ISAYA 62
62
1Inzi si ndachiring'ana kigira avandu va Ziyoni mba,
kandi si ndasosa kigira Jerusalemi mba;
kuduuka uvulungi vwivwe vong'ereng'ane kuli uvulavu vwa mugambazuri,
kandi ovohonyi vwivwe vove kuli itaya yaka mu vudiku.
2Zihiiri ziosi zilarora uvulungi vwinyu O, Jerusalemi,
kandi avami vosi valalola uvukumi vwinyu.
Kandi mulagulikwa lieta lihia,
ilieta litula ku Yahova mwene.
3Mulava kuli igudwa indahi mu mukono gwa Yahova,
kandi kuli itaji yu vwami mumukono gwa Nyasaye winyu.
4Simulalangwa kandi, “Azuba,” liveeye kovora “Avandu valekwa”
anoho kivala chiinyu si kilalangwa “Shemama” liveeye kovora “Mukali walekwa.”
Navuzwa mulalangwa “Hefiziba” - liveeye kovora
“Uvusangari vwa Nyasaye voveeye mu munyi.”
Kivala chiinyu kilalangwa;
“Beula” - liveeye kovora - “Wakwevwa.”
Yahova asangalira munyi,
kandi mulava kuli musaza mu kivala chiinyu.
5Nyasaye alasangalira munyi kuli muyaayi asangalira mwiha wa asereraa,
kandi kuli mwiha asangalira muyaayi wa aselerangwa ku.
6O, Jerusalemi, mali kuviika avasikari ku amadigi giinyu.
Si valachiring'ana mu muvasu gwosi kandi mu vudiku vwosi mba.
Munyi avizulizaa Yahova, mutaleka amwiviliri mba.
7Mutahaana vwiyangu ku Yahova kuduuka asingirize lidaala linene lia Jerusalemi
kandi alilombe live lidaala lizominywa mu kivala choosi.
8Yahova umali kwisuuha nu mukono gwigwe mulungi kandi ku zinguru zizie ndi,
“Inzi si ndahaana uvuswage vwinyu kuva chukulia ku vasigu vinyu mba,
kandi avageni si valanwa iwaini yinyu mba.
9Navuzwa munyi avamiiza uvuswage kandi ni mugesa,
mulalia nu kwizominya Yahova;
Kandi yavo avalindaa nu kuvungiza amazabibu,
valanwa iwaini yago mu mugizi gwi Litembeli liange Litakatifu.”
10Munyi avandu va Jerusalemi, muzie mu lidaala linene
mulombe inzira ku vandu vinyu avilanaa!
Mwetegekize inzira enene, mutulizi amagina muyo!
Mugiingi ebendera kuva kuli ekelolero,
kunangwa zihiiri ziduuki kumanya;
11Yahova alandizaa ku vandu vosi vi lirova ndi:
“Muvoolere avandu va Jerusalemi, ndi Yahova yazaa kumuhonyia,
kandi alaza harara na vandu va yamala kosoola.”
12Mulalangwa, “Avandu va Nyasaye Avatakatifu”,
“Avandu va Nyasaye amali kohonyia.”
Jerusalemi ilalangwa, “Lidaala linene lia Nyasaye ayaanza”,
“Lidaala linene lia Nyasaye yavula koleka.”
©Bible Society of Kenya, 2019