JOELI 2
2
Zisigi Kuli lieganihiza ku Lidiku lia Yahova
1Kuba kisiriva; kuba ulwanga ku avandu va Ziyoni, kiguru cha Nyasaye Kitakatifu. Mudegere, avandu vi Ivuyuda! Kigira lidiku lia Yahova lizaa vwangu.
2Na live lidiku lie kisundi kandi liovovereri,
lidiku lia malesi kandi kisundi kenene.
Zisigi zinyingi ziza kuli kisundi kenene kufumaa vigulu.
Sihaalikuho ni kindu kuli yiki mba,
kandi sikilivaho mba.
3Ziliizaa vitagwa kuli muliru.
Imbiri wazio kivala keveeye kuli mulimi gwa Edeni,
navuzwa inyima wazio keveeye ichangalangwi kigumba.
Sikeveho kinyala kohononoka mba.
4Zihenza kuli zibarasi;
zinyagula kuli zibarasi ziu vulwani.
5Lwa zitumatuma ku zindongozi zie vigulu, zinyagura kuli muliviti gwa magare gu vulwani;
zihumaa kuli vulimu vwumu vusambwa.
Zilomba zimbaso kuli amahi manene gu vulwani getegeki kulwana.
6Lwa ziesunda himbi, vuli mundu atizaa;
mumoni mwosi mugirung'anaa mamubuhera.
7Zingiliraa kuli avasikari vu vulwani; zinina kumadigi kuli vasikari.
Ziosi zigenda ma zizia imbiri na sizigirung'ana nu
8kuzia kunzira yizindi mba.
Zivitira mu viugi viukukinga,
navuzwa kindu sikiziigalira mba.
9Ziziza vwangu nukutulira lidaala linene;
zinyagulira ku madigi;
zinina igulu ku zinyumba nukwingilira mumadirisia kuli aviivi.
10Lirova lidegera imbiri wazio; ligulu lidegera.
Liuva nu mweli vimwaminyiywi,
zing'ereng'ani sizing'ereng'ana kandi mba.
11Yahova ahaanaa malago ku avasikari veve.
Amahi gu vulwani agamuhuliraa gaveeye manyingi kandi agizingulu.
O, lidiku lia Yahova liveeye liukutihiza ligali!
Ivwaha ulihononoka kulio?
Mulango Kigira Lieganira
12Yahova avoora, “Navuzwa kali kalunu mwiganiri
mugiligali na mwirane ku inzi mu lihonga lilia,
lilira ni lisioma.
13Leka mwoyo gugwo gwiliegehiza gumanyie ovovereri;
kutandura zinguvu zienyu sigadukira mba.”
Mwirane ku Yahova Nyasaye winyu.
Aveeye wilivererera ligali kandi wizura zimbavasi;
aveeye umwikuziri kandi lilagana lilie;
aveeye mwetegeku inyinga yoosi kusamiha nukuvula kuhana amageri.
14Nimutia Yahova Nyasaye winyu alagirung'anyia
zing'anagani zizie na amugasizi nivitagwa vinyingi.
Kunangwa mulava nu vuswage ni iwaini yukuhaana isadaka kuye.
15Mukubi kisiriva ku kiguru cha Ziyoni;
muhaane lilago lio kohonga lilia na mulange livugana!
16Vungiza vandu harara;
uvetegekize kulivugana litakatifu;
oleete avakulundu;
vungiza avana kandi nizindanya.
Kali aviha vaserereywi valeke zinyumba ziavo vaze.
17Avasaalisi avatumikiri va Yahova hagati hu vwali
kandi nuvwingiliru vwi Litembeli,
kuduuka valiri, vasaale na vavoole:
“Yahova, overerere avandu vovo.
Utaleka izihiiri zindi zikulege nokokokolera kehenyahenye nokovoora,
‘Aveeye hayi Nyasaye winyu?’ ”
Nyasaye Yiranyia Ovonolu mu Milimi
18Kunangwa Yahova yavererela kivala chiche;
yaali ni zimbavasi ku vandu veve.
19Yavativulira:
“Kalunu ndamuha vuswage,
iwaini na maguta ga muzeituni,
na muliigutizwa ligali.
Zihiiri zindi siziramulegeriza kandi mba.
20Ndatulizaho Zisigi zinyingi ziatula
ivaale ndakunga zindala kuzio kuzia mu changalangwi.
Zisigi iziezidaraja ziembiri zilakungwa kuzia mu inyanza yi jumbi,
zidaraja ziazio zitahulirika ligali mu Meditareniani mba.
Imiviri jiazio mikuzu jilafunya vugundu.
Ndazidiviza kigira goosi agazimali kumukolera.
21“Milimi, mutatia mba,
navuzwa musangare kandi muyanze
kigira goosi aga Yahova amali kumukolera.
22Zinyama, mutatia mba.
Uvwayiru vusivuki;
misaala jamaa makuyu gajo,
mikuyu na mizabibu jiveeye ho muvunyingi.
23“Muyanze, avandu va Jerusalemi
musangare ku aga Yahova Nyasaye winyu amali kumukolera.
Umuheeye imbura induukiru mu ing'inga yi litaga;
amukubiziiyi imbura yu vukindu kandi imbura yi limera kuli zing'inga ziavita.
24Oloze lulizura vuswage;
amaliina gukuminira mu iwaini
na maguta ga Muzeituni ga liizula.
25Ndamwiranyira via mwagotiza ku mihiga je kiduma chi zisigi lwa zialia vitagwa vienyu.
Yaali inzi uwatuma amahi gu vulwani kumwingilira.
26Kalunu murava ni viukulia muvunyingi,
kandi muliiguta.
Mulizominya Yahova Nyasaye winyu,
uwamukolera vindu viokogenyia.
Avandu vange sivalachaywa kandi mba.
27Maku, Isiraeli, mulamanya ndi inzi mbeeye harara ni munyi,
kandi inzi, Yahova, mbeeye Nyasaye winyu,
kandi siaveeyeho na Nyasaye wundi mba.
Na vandu vange sivalachaywa kandi mba.
Lidiku lia Yahova
28“Lwinyima ndaleta Roho wange ku avandu vosi:
avana vinyu vayaayi na vakana valaporofeta
avakulundu vinyu valalota amalooto,
kandi vasoleri vinyu valalola malola.
29Ku ing'inga yeyo ndavika Roho wange kali ku avatugwa,
vasaza na vakali harara.
30“Ndakahaana lieganihiza lie lidiku yilio mumalesi kandi ku lirova;
naliveho litahiza lia masahi, muliru, kandi malesi gu mwoki.
31Liuva lilamwaminywa,
kandi mweli gulava mwakanyu kuli masahi lidiku linene
liukutihiza lia Yahova likikiri kuduuka.
32Navuzwa vosi avaaniraa Yahova, valahonywe.
Kuli Yahova yavoola
‘Avalala mu Jerusalemi valahononoke;
yavo avandatovola valahone.’ ”
©Bible Society of Kenya, 2019