ISAYA 50
50
Zinguru zia Yahova ku lihaana amageri
1Yahova avoora,
“Muganaganaa ndakunga avandu vange kuzia ihale,
kuli musaza akungaa mukali weve?
Eveeye hayi ibarwa ya ndaamukungira?
Muganaganaa ndaamuguliza mu kivala chu vutugwa
kuli mundu agulizaa avana veve kuli vatugwa?
Kandi mwagulizwa kuli avatugwa kigira amahiolo ginyu.
Kandi kigira uvwoni vwinyu mama winyu yakungwa.
2“Kigira ki nivavula kundivulira lwa ndaazia kuvo kuvahonyia?
Ndakaminya amazi mu zinyanza ku lilaga liange,
kandi ndakaminya amazi mu migera jiosi nu kujikola jumi kuli changarangwi,
kunangwa zisuzi ziduuki kukuza kigira uvuluhu vwa mazi.
3Nyara kukunika iligulu ni kisundi kuli wiviki inguvu yi ligunia ing'inga yu kusioma.”
Liitia liu Mutumikiri wa Yahova
4Yahova Nyasaye umali kumba amakuva gokovoola,
kunangwa nduuki kuhaana zinguru kandi kudinyiriza avadedekere.
Yambukizaa vuli mugambazuri,
kunangwa nduuki kuhulira agazizaa kunzigiza.
5Yahova Nyasaye umali kumba limanyiriza,
kandi sinyala kwibaala kuye mba,
noho sinyala kwirana inyima kutura kuye mba.
6Ndahaana mugongo gwange ku vasigu vange.
Kandi ndagilung'ana niimbana zisaya ziange vaduuki kumanyula zinderu ziange.
Si ndaavisa mumoni mwange kutura ku livikwa mu zisoni kandi kutuzilwa amate mba.
7Navuzwa Yahova Nyasaye alangoonya kandi si ndaduuka mu zisoni mba.
Kulwayago, ndasingira vudinyu nu vuluviliri,
na si ndaduuka mu zisoni mba.
8Nyasaye mukingi wange aveeye ahimbi na inzi.
Nivwaha unyala kuhing'ana na inzi?
Hambi kuhambane harara.
Nivwaha unzaaraa?
Yaaze kuhing'anana ni inzi!
9Yahova Nyasaye aveeye mukonyi wange
nivwaha unyala kungaragira kuva muhioli?
Avasidagi vange vosi valagota kuli inguvu yi zisere ziakulia.
10Nivwaha ku munyi wegehizaa ku Yahova,
kandi uhuliraa amakuva gu mutumikiri weve?
Oyo ogeendaa mu kisundi,
kandi utaveeye mu vulavu,
navuzwa asuviraa mu lieta lia Yahova,
yeredaa ku Nyasaye weve?
11Munyi vosi avalohizaa kwita avandi
muladivizwa nililohiza lienyu aveene.
Yahova mwene alakola yaga kokoleka,
mulava mu vudinyu vunyingi ligali.
©Bible Society of Kenya, 2019