LEVI 15

Amahila Kutura mu Muviri

1Yahova yahaana ku Musa na Haruni Malago yaga. 2Ku avandu vosi Isiraeli na vavoolere ndi, lwu mundu woosi atulaa mahira mu muviri gwigwe, litula lia mahira yilio liveeye lidamanu, 3kali niiva galazizagilira kutura, anoho galekele, galamukola mudamanu.

4Kidali choosi chayikala ku anoho cha agona ku, keveeye kidamanu. 5Mundu, woosi udiira kukidali chiche kuduuka afuuyi zinguvu zizie kandi yisingi namazi, na alava mudamanu kuduuka hamugorova. 6Mundu woosi wikala ku kindu choosi chu mundu oyo yikala ku, alafuuya zinguvu zizie nukwisinga mazi na lava mudamanu kuduuka hamugorova.

7Mundu woosi udiira ku mundu oveeye nikisununu kuduuka afuuyi zinguvu zizie nokwisinga mu mazi, na alava mudamanu kuduuka hamugorova.

8Niiva mundu wikisununu natuuza mate ku oyo oveeye mulahi, mundu oyo kuduuka afuuyi zinguvu zizie ma yisingi namazi, na alava mudamanu kuduuka hamugorova.

9Kesero anoho endeve yu mundu wi kisununu yikala ku eveeye indamanu. 10Mundu woosi udiira ku kindu choosi cha oyo wikisununu yikala ku, alava mudamanu kuduuka hamugorova. Mundu woosi ugingaa kindu choosi chu mundu wikisununu yikala ku, kuduuka afuuyi zinguvu zizie kandi yisingi mu mazi, na alava mudamanu kuduuka hamugorova.

11Niiva mundu oveeye nikisununu adiira mundu nakikiri kwisaava makono geege kutanga, mundu oyo afuuyi zinguvu zizie nokwisinga, kandi alava mudamanu kuduuka hamugorova. 12Zinyingu ziosi zia oyo oveeye nikisununu adiira ku, kuduuka ziatanywe kandi uluju lwavazwa kumusaala lwosi lwa adiira ku kuduuka lwogizwi namazi.

13Mundu oyo namali kohona kisununu chiche, kuduuka alindi madiku saba maku afuuyi zinguvu ziezie nokwisinga mumazi malahi kutura mu kidaho, naye alava mulahi. 14Ku lidiku lia munane alavugula makuulu gaviri gu muvulimu anoho makuulu gaviri matugi na alazia nago ha vwingiliru vwi Lihema liu kuvuganira, imbiri wa Yahova, nokugahaana ku Musaalisi. 15Musaalisi alahaana lilala kugo kuli kihanwa chu uvwoni ni lindi kuli kihanwa chukusambwa. Munzira yiyi musaalisi alamulombera muruka gwukwogiza uvwoni vwivwe.

16Lwu mundu musaza alootaa ndi aveeye nu mukali ma yeyonogonyie muviri gwigwe gwosi, alava mudamanu kuduuka hamugorova. 17Kindu choosi, cha lombwa kutura kunguvu anoho kesero chu vusaza vwivwe vuziaku, kilava kidamanu kuduuka hamugorova. 18Inyima wumusaza kuva harara numukali, kuduuka vombi visingi na mazi, na valava vadamanu kuduuka hamugorova.

19Lwu mukali ava naveeye mu ing'inga yeeye yu mweli, alava mudamanu ku madiku saba. Mundu woosi udiira mukali oyo alava mudamanu kuduuka hamugorova. 20Kindu choosi cha yikala ku anoho chagona ku mu ing'inga yeeye yu mweli kilava kidamanu. 21Mundu woosi udiira ku kidali chiche alafuuya zinguvu zizie kandi alava mudamanu kuduuka hamugorova. 22Mundu woosi udiira kindu choosi chu mukali oyo yikala ku alafuuya zinguvu zizie kandi yisingi na alava mudamanu kuduuka hamugorova. 23Niiva nikukidali anoho choosi cha yaali niyikayange ku, mundu woosi udiira ku, alava mudamanu kuduuka hamugorova. 24Niiva musaza ava naagona harara numukali oyo mu ing'inga yeeye yu mweli, alava mudamanu ku madiku saba; na kidali choosi chagona ku kilava kidamanu.

25Niiva mukali aveeye nilitaaza masahi ku madiku manyingi kuvita madiku geege gu mweli, anoho litaaza masahi lilie lizizagilira kuvita ing'inga yeeye ya kazozo, alava mudamanu ku lohono lwa zizagilira kutaza kuli aveeza vuzwa ing'inga yeeye yu mweli. 26Kidali choosi cha ava naagona ku na kandi choosi cha yikala ku mu ing'inga yiyi keveeye kidamanu. 27Mundu woosi udiira ku vindu yivi kuduuka afuuyi zinguvu zizie kandi yisingi. Alava mudamanu kuduuka hamugorova.

28Inyima wi litaaza lilie lilekela, kuduuka alindi madiku saba; ma ku alava mutakase. 29Ku lidiku lia munane alavugula makuulu gaviri gumuvulimu anoho makuulu gaviri matuge na agahili ku musaalisi ha vwingiliru vwi Lihema liu kuvuganiramu na Yahova. 30Musaalisi alahaana lilala kuli kihanwa chu uvwoni na lindi kuli kihanwa chukusambwa. Munzira yiyi alamulombera muruka gwu kutakaswa.

31Yahova yavolera Musa yiganihizi avana va Isiraeli ku vudamanu vwavo; kunangwa vavuli kwonogonyia Lihema lilie liukuvuganira mu, liali hagati haavo. Nivakakoli ndio vaali valitwa. 32Yaga na malago ku musaza uva natura mahira muvusaza vwivwe kigira kisununu anoho uva nalotaa ndi aveeye harara nu mundu mukali, 33mukali oveeye mu ing'inga yeeye yu mweli, anoho musaza uva naagona nu mukali oveeye mudamanu kolondekana numwima.

Currently Selected:

LEVI 15: LOGOOLI

Highlight

Copy