba, anoho mukaana wa mama woovo, yivula nu musaza wundi mba kali niiva yaavirukira anoho yavula kuvirukira munyumba yinyu. 10Utaheya nu mwisukulu woovo mba mukaana wu muyaayi woovo anoho mwisukulu wu mukaana woovo mba. Ulava nuwehezaa zisoni. 11Utaheya na mbozo woovo wa baba woovo yivula nu mukali wundi mba. Aveeye mbozo woovo. 12Utaheya na mbozo wa baba woovo kigira aveeye mwiko wa baba woovo wahimbi. 13Utaheya na amwavo mama woovo mba. Aveeye mwiko wa mama woovo wa himbi. 14Utaheya numukali wa amwavo baba woovo mba. Oyo kandi aveeye mama woovo. 15Utaheya na navizara woovo mba, aveeye mukali wu muyaayi woovo; utavimbula chahonyo chiche mba. 16Utaheya nu mukali wa amwavo woovo mba. Yaga gaveeye zisoni ku amwavo woovo. 17Utaheya nu mukaana anoho mwisukulu wu mukali wa iyivi umali koheya naye mba. Yava vaveeye aviiko vovo va himbi. Voheyi kuli yivwo voveeye vudamanu. 18Utavugula amwavo mukali woovo, mukali woovo mwene nakikiri mwoyo mba.

19Utaheya nu mukali lwa veeye mu ing'inga yeye yu mweli mba kigira aveeye mudamanu. 20Utaheya nu mukali wu mutende woovo mba yaga garakokola kua mudamanu. 21Utahaana mulala ku avana vovo kuva kisiuviriru ku nyasaye ulangwa Moleki mba, kigira yago galaleta zisoni ku lieta lia Nyasaye. 22Musaza atagona nu musaza wundi kuli agonaa numukali mba. Liveeye livihiliriza ku Nyasaye. 23Musaza anoho mukali woosi atagona nu mutugu gwosi mba. Keveeye kivihiri kenene ligali.

24Muteyononyia munyi vene mu vikolwa yivio viosi mba kigira nindio avandu vi zihiiri vanzizaa kukunga kutura imbiri winyu veyononya. 25Vikolwa viavo vialomba kivala kuva kidamanu. Kunangwa Yahova ahaanaa mageri ku kivala nukusuula avandu vamenyi mucho. 26Navuzwa kuduuka munyi mulonde amalago gange goosi. Munyi mwosi mundu wa Isiraeli, anoho mugeni omenya hagati hinyu atakola ku ivindu viukuvihiliriza yivi kali kilala mba. 27Kigira ivindu viukuvihiliriza yivi viosi viakolwa na avandu vamenya mu kivala cha muzizaa mu, kivala yicho chamala kwonogonywa. 28Niiva mulachonogonyia, kilamusuula kuli chasuula zihiiri ziamenya mu imbiri winyu. 29Munyi mumanyi vulahi ndi, mundu woosi okolaa kilala ku ivindu vidamanu viukuvihiliriza yivi, sialavalizwa kuli mulala ku avandu va Nyasaye mba.

30Yahova yavoola; “Mulonde malago gamuhezaa na mutalonda vikolwa via avandu avamenyaa mu kivala yicho imbiri winyu mba. Muteyonogonyi munyi vene mu likora kilala ku vindu yivi mba. Inzi mbeeye Yahova, Nyasaye winyu.”

Currently Selected:

LEVI 18: LOGOOLI

Highlight

Copy