LISIOMA LIA JEREMIA 2
2
Amageri ga Yahova ku Jerusalemi
1Yahova amali yakunika avandu va Jerusalemi
ni kisundi mu vutima vwivwe.
Yaagirung'anyi uvukumi vwa Jerusalemi
kugwa mang'anye kulirova.
Si yizuliza Litembeli lilie lidiku liu vutima vwivwe mba.
2Yahova amali kudiviza visukululwi via Yakobo viosi vugira livererera.
Mu vutima vwivwe, amali kuvunanyia
zimbinga zie lidaala lie Ivuyuda;
yikiza uluyali lwu vwami harara na vamiihi
vavwo nukuvaviika mu zisoni.
3Yatulizaho zinguru zia vandu va
Isiraeli mu vutima vwivwe uvululu.
Yaatuliza vokonyi vwivwe kuvo
imbiri wa vasigu vaavo.
Yasamba visukululwi va Yakobo
nolomemo lwu muliru, nukudiviza ivindu viosi.
4Yanyira uvuta vwivwe kukuinyi kuli avasigu:
Yayita vandu viitu vosi avaari vusangali nu vuyanzi vwitu.
Hano mu Jerusalemi kwahulira vutima vwivwe uvululu uvusambaa.
5Yahova amali kudiviza Isiraeli kuli umusigu.
Yadiviza kali zinyumba ziu uvwami vwavo
kandi zimbinga zie lidaala linene ziatigala mang'anye.
Yameda ku vandu vi Ivuyuda
lisioma kandi liverera linyingi.
6Yasambula havundu haavo hokomenya hatigala kuli mulimi,
kandi yakola havundu haavo havatovola hukuvuganira kuva amang'anye.
Yamali koheriza lidiku liavo lie lisavo
kandi lisabato mu Ziyoni;
yamali kuviika vutima vwivwe vululu ku avami
kandi avasaalisi.
7Yahova amali kusura uvwali vwivwe kandi yamala koleka Litembeli lilie Litakatifu;
yaleka avasigu kusambula madigi gi zinyumba ziavo ziu vwami.
Vahaanzuka nokokola liyoga mu Litembeli kuli lidiku lie lisavo.
8Yahova amali kusaavira kusambula madigi gi lidaala lia Ziyoni.
Yavika kimanyiru kolola ndi amadigi goosi gadiviziywi.
Minaara harara na madigi, kalunu vitigaye mang'anye.
9Virivwa vie lidaala linene lia Ziyoni via sikira hasi mumarova,
kandi miluguyu javio jaavunika mu vidonye.
Umwami kandi avandu vwi inyumba yu vwami kalunu vaveeye hagati hi zihiiri
mu kivala chi lihaminywa,
wi lilaga litaveeye.
Avaporofeti si vaveeye na malola kutura ku Yahova kandi mba.
10Avakulundu va Ziyoni viikara hasi ni vachiring'ani machiriri,
niviiyuhiyi uluguchi ku mitwi jaavo
kandi viviki zinguvu zia magunia.
Avakaana va Jerusalemi vinaminyi mitwi jaavo hasi.
11Zimoni zietu ziiluhi kigira lisioma,
mioyo jiitu jizuuyi ovovereri;
koveeye novovereri vunyingi
kigira lidivizwa lia vandu viitu.
Avana kandi zindanya vakuziraa kuzinzira zie lidaala linene.
12Vateva avamama vaavo ndi,
“Viukulia ni iwaini viveeye haliha?”
Vakuza kuli avandu vatozeywi
muzinzira zie lidaala linene.
Vakuza galaha ku magulu ga vamama vaavo.
13O, munyi avandu va Jerusalemi,
inzi nyara kovora ki ku munyi?
Nyara kumufananyia na kindiki?
O, munyi avandu va Ziyoni, inzi
nyara kumuleng'anyia na kindiki
kunangwa nduuki kumuleminya mwoyo?
Lidivizwa lienyu liveeye linene ligali kuli inyanza nene.
Nivwaha unyala kumuhonyia?
14Avaporofeti vinyu vaamugada na malola gataali gagiligali;
mu voporofeti vwavo,
si vavoola havulavu uvwoni vwinyu kunangwa muduuki kwiranya miandu jinyu mba,
navuzwa vaamuvolera malola gataali
gagiligali kandi gu kuvachaminya.
15Avandu vosi avavitaa ahimbi ni lidaala linene vamuhenza
nu kumukolera kehenyahenye.
Vasung'usa mitwi jaavo no kosekaa amang'anye ga Jerusalemi ni vavoola,
“Yili ni nilo lidaala linene ilialangwa
uvudukiru vwu vulahi kandi
uvusangari vwi lirova liosi?”
16Avasigu vinyu vosi vamunyega;
vamusekerizaa nokodedeyiza amiinu gaavo nivalira nivavoora,
“Kumali kulidiviza!
Aha, yili ni lidiku lia kwalindilira,
kalunu liduuki kandi kuliloli!”
17Yahova amali kokora aga yatihiza, kuduukiza.
Amali kudiviza vugira kokovererera
kuli yaakwiganihiza zing'inga zia kale.
Yaaha avasigu viitu liguuta
kandi yavakoli kusangalira liigwa lietu.
18O, munyi avandu va jerusalemi,
mwaniri vudinyu ku Yahova!
Muleke maliga ginyu gituruki
kuli mugera vudiku nu mbasu!
Muzizagiliri kwanira ku Yahova,
kandi maliga gazizagiliri kwituruka!
19Muvuki mwaniri ku Yahova vudiku vwosi kandi mugambazuri!
Muviiki mioyo jinyu imbiri wa Yahova kuli amazi gaviikwa mu kiju.
Mugiingi makono ginyu igulu na musaale ku Yahova kigira livamwoyo lia vana vinyu,
avakuzaa kigira inzara mu zinzira zie lidaala linene.
20Muporofeti avoora: O, Yahova, henza na uganagane!
Nivwaha wa ivi wakolera ku yaga?
Avakali vanyara kulia lwivulu lwi
zinda ziavo, avana va valinda aveene?
Musaalisi kandi muporofeti vanyara
kwitirwa mu Litembeli lia Yahova?
21Avasoleri kandi avasaakulu vaagoni avakuzu
mu luguchi lwa madaala manene.
Avayaayi kandi avakaana vamali
kwitwa ni vivavi via vasigu.
Ivi wavita mulidiku liilio liu vutima;
umali kuvasinza vugira kuvavererera.
22Kuli ulaga ku lidiku lie lisavo,
nindio umali kulagila kunyi
avasigu ku zimbega ziosi.
Si yaliho nu mundu kali mulala
uwahononoka anoho uwahona
mulidiku liilio liu vutima mba.
Avasigu viitu vaadiviza
avana va kwayaanza kandi ni kuvirukiza.
©Bible Society of Kenya, 2019