LEVI 11

Zinyama Ziduukanaa Kuliivwa

(Liz. 14:3-21)

1Yahova yahaana ku Musa na Haruni amalago yaga, 2vavoolere avandu va Isiraeli ndi vanyara kulia ku zinyama ziosi ziveeye ku lirova, 3ziveeye ni zimbagayu ziviri ku kerenge na zive ziliizaa igamuura. Yizio nizio zinyama zia munyala kulia. 4Navuzwa ku yizio ziliizaa igamuura anoho zie zimbagayu ziviri ziamutanyala kulia ni yizi; ing'amia, kigira iliiza igamuura, navuzwa sieveeye nizimbagayu ziviri mba. Eveeye indamanu ku munyi. 5Mutalia likinieli mba kigira kali nililizaa igamuura, navuzwa siliveeye nizimbagayu ziviri mba, liveeye lidamanu ku munyi. 6Mutalia kifoyo mba, kigira kali ni kiliiza igamuura, navuzwa sikeveeye nizimbagayu ziviri mba. 7Mutalia zinguruvi mba. Kuduuka zivugulwi kuva zindamanu; ziveeye nizimbagayu ziavukanywa, navuzwa siziliizaa igamuura mba. 8Mutalia zinyama yizi anoho kali kudiira ku muviri mikuzu jazio mba, jiveeye midamanu ku munyi.

9Munyala kulia lugano lwosi lwi isuzi ni vivehe kandi na makambaya 10navuzwa ikindu choosi ikemenyi mumazi ikitaveeye nivivehe na makambaya muta tia mba. 11Vilombe kuli yivi viveeye vidamanu ku munyi. Mutavilia mba kandi mutadiiraku miviri mikuzu javio kali hakuzu mba. 12Ivindu viosi vimenyi mu mazi na siviveeye ni vivehe kandi makambaya, vindu yivi viveeye viukuvihiliriza ku munyi.

13Yaga nigo manyonyi ga muduukana muvihilirwi kandi mutagalia mba, kigira gaveeye madamanu: Zindizu, Zisoti, Kihungu, 14Liive, imbada, 15Majikoro, 16Livuudu, imbugavuga, kiliiza. 17Likuuli, liluvi, likuuli linene, engoonye. 18Likuuli lilavu, likuuli liu muvulimu, esooti indavu 19ling'oani, likuuli liliizaa zisuzi, kandi linyinya. 20Viguguli vibulukaa viosi kandi vimolaa ku virenge vine viveeye viukuvihiliriza munyi. 21Navuzwa ku viguguli via mavaha ivimolaa ku virenge vine, munyala kulia yivio iviveeye nivirenge vihambanyie igulu kuzinduvatiru viukutumatumira kumalova. 22Munyala kulia izisigi, amadagal'la anoho amadede. 23Navuzwa viguguli viosi viamavaha kandi vimolaa ku virenge vine vivalizwa kuva vidamanu ku munyi.

24“Mulava avadamanu nivamudiira ku miviri mikuzu javio. Mulava avadamanu kuduuka ha mugolova. 25Mundu woosi ugingaa kedonye chu muviri mukuzu gwavio, alafuyaa zinguvu zizie mwene, kandi alava mudamanu kuduuka hamugorova.

26“Ku zinyama ziosi, yeyo eveeye nuluhagayu lwavukani haali kaviri, navuzwa italiizaa igamuura eveeye indamanu. Mundu woosi udiira ku miviri gwayo mikuzu alava mudamanu.

27“Ku zinyama ziosi zie virenge vine, zigenda ku makumbu, ziveeye zindamanu. Mundu woosi udiira ku miviri mikuzu jazio alava mudamanu kuduuka hamugorova. 28Mundu woosi ugingaa miviri mikuzu ji zinyama yizio, alafuuya zinguvu zizie mwene, kandi alava mudamanu kuduuka hamugorova; kigira ziveeye zidamanu ku munyi.

29“Ku zinyama zigendagenda vuzwa nizimola kumalova, yizi ziveeye zindamanu ku munyi: (Imbuku, lijuungu, lisiagali 30lisiamugoma, imbulu, ingwina, uluhuyu, ni inyambu.) 31Ku viosi vimolaa kumalova, yizi nizio zivalizwa kuva zindamanu. Mundu woosi udiira kuzio alava mudamanu kuduuka hamugorova. 32Niiva miviri jazio mikuzu jiladiira ku kindu choosi, kilava kidamanu kuduuka hamugorova, nikiva kiju choosi chavazwa ku musaala, inguvu, liseero, anoho ligunia, kali keve kiju chi miyinzi josi, kilava kidamanu. Kuduuka kiinwi mu mazi, navuzwa kilava kidamanu kuduuka hamugorova. 33Niiva miviri mikuzu jazio gilagwa mu inyingu, kindu choosi chaali keveeye mu kilava kidamanu, na kuduuka watanyie inyingu zana yeyo. 34Chukulia choosi kinyala kuliivwa kazozo, navuzwa cha mazi kutura mu inyingu yu lugano yilu gasunduki ku, anoho gakatonyi ku, kilava kidamanu; kandi kindu choosi, kinwevwa kutura munyingu kuli yiyi kilava kidamanu. 35Kindu choosi sia kilala ku miviri mikuzu jivindu yivi vidiira ku, kilava kidamanu. Niliva ni lihiga liukwuminyiraku chukulia, anoho lijiiko liokodekera ku vilatanywa kigira viveeye vidamanu ku ivi. 36Navuzwa kidaho anoho kisima cha mazi gaveeye mu kilatigala vuzwa kilahi kali niiva kindu kidiira ku miviri mikuzu javio keveeye kidamanu. 37Niiva muviri mukuzu guladiira ku vuguza vwu kumiizwa, vuguza yivwo vulava vuzwa vulahi, 38navuzwa niiva muviri mukuzu yigwo gulagwa ku vuguza vwinikiyi mu mazi; vuguza yivwo vulava vudamanu.

39“Niiva ndala ku zinyama zia mwavugilirwa kulia ilakuza, mundu woosi udiira ku muviri mukuzu gwayo alava mudamanu kuduuka hamugorova. 40Mundu woosi uva nalia ku inyama yu muviri mukuzu zana, kuduuka afuuyi zinguvu zizie, na alava mudamanu kuduuka hamugorova. Na uyu kandi ugingaa muviri yigu, alafuuya zinguvu zizie, navuzwa alava mudamanu kuduuka hamugorova.

41“Utalia ku kuzinyama zinguzuzu zimolaa kumalova mba. Ziveeye zindamanu. 42Utalia ku kilala ku vilombe vimolaa mba; kali nikiva kemolaa ku inda yacho, anoho kegendaa ku virenge vine, anoho ku virenge vinyingi, viveeye vidamanu. 43Mutekoli avadamanu ku lilia zinyama zimolaa mba, anoho zigenda ku virenge vine kumalova, anoho muteyonogonyi nazio mba, gase mulava avadamanu. 44Inzi mbeeye Yahova Nyasaye winyu. Mwitakase munyi vene, muve avatakatifu kigira inze mbeeye mutakatifu. Muteyononyia vene na kilala ku ivindu vimolaa kumalova mba. 45Inzi mbeeye Yahova, uwamuleta kutura mu kivala cha Egebeti kunangwa inzi nduki kuva Nyasaye winyu. Kunangwa kuduuka muve avatakatifu kigira inzi mbeeye mutakatifu.”

46Yili nilio lilaga ku zinyama, na manyonyi kandi viosi viveeye mwoyo mu mazi, na viosi vigenda kumalova. 47Kuduuka mwavukanyie hagati hi ivindu vidamanu kandi vilahi; hagati hi zinyama zinyala kuliivwa kandi zitanyala kuliivwa.

Currently Selected:

LEVI 11: LOGOOLI

Highlight

Copy