ISAYA 45
45
Yahova Atovoraa Mwami Sairasi
1Yahova umali kotovola Sairasi kuva mwami!
Umali kumutovola kuguuta zihiiri;
Amutumaa kuvugura zinguru zia avami.
Yahova alamwigulira virivwa via madara manene.
Yahova avooreraa mwami Sairasi ndi,
2“Ndakwimilira mu zinzira zizio ziosi,
kandi nokoleng'anyia vigulu viosi nu tugulu twosi imbiri woovo.
Ndavunanyia virivwa viu mugasa,
kandi ndakalaga miluguyu ji vivia ji miliango imbiri woovo.
3Ndakuha miandu kutura havundu haviswa mu kisundi;
maku uduuki kumanya ndi inzi mbeeye Yahova,
kandi Nyasaye wa avandu va Isiraeli umali kulanga ivi ni lieta.
4Ndaakotovola kuva mukonyi wu mutumikiri wange Isiraeli,
avandu vamali kotovola.
Mali kuhaana luyali lonene ku ivi,
kali niiva siumanyi mba.
5“Inzi mbeeye Yahova; siaveeye ho nanyasaye wundi mba.
Ndakuha zinguru zia wenyaa,
kali niiva siumanyi mba.
6Ngolaa yaga kunangwa vuli mundu kutura ku keheri kilala chi lirova kuduuka ku kindi,
vaduuki kumanya ndi inzi mbeeye Yahova;
kandi siaveeye ho nu munyasaye wundi mba.
7Ndaalomba uvulavu kandi kisundi,
ndeta uvugasu kandi ikivi.
Inzi, Yahova, ngolaa vindu yivi viosi.
8Inzi ndaleta liguuta kutura mu ligulu kuli imbura;
avandu valetegeka konyoora liguuta yili
kandi ovohonyi harara nilikalaga lirungi viduuki konyooleka mu lirova.
Inzi, Yahova, ndakora yaga kokoleka.”
Yahova Walomba Viosi kandi wa amakuva ga kale
9Yahova avoora,
“O, kivi keveeye ku uyu uhing'anaa nu mulombi weve!
Aveeye kuli lidohi lio kolonga inyingu mu makono gwu mulongi!
Lidohi linyala koteeva mulongi, ‘Olomba kindiki?’
Anoho inyingu inyala kovoolera mulongi ndi,
‘Miyinzi jije sijiveeye milahi mba?’ ”
10O, kivi keveeye ku uyu ovoolereraa baba weve ndi,
“Wanzivula kuli ndi kigira ki?”
Anoho ovooleraa mama weve ndi,
“Wiivula kindiki?”
11Yahova, Mutakatifu wa avandu va Isiraeli kandi mulombi wavo avoora,
“Munyi simuveeye nuvunyari koteeva amateeva kigira avana vange mba,
anoho simunyala kombolera aganyala kokora mba!
12Kuzinguru ziange ndaalomba ligulu na viosi viveeye mu lio;
liuva, mweli ni zing'ereng'ani.
Ndaalomba lirova, kandi ninomba mundu komenya ku lio.
13Inzi mwene ndavolera mwami Sairasi,
kandi nimuha zinguru aduuki kuduukiza vindu viosi viandalohiza vikoleke.
Ndalungikiza zinzira zizie ziosi.
Ndumbaka vuhia lidaala linene liange lia Jerusalemi,
kandi alahaana vovoholore ku avandu vange avadikizwa.
Sialakola yaga ku litungwa anoho ku lihevwa amadanyi mba.”
Yahova Wuvunyali umali kovora.
14Yahova avooreraa avandu va Isiraeli ndi;
“Uvutugi vwa Egebeti na Ezopia vulava uvwinyu,
kandi avandu vaveeye avataambi ava Seba valava avatugwa vinyu;
valaza ku munyi nivavoheywi minyororo,
kandi valagwa hasi imbiri winyu nivavoora,
‘Nyasaye aveeye harara ni munyi,
kandi siaveeye ho nuwundi mba.
15Aveeye Nyasaye wa vandu va Isiraeli kandi muhonyi wa vandu veve.
Aveeye Nyasaye wivisaa umwene.
16Yavo vosi avalomba ivifananyi valava mu zisoni kandi valaleganywa;
vosi valava mu zisoni.
17Navuzwa Yahova alahonyia avandu va Isiraeli;
kandi sivalava mu zisoni mba,
valava avaguuti mihiga ni mihiga.’ ”
18Yahova yalomba iligulu, aveeye Yahova Nyasaye!
Yalomba lirova, yalilomba kuva lidinyu kandi liu kuhindira.
Siyalilomba kuva liere mba,
navuzwa live havundu ha avandu komenya.
Yahova mwene avoora, “Inzi mbeeye Yahova,
siaveeye ho nu munyasaye wundi mba.
19Simbolaa amakuva gange mu vwivisu mba,
anoho kutura mu kivala chi kisundi mba.
Sindenya avandu va Isiraeli konyenya ha vundu heere vuzwa mba.
Inzi mbeeye Yahova,
kandi mboraa agiligali kandi nandizaa amalungi.”
Yahova wi kivala kandi vifananyi via Babiloni
20Yahova avoora,
“Hambi muvugane harara kandi mwelolekizi aveene,
munyi avandu vi zihiiri ziosi avaahona kutura ku liigwa liu mwami,
avandu vagenda ni vagingi vifananyi viavo viavazwa ku misaala,
kandi avasaalaa ku avanyasaye vandi avatanyala kuvahonyia mba.
Avandu yava sivamanyi kindu kali kilala mba.
21Hambi muleete makuva ginyu mu kiyaalo,
mwenye zing'anagani kutura kuvandi.
Nivwaha wavula amakuva gaali ganyala kwekoleka mumadiku ga kale?
Siyaali inzi, Yahova Nyasaye ohonyia avandu veve?
Siaveeye ho nu munyasaye wundi mba.
22“O, munyi avandu vi lirova liosi, mwirane ku inzi kalunu ndi,
na mulanyola lihona!
Inzi mbeeye Yahova Nyasaye wengine oveeye ho.
23Lisuuvirizwa liange liveeye lia agaligali,
kandi silinyala kugirung'anywa mba.
Inzi mali kumusuuviriza ndi,
vuli mundu woosi alaza nu kusigama imbiri wange,
kandi valisuuha kuva avasuuvirifu imbiri wange.
24“Vosi valavoora ndi, vulungi kandi zinguru vituraa ku inzi,
navuzwa vosi avadunyiraa inzi, valaduuka mu zisoni.
25Inzi Yahova ndasora visukululwi viosi via vandu va Isiraeli,
kandi valahaana lisaandiza ni lizominya ku inzi.”
©Bible Society of Kenya, 2019