ISAYA 49
49
Avandu va Isiraeli vaveeye uvulavu ku zihiiri
1Munyi zihiiri zimenyi mu visulu vie inyanza.
Mumbulirizi, munyi avandu vamenyi ihale!
Yahova yananga kandi nandovola kuva mutumikiri weve lwa ndaali ningikiri kwivulwa.
2Yakola amakuva gange kuva amuugi kuli kivavi.
Yaambisa muchiriri chu mukono gwigwe.
Kandi yangola kuva kuli muvano gwu vuta,
ogoveeye umwugi kandi gwetegeki kutumika.
3Yambolera, “Isiraeli Ivi oveeye mutumikiri wange,
avandu valanzizominya kigira munyi.”
4Inzi ndaavoora, “Ndaakola minyinzi, navuzwa jiveeye vuzwa!
Ndaatumikira zinguru ziange ku miyinzi,
navuzwa sindaakonya kindu kali hakuzu mba.”
Kali ndio ndaasuuvira Yahova Nyasaye wange, alamba amadanyi ku likora liange.
5Inzi ningikiri kwivulwa, Yahova yandovola,
yangola kuva mutumikiri weve,
kwilanyia kuye avandu veve Isiraeli harara navaari ni vasalanywa.
Kunangwa Yahova ahaanaa uluyali ku inzi,
kandi aveeye zinguru ziange.
6Yahova yambolera,
“Mbeeye ni miyinzi minene ku ivi, mutumikiri wange.
Sigaveeye nu kwilanyia avandu va Isiraeli avatigara mba,
navuzwa ndakokola kandi ove kuli uvulavu ku zihiiri ziosi,
kunangwa avandu vosi ku lirova vaduuki kohona.”
7Nyasaye Mutakatifu wa avandu va Isiraeli
kandi muhonyi avooreraa mulala olegelizwa ligali,
udunyirangwa ni zihiiri kandi oveeye mutumikiri wa avamihi ndi:
“Avami vaavo valakolora noveeye muvoholore,
kandi valaza nukuhaana uluyali ku ivi;
Avanene kandi valakolola noveeye muvoholore
kandi valasigama kukuha luyali.”
Yaga galakoleka kigira Yahova umali kotovola mutumikiri weve,
Mutakatifu wa vandu va Isiraeli alindaa malagano geege.
Liranywa lia Isiraeli Avandu va Jerusalemi
8Yahova avooreraa avandu veve ndi,
“Lwi ing'inga iduuka yu kumuhonyia,
ndamanyia liyaanzilira liange ku munyi,
kandi ndahaana amativuli ku lianira lienyu lio vokonyi.
Ndamulinda kandi ndamukinga,
kandi ndalomba lilagana liange na ivi kulwa vandu vosi.
Ndamukora mumenye kandi mu kivala chiinyu kalunu ichalekwa vuzwa.
9Ndavolera avahambe ndi, ‘Muve avavoholore!’
Kandi ndavolera yavo avaveeye mu kisundi ndi, ‘Hambi mu vulavu!’
Valakave kuli amagondi gaveeye nu vwayiru ku vigulu.
10Sivalakave ninzara anoho uvuluhu mba.
Sivalasalirizwa nuluya lwu muchangalangwe anoho umuvasu sigulavasamba kandi mba,
valimilirwa nu mulala uvayaanzaa.
Alakavimiliri kali kuduuka ha visenukiru via amazi.
11“Ndalomba inzira mu vigulu,
kandi ndakora avandu vange kogenda kuyo.
12Avandu vange valatura muvivala vie ihale, kutura Ivaale kandi Imadioli,
kandi kutura Aswani lidaala linene liveeye Isavaalu wa Egebeti.”
13O, ligulu liosi mwimbi!
Kandi, lirova liosi mwimbi nimusangara!
Vigulu viosi mwimbi zinyimbu!
Yahova alaleminya avandu veve mioyo,
kandi alavererera yavo avaveeye mu lidambizwa.
14Navuzwa avandu va Jerusalemi vavoola,
“Yahova umali kokoleka!
Kandi umali kukwivilira.”
15Kunangwa Yahova yavativulira,
“Mundu mukali anyala kwivilira umwana weve mudoto,
Kandi anyala kuvula kuyaanza umwana weve wa yiivuyi mwene?
Kali niiva alivilira mwana weve,
navuzwa inzi sinyala kwivilira avandu vange mba.
16O, munyi avandu va Jerusalemi,
sinyala kumwivirira kali hakuzu mba!
Mali kong'oda amita ginyu ku vigalo via makono gange.
17“Avandu vononyia lidaala lienyu linene valatulizwa ho,
kandi lidaala yili lilumbakwa uvuhia.
18Heenzi zimbega ziosi mulole agaakoleka!
Avandu vinyu vazaa kwivungiza harara vazaa yengo;
Ligali kuli inzi mbeeye Nyasaye oveeye mwoyo,
munyi muligingilira avandu vinyu,
kuli umwiha yiyanziza ni yisiahi iviuma.
19“Kivala chiinyu chononywa kandi ni kitigara ichele.
Navuzwa kalunu kilava kekekeeke ligali,
ku vandu vaza nokomenya mucho.
Avasigu vinyu valahirwa ihale kutura ku munyi.
20Avana vivulwa ing'inga ya mwali mu kivala chu vutugwa,
lidiku lilala valakamuvoolere ndi,
‘Kivala yiki kegehi ligali kukunyi
kwenyaa havundu handi hokomenya!’
21Maku mulakaganagane mu mioyo jinyu ndi,
‘Nivwaha waakwivulira avana yava vosi?
Ndagotiza avana vange vosi,
kandi siyatigala kali mulala mba.
Ndaakungwa kandi ninzadikizwa mu kivala chu vutugwa.
Ndaatigara inzi wengine.
Avana yava vatura hayi?
Nivwaha wavavirukiza?’ ”
22Mwami munene Yahova avooreraa avandu veve ndi:
“Ndagingira avandu vi zihiiri mukono gwange,
kandi ndagiinga ebendera yange igulu kuva kuli kelolekizu ku vandu vange,
kandi mulaleeta avana vinyu avayaayi ni vagingiywi ku
vilitu vienyu kandi avana vinyu vakaana nivagiingiywi ku mavega ginyu.
23Avami valava kuli avababa vinyu,
avakali va avami valava kuli avamama vinyu.
Valinama imbiri winyu kandi valegehiza nukuhaana uluyali ku munyi.
Hene yaho, mulamanya ndi, Inzi mbeeye Yahova,
na yavo vosi avaveeye nilisuvira mu inzi sivaliduuka mu zisoni mba.”
24Munyala kunyaga musikari muluviliri ivilanye vivie?
Anoho munyala kosoola avahambe kutura ku mundu oveeye mululu kandi wi zinguru ligali?
25Yahova yiranyia amativuli ndi,
“Kali musikari muluviliri anyala kunyagwa ivilanye vivie.
Kandi avahambe valasoolwa kutura ku mundu mululu.
Ndalwaana na vasigu vinyu,
kandi ndahonyia avana vinyu.
26Ndakora avadambizi vinyu viitane aveene naveene,
kandi valahambika masahi gaavo aveene kuli iwaini;
maku, avandu vosi valamanya ndi, inzi mbeeye Yahova,
uwavahonyia kandi wavaha avovoholole.
Valamanya ndi inzi mbeeye Nyasaye wi zinguru wa vandu va Isiraeli.”
©Bible Society of Kenya, 2019