ISAYA 61
61
Amakuva Malahi Govohonyi
1Roho wa Yahova Nyasaye aveeye harara na inzi,
kigira umali kondovola kandi kunduma;
kwilwaza makuva amalahi go vohonyi ku vadaka,
kwahila nokohonyia mioyo jiveeye midedekere,
kandi nduuki kulandiza ovovoholore ku avahambe,
kandi kulandizira avavofwa vaduuki kovoholorwa.
2Yaanduma kwilwaza ndi, ing'inga imali kuduuka,
lwa Yahova ahonyia avandu veve,
kandi alaguuta avasigu veve.
Yaanduma koleminya mioyo ja yavo vosi avasioma.
3Yahova yanduma kuhaana uvusangari kandi uvuyanzi havogono hi lisioma,
ku yavo avaveeye mu Ziyoni.
Kandi kuhaana lwimbu lwu kwizominya havogono hovoveleri.
Valava kuli misaala ja Yahova mwene umali kusimika,
vaduuki kokora agaveeye amalungi;
kandi vaduuki kwizominya Nyasaye kugoosi agaamali kuvakolera.
4Valumbaka uvuhia madaala manene gi vianyi agasasuguka ku zing'inga zinyingi.
5Avageni valamutumikira kandi valaya nu kulinda chayo chiinyu,
kandi valalima milimi jinyu,
nu kulinda milimi jinyu jie mizabibu.
6Navuzwa munyi mulalangwa avasaalisi va Yahova,
avatumikiri va Nyasaye wiitu.
Mulalia nu kusangalira uvutugi vwi zihiiri,
kandi nu kwiyizominya nokovoora ndi uvutugi yivu voveeye uvwinyu.
7Zisoni zienyu ziduuki ku keheri.
Munyi namumenye mukivala chiinyu aveene,
kandi uvuhinda vwinyu vulamedeka;
kandi mulava nu vusangali mihiga ni mihiga.
8Yahova avoora,
“Inzi ndayaanza likalaga liu vulungi,
kandi ndunyiraa likora uvudamanu
ndahaana amadanyi ku avandu vange mu vusuuvirifu.
ndaalomba lilagana liange navo lie mihiga ni mihiga.
9Visukululwi viavo vilamanyikana hagati hi zihiiri ziosi,
na vuli mundu woosi uvalola alamanya ndi,
vaveeye avandu va inzi mali kugasiza.”
10Avandu va Jerusalemi vasangala kigira aga Yahova amali kokora.
vaveeye kuli mwiha yiviiki kigira keserero chiche.
Nyasaye yamukunika novohonyi kandi nuvuguuti.
11Kuli ivitagwa vitomboka ma viviruka,
Yahova Nyasaye alaleeta uvulungi kandi lizominywa imbiri
Mwami Munene Yahova alahonyia avandu veve,
kandi zihiiri ziosi zilamwizominya.
©Bible Society of Kenya, 2019