LEVI 10

Uvwoni vwa Nadabu na Abihu

1Avayaayi va Haruni, Nadabu na Abihu, sa mulala yavugula, kituva chiche, naviika mu amanda gumuliru, nameeda ku kimuli, ma nivahaana muliru gutaveeye mutakatifu imbiri wa Yahova, kigira Yahova siyaali naavalagi vaguhaane mba.

2Kunangwa muliru gwatura imbiri wa Yahova niguvasaamba, ma nivakuzira imbiri wa Yahova. 3Maku, Musa yavolera Haruni, “Yiki nicho kindu cha Yahova yamoloma ku lwa yavoola, avandu vosi vandumikira, kuduuka vahane luyali ku vutakatifu vwange; inzi indavuula vukumi vwange ku avandu vange!” Navuzwa Haruni yachiring'ana.

4Musa yalanga Mishaeli na Elisafani, avayaayi va Uzieli, koza wa Haruni, navavoolera, “Hambi hano, mugiingi miviri mikuzu ja vasiala vinyu, vatuli mu Lihema litakatifu, muvahili ichova wa hokososa.” 5Kunangwa visunda himbi, nivaringira miviri mikuzu mu zinguvu ziavo, nukujihila ichova wa hokososa kuli Musa yaali naavalagi.

6Maku Musa yavolera Haruni na vayaayi veve vandi Elieza na Izamara, “Mutaleki liisu lienyu livuli kusanulwa mba, kandi mutatanduli zinguvu zienyu kumanyia ndi musiomaa mba. Nimukora ndio, mulakuza, na Yahova alava nu vutima na avandu va Isiraeli vosi. Navutswa avache vinyu avandu va Isiraeli vosi, vanyara kusiomera yavo vosi va Yahova yasamba nu muliru gwa yatuma. 7Mutatuli mu vwingiliru vwi Lihema liukuvuganira mu na Yahova mba, gase mulakuza; kigira mwatakaswa lwa mwavakwa maguta ga Yahova.” Kunangwa vaakora kuli Musa yavoola.

Malago ku Vasaalisi

8Yahova yavolera Haruni, 9“Utanwa iwaini anoho choosi chukuhambikiza ivi na vayaayi vovo, lwa muva nimwingira mu Lihema mba, gase mulakuza. Lilaga yili lidukanaa lilondwe mihiga ni mihiga, ni visukululwi vivio viosi. 10Kuduuka mwavukanyie hagati hi vindu vitakatifu ni vindu vitaveeye vitakatifu, hagati hu vudamanu nuvulahi. 11Kuduuka mwigizi avandu va Isiraeli malago goosi ga inzi mali kumuha kuvitira mu Musa.”

12Musa yavolera Haruni harara na avayaayi veve avatigara, Elieza na Izamara,

“Muvuguli kihanwa chu vuswage kitigaraa ku vihaanwa vie viukulia vihaanwa ku Yahova numuliru, mulombe migadi jitaveeye mu na mamera, mu jiliili himbi nu uvwali kigira kihanwa yiki keveeye kitakatifu ligali. 13Mujihili havundu hatakatifu, kigira keveeye kidonye chicho kandi cha vayaayi vovo ku vihaanwa vihaanwa ku Yahova. Yaga nigo malago ga Yahova yandaga. 14Navuzwa ivi harara na vinyumba yooyo, munyala kulia inyama yindasi ni yikinama chinyima kihaaniywi kuva kihanwa kidukiru ku Yahova kigira avasaalisi. Muviliili havundu halahi hu muruka. Oheveeywe ivindu yivi kuva kidonye chicho harara na avana vovo, kutura ku vihaanwa vie mirembe via avandu va Isiraeli valeta. 15Kinama chinyima chahaanwa ninyama yindasi kuduuka viletwe harara ni itinya yi vihaanwa vihaaniywi kumuliru ku Yahova kuli vihaanwa vie chukulia. Vilava vivio na avana vovo mihiga ni mihiga kuli Yahova yalaga.”

16Lwa Musa yenya kumanya ligali wi imburi yi kihanwa chu uvwoni yaali neveeye, yanyoora ndi yaali nisambiywi. Yavihilira avayaayi va Haruni, Elieza na Izamara, navateeva, 17“Kigira ki muvuli kulira kihanwa chu uvwoni havundu ahatakatifu? Keveeye kitakatifu ligali, kandi Yahova umali kukihaana ku munyi aduuki kutulizaho uvwoni vwa avandu vosi. 18Kigira masahi gacho sigaleeteywe mu Lihema Litakatifu, mba, gaduukanangi muliri kihanwa zana yicho ahene yaho kuli ndaamulaga.”

19Haruni yativulira Musa, “Henza, kalunu avandu vamali kuhaana vihaanwa viavo viu uvwoni, kandi vihaanwa viavo viukusambwa ku Yahova, navuzwa ivindu vidamanu kuli yivi vimali kokoleka ku inzi! Na, ndava uliiyi kihanwa chu uvwoni yiki, ngano Yahova yakayaanziywi ninzi?” 20Lwa Musa yahulira yaga, gamuduuka.

Currently Selected:

LEVI 10: LOGOOLI

Highlight

Copy