LEVI 14

Litakaswa Inyima wu Kulwaala Vulwaye vwo Vogere

1Yahova yahaana ku Musa, 2malago yaga kigira litakaswa liu mundu oveeye novogere ku lidiku lia aleetwa ku musaalisi aduuki kutakaswa. 3Musaalisi alamutuliza ichova wa hokososa nukumuhenzeliza. Niiva vulwaye zana vumali kohona, 4Musaalisi alamulaga aleete manyonyi gaviri agaveeye malahi kolondekana nidini, harara nu lubaho lwumusaala gwu mudaragwa, luvusi lwakanyu nu luvinu, viletwe kuye kigira oyo wenyaa kutakaswa. 5Maku musaalisi alalaga lilala ku manyonyi yago gasinzilwi ku luju lwi lidohi niloveeye ku na mazi kutura mu kidaho. 6Alavugula linyonyi litigaye mwoyo, nukuliina, harara nulubaho lwu mudaragwa, nuluvusi lwakanyu, nuluvinu, mu masahi gi linyonyi lisinziywi. 7Aluuha masahi zana haali saba ku mundu wenyaa kutakaswa kutura ku vulwaye vwo vogere, ma ku alamulandiza, mundu oyo kuva mulahi. Alalakuula linyonyi liveeye mwoyo libuluki kuzia muvulimu.

8Oyo wenyaa kutakaswa kutura ku vulwaye alafuuya zinguvu zizie, avege liisu lilie liosi, kandi yisingi na mazi. Alava mulahi kolondekana ni miima. Inyima wa yaga, anyala kwingira mu hokososa, navuzwa alamenya ichova wi lihema ku madiku saba.

9Ku lidiku lia saba, alavega liisu ku mutwi gwigwe gwosi, zinderu zizie, vigohe vivie, kandi liisu liu kumuviri gwigwe liosi. Kuduuka afuuye zinguvu zizie ziosi, ma yisingi na alava mulahi.

10Ku lidiku lia munane, kuduuka aleete vimeme via magondi mamigu viviri vugira imbara ne kememe kisuveni chu muhiga mulala vugira imbara, zikilo zivaga ziuvusie vuzuganyiywi mu maguta ga muzeituni, kandi kedonye kilala ku vivaga chi liita ndala ya maguta ga muzeituni. 11Musaalisi zana alaleeta mundu oyo harara ni vindu yivio imbiri wa Yahova, ha vwingiliru vwi Lihema liu kuvuganira mu na Yahova.

12Maku musaalisi alavugula kilala ku vimeme vimigu harara nekedonye kilala ku vivaga chi liita ya maguta, nokuvihaana kuli kihanwa chu kutuliza uvwoni; alakihaana kuli kihanwa chagimwa imbiri wa Yahova kigira musaalisi. 13Gamudukira asinziri kememe chi ligondi zana havundu hatakatifu hi vihaanwa viu uvwoni ni vihaanwa viukusambwa visinzirwaa. Gamuduukira akole ndio kigira kihanwa kuli kihanwa chu uvwoni, keveeye chu musaalisi, keveeye kitakatifu ligali. 14Musaalisi alavugula ku masahi ge kememe chi ligondi ekeveeye kihanwa chu uvwoni nu kugavaka ku gutu gwu mukono mulungi, nokokedete kenene chu mukono mulungi, nokokeno kenene chekerenge kilungi cha mundu wenya kulandizwa kuva mutakase. 15Musaalisi alavugula ku maguta ga muzeituni nokugitulaa ku kigalo chiche mwene chu mukono mumosi. 16Aliina kedete chu mukono mulungi mu maguta zana, na aluuha malala ku maguta zana nekedete haali saba imbiri wa Yahova. 17Alavugula malala ku maguta gaveeye ku kigalo chu mukono gwigwe kandi malala ku masahi ge kememe nu kugavaka ku gutu gwu mukono mulungi, ku kedete kenene chu mukono mulungi, kandi ko keno kenene che kelenge kilungi chu mundu uyu wenyekaa alandizwi kuva mutakase. 18Alaviika maguta gatigaye ku kigalo chiche ku mutwi gwa oyo utakaswa. Munzira yiyi musaalisi alalombera mundu oyo muruka gu kusamiiha uvwoni imbiri wa Yahova.

19Maku, musaalisi alahaana kihanwa chu uvwoni nokolombera mundu oyo muruka gwu kusamiha uvwoni. Inyima wa yago, alasinza kihanwa chukusambwa 20kandi alikihaana harara ni kihanwa chu vuswage ku uvwali. Munzira yiyi musaalisi alamukolera muruka gwu kutakaswa na mundu oyo alava mulahi kolondekana ni miima.

21Niiva mundu oyo aveeye mudaka na sianyala konyoora ivindu vienyeka, alaleeta kememe kimigu kilala kuva kuli kihanwa chiche chu uvwoni, kihanwa kidukiru ku Yahova, kigira musaalisi. Alaleeta kilo ndala yu vusie vuzuganyiywi mu maguta ga mizeituni kuva kihanwa chu vuswage kandi kedonye kilala ku vivaga chi lita ya maguta ga muzeituni. 22Alaleeta kandi makuulu gaviri gu muvulimu, anoho makuulu gaviri matugi, lilala kigira kihanwa chu uvwoni ni lindi kigira kihanwa chu kusambwa.

23Ku lidiku lia munane lie litakaswa lilie, alageleeta ku musaalisi ha vwingiliru vwi Lihema liukuvaganira mu na Yahova. 24Musaalisi alavugula kememe na maguta ga muzeituni nukuvihaana kuli vihaanwa viagimwa ku Yahova kigira Musaalisi. 25Musaalisi alasinza kememe na vuguli malala ku masahi zana agavake ku gutu gwu mukono mulungi gwu mundu oyo, nokukedete kenene chu mukono gwigwe mulungi nokokeno kenene chekerenge kilungi. 26Musaalisi alitulaa malala ku maguta zana mu kigalo chu mukono mumosi gwigwe. 27Musaalisi aluuha ne kedete chiche kilungi malala ku masahi gaveeye ku kigalo chiche kemosi haali saba imbiri wa Yahova. 28Alaviika malala ku maguta gaveeye ku kigalo chu mukono mumosi ku gutu gwu mukono mulungi havundu harara here kuli aviiki masahi ku gutu gwu mukono mulungi, ku kedete kenene chu mukono mulungi, kandi ku keno kenene chekerenge kilungi. 29Maguta gatigaye goosi ku kigalo, alagavaka ku mutwi gwu mundu utakaswa kumulombera muruka gu kusamiha uvwoni vwivwe imbiri wa Yahova. 30Maku alahaana lilala ku makuulu matugi anoho gumuvulimu 31lilala kuli kihanwa chu uvwoni ni lindi kuli kihanwa chukusambwa harara nikihaanwa chu vuswage. Munzira yiyi, musaalisi alalomba muruka gwu kutakasa. 32Yili nilio lilago ku mundu oveeye nuvulwaye vwukutihiza vwo ovogere, navuzwa utanyaliza konyoora vihaanwa via kazozo vienyeka ku litakaswa lilie.

Uvuguku mu Zinyumba

33Yahova yavolera Musa na Haruni, 34Lwa muduuka mu kivala cha Kanaani, chamuhezaa kuva mwandu gwinyu, ma mbiki mu vulwaye vulandaa kuli vuguku muinyumba, mukivala yicho, 35mwene inyumba yeyo kuduuka azie kovoolera musaalisi, mali kolola vulwaye kuli vuguku muinyumba yange. 36Musaalisi alavolera avandu vatulizi ivindu viosi viveeye muinyumba yeyo vivuli kulandizwa kuva vidamanu; 37Musaalisi alahenzeliza vuguku zana. Niiva vuguku vulava kuli vulimu anoho vwakanyu, vuyavugululaa nu kwingira kuduuka musi mwi lidigi, 38Musaalisi alatula ichova nukuhaana inyumba zana yeyo ku madiku saba. 39Ku lidiku lia saba, Musaalisi alilana kohenzeriza inyumba yeyo kandi. Niiva vuguku vumali kulanda ku madigi, 40gamuduukira avolere avandu vatulizi magina gaveeyeku nu vuguku ma gasiuvwi havundu ahadamanu ichova wi lidaala. 41Inyima wa yago, kuduuka avolere avandu vahalagate amadigi gumuusi goosi zimbega ziombi. Amakindi gahalagatiywi galasundulwa havundu hadamanu ichova wi lidaala. 42Maku magina gandi galaletwa nokugavika mu vogono vwa yago gatuliziywi. Valaleta vodohi vundi vuhia vahome kukunika lidigi.

43Niiva vuguku vuliranira kandi muinyumba inyima wa magina gamali kutulizwa na madigi kuhalagatwa nokohomwa vuhia kandi, 44Musaalisi alazia kogehenza. Niiva vuguku vumali kulaanda muinyumba yeyo inyumba eveeye indamanu. 45Kuduuka inyumba yeyo isambulwi yoosi, na magina gayo, misaala jayo, vodohi vwayo vwosi kuduuka vigingwi kutura mu lidaala kusiuvwa havundu hadamanu. 46Mundu woosi wingira muinyumba zana yeyo niihaniywi, alava mudamanu kuduuka hamugorova. 47Mundu woosi ogonaa muinyumba yeyo, anoho aliili mu chukulia kuduuka afuuyi zinguvu zizie.

48Niiva musaalisi yingira nokohenzeriza inyumba yeyo ma anyoore vuguku sivwayilanira kololeka inyima wi lihomwa lie inyumba yeyo vuhia, alalandiza inyumba yeyo kuva indahi kigira vuguku vumali kutulizwa ligali. 49Kutakasa inyumba zana yeye musaalisi alavugula manyonyi gaviri, misaala ji midaragwa, musibi mwakanyu, nu luvinu. 50Alasinzira linyonyi lilala ku luju lwi lidohi, niloveeye ku na mazi kutura mu kidaho. 51Maku alavugula misaala jie midaragwa, luvinu, musibi mwakanyu, nilinyonyi liveeye mwoyo, kandi alariina mu masahi gi linyonyi lisinziywi kandi kuliina mumazi gaturaa mu kidaho. Kandi alaguuha haali saba kuinyumba. 52Munzira yiyi, alatakasa inyumba namasahi gilinyonyi, na mazi gaturaa mu kidaho, linyonyi liveeye mwoyo, misaala jie midaragwa, luvinu kandi musibi mwakanyu. 53Maku alalakuula linyonyi liveeye mwoyo libuluki kutura ichova wi lidaala kuzia muvulimu; kunangwa alatakasa inyumba na ilava indahi.

54Yaga nigo malago kolondekana nu vulwaye vwo vogere, 55vwu vuguku, vwu muzinguvu, anoho muinyumba 56kandi kigira livimba anoho kusiruka anoho livondo; 57kumanyiriza lwi kindu keveeye kilahi anoho kidamanu.

Yaga nigo malago gu vulwaye vwu kuhambizana anoho vuguku.

Currently Selected:

LEVI 14: LOGOOLI

Highlight

Copy