YAKOBO 2

1Avaamitu vange, kuli avasuuviri mu Mwami wiitu Yeso Kristo, oveeye Mwami wu vukumi, mutayanzilira avandu kolondekana ku ligondo liavo mba. 2Niiva umundu mutugi wiviki imingiri yi zahabu ni zinguvu zindahi zinzesereru, yingira mu livugana lienyu, kandi ahene yaho, mundu oveeye mudaka uwiviiki amadali naye kandi yingira, 3niiva mulahaana uluyali ligali ku uyu uwiviiki inguvu indahi na mumuvolere, “Hamba wikale ahalahi hano,” navuzwa muvoolere umudaka, “Ivi, singira yira,” anoho “Yikala hasi ha virenge viange” 4ahene yaho muteeti liavukana hagati hinyu, kandi mumali kolomba likalaga kutura ku zing'anagani zindamanu.

5Muhuliri, avaamitu vange avayaanze! Nyasaye yatovola avadaka vu mukivala vave avatugi mu lisuuvira, kandi vanyoore vwami vwa yasuuviriza yavo ava muyanzaa. 6Navuzwa munyi muchayaa avadaka! Vatugi nivo vamudambizaa kandi vamuhira mu viyaalo imbiri wa avakalagi. Avatugi! 7Yava nivo avanyegaa lieta lilahi lia mumali koheevwa.

8Mulava ni mukoraa vulahi niiva mutia lilaga liu vwami kuli Amang'oda Matakatifu gavoora, “Uyaanze umutende woovo kuli wiyanza umwene.” 9Navuzwa niiva mukolera avandu kolondekana ni ligondo liavo, mukoraa uvwoni, kandi lilaga limukalagiraa kuli muveeye avavunanyie vi Lilaga. 10Mundu woosi uvunaga lilago lilala, umali kuvunaga amalago goosi.

11Oyo uwavoola, “Utaheya mba,” yavoola kandi, “Utiita mba.” Kulwayago, kali nuvula koheya, navuzwa ni wita, ivi umali kuvunaga amalago. 12Mumolome, kandi mukore kuli avandu avalikalagirwa ni lilaga ilikovoholoraa. 13Nyasaye sialimanyia livererera lwa alikalagira umundu uyu uwavula kuva ni zimbavasi; navuzwa zimbavasi ziveeye ni liguuta ku likalaga.

Lisuuvira ni vikolwa

14Avaamitu vange, gakonyaa ki umundu navoora aveeye ni lisuuvira, navuzwa ivikolwa vivie sivilolekizaa ndio? Lisuuvira yilio linyala kumuhonyia? 15Niiva vaveeye ho avamwavo anoho avavozwa avaveeye chahonyo kandi sivaveeye ni iviukulia via kase, 16niiva mulala ku munyi avavoolera, “Nyasaye avagasize! Munyore uluuya kandi mulie vulahi mwiguti!” Niiva simuvaheeye ivindu ividukanaa ni livamwoyo? 17Kunangwa gaveeye ndio ni lisuuvira: niiva liveeye lisuuvira litalondekanaa ni vikolwa, hene yaho liakuza.

18Navuzwa mulala alavoora, “Umundu mulala aveeye ni lisuuvira, nu wundi aveeye ni likora.” Manyia kuli mulala anyala kuva ni lisuuvira vugira ivikolwa, ninzi ndakumanyia lisuuvira liange ku vikolwa viange. 19Usuviraa Nyasaye aveeye mulala yenyine? Vulahi! Amademoni nago kandi gasuuviraa ni gadegeraa nu vuti.

20Umusiru ivi! Wenyaa umanywe ndi lisuuvira vugira ivikolwa liakuza? 21Aburahamu guuga wiitu, yakolwa ndi umulungi ku Nyasaye? Gaali kuvitira mu vikolwa vivie lwa yahaana Isaka umwana weve ku vwali? 22Ivi si olola? Lisuuvira lia Aburahamu ni vikolwa vivie viayinzira harara. Lisuuvira lilie liakolwa liduukiru kuvitira mu vikolwa. 23Mang'oda Matakatifu gaduukizwa agavoora ndi, “Aburahamu yasuuvira Nyasaye, kandi kigira lisuuvira, Nyasaye yamuvugilira kuva umulungi.” Kandi ya langwa umulina wa Nyasaye. 24Kunangwa muloraa, gaveeye kigira ivikolwa vivie umundu akolwaa umulungi imbiri wa Nyasaye na sigaveeye kigira lisuuvira lienyine mba.

25Gaali malala mere na Rahabu uwaali liraya. Yakolwa kuva umulungi imbiri wa Nyasaye kuvitira mu vikolwa vivie, kigira yingiriza avatunyirizi va Isiraeli kandi naavakonya virukiri kunzira yindi?

26Kunangwa, kuli umuviri vugira umwoyo gwakuzi, kandi ndio, lisuuvira vugira vikolwa liakuza.

Kutuga Lulimi

Currently Selected:

YAKOBO 2: LOGOOLI

Highlight

Copy

Compare