LEVI 17

Vutakatifu vwa Masahi

1Yahova yavolera Musa, 2avolere Haruni, na vana veve na avandu vosi va Isiraeli ndi, yili nilio likuva lia Yahova alagi; 3mundu woosi wa Isiraeli uhaana kihanwa cheng'ombe anoho kememe chi ligondi, anoho imburi hokososa anoho ichova wa hokososa, 4muvogono vwo kokeleeta ha vwingiliru vwi Lihema liukuvuganira mu na Yahova, aduuki kukihaana kuli kihanwa imbiri wi Lihema lia Yahova, mundu oyo alavalizwa kuva nilihiolo liukutahiza masahi, na alatulizwa hagati ha avandu veve. 5Kivuni chi lilaga yili keveeye ndi, avandu va Isiraeli kalunu valaleta ku Yahova zinyama zia vasinzira mu viguuti. Kalunu valazileeta ku Musaalisi ha vwingiliru vwi Lihema nukuzisinza kuli vihaanwa vie mirembe. 6Musaalisi aluuha masahi ku uvwali vwa Yahova ha vwingiliru vwi Lihema liukuvuganira mu na Yahova; nokusamba zitinya zifunyi mwayu gwukuyanziza Yahova. 7Avandu va Isiraeli sivadukanaa vazizagiliri kuva vataveeye vasuuvirifu ku Yahova mba, ku lisinzira zinyama mu viguuti kuli vihaanwa nukuvihaana ku mademoni gi zimburi. Avandu va Isiraeli gavadukiraa valindi lilaga kuduuka ku makura gaaza.

8Uvavoolere kandi mundu woosi, wa Isiraeli, anoho mugeni umenyi hagati hinyu, uhaana kihanwa chukusambwa, anoho kihanwa choosi, 9kuli kihanwa ku Yahova, naavulia kokeleeta havwingiliru vwi Lihema, mundu oyo kuduuka atulizwi hagati ha avandu va Nyasaye.

10Niiva mundu woosi, wa Isiraeli anoho mugeni umenyi hagati hinyu alalia inyama nikikiri mu na masahi, anoho ulia masahi goosi, ndamutuliza hagati ha avandu vange 11Livamwoyo lia vuli kelombe liveeye mu masahi, na yiki nicho chagira Yahova nalaga ndi amasahi goosi gasundulwi ku uvwali kutulizaho uvwoni vwa avandu. Amasahi gaveeye livamwoyo, gakunikaa uvwoni. 12Yiki nicho chagira Yahova navolera avandu va Isiraeli anoho vageni vamenya hagati haavo ndi vatalia masahi anoho inyama ikikiri mu namasahi mba.

13Niiva mundu woosi, wa Isiraeli anoho mugeni umenyi hagati haavo uhima inyama anoho linyonyi liveeye lilahi kuduuka atahiziri masahi galio ku lirova ma agakuniki nuluguchi. 14Livamwoyo lia vuli kelombe keveeye mwoyo liveeye mu masahi. Yicho nicho chagira Yahova navolera avandu va Isiraeli ndi vatalia inyama yoosi nigikiri mu na masahi mba. Mundu woosi okola ndio alatulizwaho. Sialavalizwa kuva mulala ku avandu va Nyasaye mba.

15Mundu woosi ulia inyama imali kukuza yene anoho yi inyama yindi yu muvulimu yiiti, kuduuka afuuyi zinguvu zizie kandi yisingi na alava mudamanu kuduuka hamugorova. 16Natakola ndio, alanyoola mageri gu vudamanu vwivwe mwene.

Currently Selected:

LEVI 17: LOGOOLI

Highlight

Copy