JOELI 3
3
Nyasaye Alakakaragiri Izihiiri
1Yahova avoora,
“Mu ing'inga yeyo ndiranyia
vutugi vwi Ivuyuda na Jerusalemi.
2Ndavungiza zihiiri ziosi harara
kandi ndazireta mu livona lia Jehoshafati liukukalagilwa.
Hene yaho ndaavakalagira ku goosi agavakolera vandu vange.
Vasalanyia Isiraeli muvivala vigeni
kandi vagavulanyia Isiraeli, kivala change.
3Vakuba ikura yokotovola oyo uvugura avahambe.
Vaguliza avayaayi na vakana vinyu kuva avatugwa
kutuunga vuguli vwa malaya ni iwaini.
4“Mugerizaa kongolera kindu ki munyi avandu va Tiro, Sidoni na vandu vosi va Filisitia? Munyi mugerizaa kumbanza kisaalia? Nimukora ndio, ndiranyia kisaalia ku munyi vwangu! 5Mwavugula ifeza nizahabu yange kandi mwaginga uvutugi vwange vwamavikiru nimuhila mu matemberi ginyu. 6Mwavugula vandu vi Ivuyuda na Jerusalemi nimuvahila ihale kutura mu kivala chavo nukuvaguliza ku Avagureki. 7Kalunu ndavaleta kutura havundu ha mwavaguliza. Na ndamukolera ligali kuli mwavakolera. 8Ndaleka vayaayi vinyu na vakana vinyu vagulizwi ku vandu vi Ivuyuda; valagulizwa ihale wa Sabeanzi. Inzi, Yahova, mali kovora.
9“Uhaane lilandiza yili ku zihiiri:
‘Mwetegeke vulwani;
mulange avasikari vinyu vuvulwani;
muvungizi avasikari vinyu harara na mutange ologendo!
10Muturi magembe ginyu gave kuli vivavi
ni zingonono zienyu zigwi amatimu.
Muleke avadedekere vavoole, koveeye avuvulwani.
11Muuzi vwangu, Munyi vandu vosi avizihiiri ziahimbi,
kandi mwivungize mu livona.’ ”
O, Yahova, tuma amahi googo guvulwani gavingiliri.
12“Zihiiri kuduuka zietegeke kandi ziizi mulivoona lie likalaga.
Hene yaho, inzi Yahova, ndikala nukukalagira zihiiri ziosi ziahimbi.
13Ziveeye ziu vuchamu ligali,
ndazitemagira hasi kuli vuswage mu ing'inga yiligesa;
ndazishonolanyia kuli mizabibu jishonolanywa mulimiina lie iwaini yizuuye duu.”
14Zihiiri zielefu ni zielefu ziveeye mulivoona liukukalaga.
Ni hene yaho ahilidiku lia Yahova liizira vwangu.
15Liuva nu mweli vilava kisundi,
zing'ereng'ani sizirang'ereng'ana kandi mba.
Nyasaye Alakagasizi Avandu Veve
16Yahova ahuumaa kutura mu kiguru cha Ziyoni;
mwoyo gwigwe gwatuluruka kutura mu Jerusalemi;
lirova ni ligulu videgera.
Navuzwa alakinga vandu veve.
17“Maku, munyi Isiraeli mulamanya ndi inzi mbeeye Yahova Nyasaye winyu.
Menyaa mu Ziyoni, kiguru change Kitakatifu.
Jerusalemi lilava lidaala Litakatifu;
avageni sivalaliguuta kandi mba.
18“Ku ing'inga yeyo, vigulu vilakunikwa ni milimi jimizabibu,
kandi mitugu jilanyooleka kuvuli kiguru;
mazi galavaho manyingi mumigera josi ji Ivuyuda.
Mugera gulituluka kutura mu Litembeli lia Yahova,
na gulasama livona lia Shitimu#3:18 Shitimu: Livona lia Shitimu anoho livona lia Akasia..
19“Egebeti kilava kivala chi changalangwi,
kandi Edomu kilava kivala chu mwigendinyama,
kigira vingilira vandu vi Ivuyuda
kandi ni vita vandu vacho avataali nimbala.
20Navuzwa avandu valamenya Ivuyuda mihiga ni mihiga
na Jerusalemi lilavaho ku makura goosi.
21Inzi ndatungiza kisaalia kigira yavo avamala kwitwa,
kandi sindatulizaho mahiolo gaavo mba,
kigira inzi Yahova menyaa mu Ziyoni.”
©Bible Society of Kenya, 2019