LISIOMA LIA JEREMIA 3
3
Lihaana mageri, Lieganira, ni Lisuuvirizwa
1Muporofeti avoora: Inzi mbeeye umundu walola uvudinyu
mulihevwa mageri mu vutima vwa Nyasaye.
2Umali kumbira ihale kandi no kongola kogenda mukisundi.
3Nyasaye yambezaa mageri vuli ing'inga.
4Umali kokora ligodo liange ni inyama yange yu muviri kukunguha
kandi avunanyi vigumba viange.
5Umali kungumbiriza nu vutima kandi nilidambizwa.
6Umali kongola komenya mukisundi
kuli avakuzu vizing'inga zia kale.
7Umali konombera lugaga kunangwa mburi kwiruka;
umali komboha niminyororo miriduhu.
8Kali lwandaniraa vudinyu anoho nikulira kigira ovokonyi
asuraa kuhaana mativuli ku lisaala liange.
9Umali kwigalira zinzira ziange namagina gavazwa,
umali kokora inzira yange kovedekana.
10Aveeye kuinzi kuli idubu egoni hasi kongoneka,
anoho kuli isimba ilindilira kundumira.
11Yangunga kutura kunzira nukundanduranyia muvidonye;
ma niyandeka.
12Yinaminya uvuta vwivwe kandi niyetegeka kundasa
nimivano ju vuta vwivwe.
13Yatooza mu muviri gwange
nimivano juvuta kutura mukilungu chiche.
14Inzi ndagwa ichokosekeliza icha avandu vange vosi;
lidiku liosi vahenyahenyaa kunyi muzinyimbu.
15Yanwehiza amazi malulu kuzingulu,
kandi ninzigutiza niviukulia kandi niviukunwa vilulu.
16Umali kuvunanyia amiinu gange namagina gizigongodo;
kandi umali kunduvaganyira muluguchi.
17Inzi kumali kwimwa murembe;
inzi kumali kwivilira chuvusangari voveeye.
18Kunangwa mboraa, “Uvukumi vwange
kandi viosi nilisuuvirizwa liange vwagota.”
19Liganagana kigira lidambizwa liange niligendagenda liange,
liveeye isumu induru.
20Mwoyo gwange guganagana kugo vuli ing'inga ma kodedekera.
21Nitali mbezaa nilisuuvirizwa
lwa nzizuliza kindu kilala yiki:
22Uvuyanzi vwa Yahova vutaveeye nekeheri,
zimbavasi zizie siziveeye ni keheri mba;
23voveeye vuhia vuli mugamba;
vusuvirifu vwivwe voveeye vonene ligali.
24Inzi mwene mboraa, Yahova aveeye kidieli change
kunangwa ndaasuuvira muye.
25Yahova aveeye mulahi ku yavo vosi avaviika lisuuvirizwa liavo muye,
ku oyo umwenyelerizaa.
26Voveeye vulahi umundu kulindilira machiriri ovohonyi vwa Yahova.
27Voveeye vulahi umundu kwizuliza lwa akikiri musoleri.
28Leka yikare yeng'ine machiriri,
lwa Yahova amali kumuviika mulisalirizwa.
29Gamudukira yikuzili mu lisalilizwa,
navutswa lisuuvirizwa linyala kuva ho.
30Leka ahaane lusaya lwilwe ku mulala unyala kumukuya,
kandi leka ave mulilegwa.
31Yahova aveeye uwi zimbavasi siasuraa avandu mihiga ni mihiga mba.
32Kali niiva aletaa ovovereri, alamanyia,
uvuyanzi vwivwe kukuinyi voveeye vwi ligali
kandi uvwizingulu ligali.
33Siasangaliraa mulikokola kove nilisalirizwa anoho uvuzunu mba.
34Yahova yamanya lwi mioyo jietu jisionolonyiywi mu ijera;
35Amanya lwa vasuura kokokolera gaduukanaa kokolelwi.
36Yahova yamanya lwi likalaga lirungi lichaminywa mu kiyaalo.
37Nivwaha unyala kulaga ma chekoleke niiva Yahova sialagi?
38Malahi na madamanu gekolekaa kigira lilaga lilie.
39Kigira ki umundu oveeye mwoyo yilirira
lwa ahevwa amageri kigira uvwoni vwivwe?
40Leki kogelizi kandi kwehenzelizi zinzira zietu,
kandi kwirane ku Yahova!
41Gendi kuzie ku Nyasaye wu mwigulu ma kusaale kovoole:
42“Kunyi kumali kokora uvwoni nukwibaala, na ivi,
O, Yahova, siukusamihi mba.
43“Ivi umali kwikunika nu vutima kandi okolondeleye;
umali kwiita vugira livererera.
44Ivi umali kwikunika nililesi liliduhu
kunangwa lisaala lietu silinyala kuhulika kuive mba.
45Ivi umali kokokola kuva vindu videdekere viasurwa
hagati ha vandu vandi.
46“Avasigu viitu vosi vakonyega nokokokolera kehenyahenye.
47Kwadivizwa ma kwatigara amang'anye;
komenyaa muvuhimwa nuvuti.
48Amaliga gidorokaa muzimoni zietu
kigira vandu viitu vamali kudivizwa.
49“Amaliga giitu galidoloka kandi vugira kolekera.
50Kuduuka lwa Yahova ahenza hasi kutura mwigulu ma akolole.
51Mioyo jietu jivereraa lwa kolola agaamali
kwekoleka ku avakali vu mu lidaala linene.
52“Kumali kugumirwa kuli linyonyi na yavo
avaveeye avasigu viitu vugira kivuni.
53Vasiuva muvogo nimbeeye mwoyo
kandi nivangunikira mu ni ligina.
54Amazi gatanga kungunika,
kandi ndaasuuvira ndi likuza liveeye ahimbi.
55“O, Yahova, inzi ndanira ivi kutura musi mwuvogo.
56Kandi lwa ndakogonya uhuliri lianira liange, ivi wahulira.
57Ivi waza ahimbi lwandakwanira kandi novoora, ‘Utatia mba.’
58“O, Yahova, ivi waza kosoola,
kandi nohonyia livamwoyo liange.
59O, Yahova, ivi umali kolola madamanu gavangolela;
kalaga muliyaanzilira liange.
60Ivi wamanya kuli vasigu vange vakuvihiriliza
kandi kuli vandohizira amadamanu mu vwivisu kundiviza.
61“O, Yahova, umali kuhulira nivanyegaa;
ivi wamanya lilohiza liavo liu muvwivisu.
62Vamoloma kuinzi lidiku liosi nokolomba
lilohiza liavo liumuvwivisu kunzita.
63Vaheenze! Mulikala anoho mulisingira liavo
vambenyahenyera mu zinyimbu ziavo.
64“O, Yahova, uvahe amageri ku agavamali kokora.
65Ivi ulavakola vakuzi mwoyo;
kilaamo chicho kilava kuvo.
66O, Yahova, kutura hasi mulirova liilio
uvalondelele muvutima vuvwo nukuvadiviza.”
©Bible Society of Kenya, 2019