ISAYA 46
46
1“Yiki nekeheri cha Beli na Nebo,
avanyasaye va Babiloni,
avasigamirangwa mu litanga;
navuzwa kalunu vagingiywi ku zibunda,
uvuliduhu ku migongo ji zinyama ziiluhi.
2Vamali kugumirwa kandi kugingwa nukuhirwa ihale,
sivanyala kwehonyia aveene mba.
Yiki nekeheri cha avanyasaye va Babiloni!
3“O, mumbulirizi munyi visukululwi via Yakobo,
vosi avatigara ku avandu vange!
Ndaamulinda kutura ing'inga ya mwivulwa.
4Inzi mbeeye Nyasaye winyu, ndaamulomba kandi ndamulinda,
kuduuka lwa muva avasaakulu vi zimbuzi.
Ndamukonya kandi ndamuhonyia.”
5Yahova avoora, “Nivwaha wamunyala koneng'anyia kuye?
Aveeye ho nu mundu wundi woosi kuli inzi?
6Avandu vatuliza izahabu mu zimuya ziavo, kandi vagera ifeza ku vibimu.
Venya muturi wi zahabu wi mitungu ma alombe munyasaye wi zahabu,
maku vamwinamiri kandi vamusigamiri!
7Vavugura munyasaye uyu nu kumugingira ku mavega gaavo,
ma vamusingiriza havundu, kandi sianyala kogenda mba.
Niiva mundu alasaala kuye,
sianyala kumuha amativuli mba,
anoho sianyala kumuhonyia kutura mu kivi mba.
8“Mwizurizi yaga munyi avoni,
kandi muganagane ku gamali kokora.
9Mwizurizi vindu viakoleka mu madiku ga kale,
muduuki kumanya ndi inzi wengine mbeeye Nyasaye,
kandi siaveeye ho nu munyasaye wundi kuli inzi mba.
10Kutura mulitanga, ndalolekizaa agaza gekoleke;
kale ligali ndaavura agaali ganyala kwekoleka.
Ndavoora ndi, lilohiza liange sililagwa mba,
kandi ndakora vuli kindu choosi cha ndasaavira kokora.
11Ndalaanga mwami Sairasi kutura Ivugwi mu kivala cha Pasia, alaza kuli iliive,
kandi alatwekiza goosi agandalohiza kokora.
Inzi mali kovora kandi galakoleka.
12“Mbulirizi munyi avandu vaveeye avahindagirizi,
kandi avaveeye ihale kutura ku vohonyi.
13Lidiku liovohonyi liveeye ahimbi siliveeye ihale ligali mba.
Sindalindagira koleta vohonyi vwange mba.
Ndahonyia avandu va Jerusalemi kandi ndaleta
lizominywa ku avandu va Isiraeli.”
©Bible Society of Kenya, 2019