YAKOBO 1

1Inzi Yakobo, Mutumikiri wa Nyasaye kandi wu Mwami Yeso Kristo: Nduma mirembe jange ku munyi, zihiiri likomi na ziviri zia avasalanywa mu kivala choosi.

Lisuuvira kandi ovogeri

2Avaamitu vange, mwiganagane aveene kuva nu vusangali, lwa amagerizu zing'ano ziosi gaaza ku munyi. 3Mumanya vulahi ndi ligerizwa lie lisuuvira lienyu liletaa uvwikuziri. 4Mulole ndi uvwikuziri vwinyu vokoli miyinzi javwo midukiru, kunangwa muduuki kuviruka kandi muve avadukiru, vugira kudaka ikindu ku viosi. 5Navuzwa niiva mulala ku munyi adaka ovogeri gamudukira asaale ku Nyasaye, uhaanaa nu mwoyo gwosi kandi ni zimbavasi ziosi ku avandu vosi. 6Navuzwa lwa usaala, kuduuka usuuviri kandi utahayahaya mba. Mundu uhayahayiza aveeye kuli kiguvuli munyanza kisugumwa kandi kihunzulanywa yiyi na yiyi nimbuuza. 7Umundu kuli uyu ataganagana ndi alanyoola ikindu kutura ku Mwami mba. 8Aveeye umundu wi zing'anagani ziavukani kandi utaveeye nilietulira mu vindu viosi viakola.

Uvudaka nu vutugi

9Mukristayo oveeye mudaka asangale lwa Nyasaye amunenehizaa. 10Navuzwa Mukristayo oveeye mutugi kuduuka asangale lwa Nyasaye amugehizaa kigira mutugi alakatulizwi ho kuli ikimuli chi kitagwa chumbulimu. 11Liuva litongaa harara nu vuhiu vwalio vululu kandi lisaamba nu kwuminya vulimu. Ikimuli chavwo kivungulukaa nuvulahi vwacho vudivizwa. Munzira ndala nzere, mutugi alakadivizwi lwazizagilira ni miyinzi jije.

Amagerizu ni ligerizwa

12Aveeye nu vugasu umundu wikuziraa mu ligerizwa, kigira lwamali kuguuta nu kuvita ligerizwa kuli yili anyoora itaji yi livamwoyo lia Nyasaye yasuuviriza yavo vosi avamuyanzaa. 13Mundu naava naagerizwa na magerizu lugano yilu atavoola, “Nyasaye angerizaa.” Nyasaye mwene sianyala kogerizwa nuvudamanu kandi sianyala kogeriza umundu woosi mba. 14Navuzwa umundu sa mulala agerizwa lwahilwaa no kotegwa ni likayirwa lidamanu lilie umwene. 15Maku likayirwa lilie lidamanu zana yilio liverekaa ma liivula uvwoni, nuvwoni lwa vumala kuviruka, vwivulanga likuza.

16Avaamitu vange avayaanze, mutagadwa mba! 17Vuli kihanwa kilahi kandi vuli kihanwa kidukiru kitulaa mwigulu; chikaa hasi kutura ku Nyasaye, umulombi wu vulavu vwu mwigulu, utagirung'anywa anoho koleta ikisundi ligirung'ana. 18Ku vulaliri vwivwe umwene, yakoleta mu livamwoyo kuvitira mu likuva lie ligali, kunangwa kuduuki kuva kuli amakuyu gu kutanga hagati hi ivilombe vivie.

Lihulira kandi likora

19Avaamitu vange avayaanze, mwizurizi likuva yili! Umundu sa mulala ave umwangu kuhuliriza, navuzwa ave wagalaha ku limoloma, kandi uwa galaha ku liiva nu vutima. 20Uvutima vwu umundu sivuduukaa kulienya lia Nyasaye iliveeye uvulungi mba. 21Kigira yaga, mutuliziho vudamanu vwosi kandi imiima josi imidamanu. Mwegehizi ku Nyasaye kandi muvugiliri likuva lia viikwa mumioyo jinyu, ilinyala kumuhonyia.

22Muve avakoli vi likuva, mutava avahuliri vuzwa ni mwigada aveene mba. 23Umu ndu oveeye muhuliri wi likuva, navuzwa sialiviika mu ivikolwa, aveeye kuli umundu wehenzeranga mu cherolero ma yeelola mu moni mwimwe kuli afaanaa.

24Yehenzaa umwene vulahi, ma lwa atulaa ho, nonoho yivilira kuli aveeye. 25Navuzwa umundu ohenzaa vudinyu ku amalago amadukiru agahaanaa ovovoholore ku avandu, oyo ugalondaa kandi utaveeye muhuliri ma vivilira, navuzwa agaviikaa mu vikolwa, mundu uyu, Nyasaye alamugasiza ku vindu viosi.

26Niiva umundu yiganagana aveeye wi lisuuvira, naye natalinda makuva geege, yigadaa mwene, lisuuvira liu mundu uyu ni liavuzwa. 27Lisuuvira lilahi litaveeye nu vudamanu imbiri wa Nyasaye Baba wiitu ni yili: kokonya avavisandu na vakunzakali mu likuba ikivi liavo, nu kwilinda ligali umwene avuli kwononywa ni ivindu vie kivala.

Lieganihiza ku lieriza

Currently Selected:

YAKOBO 1: LOGOOLI

Highlight

Copy

Compare