ISAYA 32
32
Umwami Mulungi
1Lidiku lilala alakaveho Mwami uliamiihi ni likalaga lirungi, kandi aviimiliri vizihiiri valakimiliri nu vulungi. 2Vuli mulala kuvo alakave kuli chukwikinga kutura kumbuuza kandi havundu hu kwivisa kutura kumbula yikiihi. Valakave kuli migera ja mazi jiturukaa kutura mu changarangwi, kandi kuli chiriri chu lwanda lonene mu kivala kitaveeye ni liama. 3Zimoni ziavo zilarora, kandi amatu gaavo galahulira yava avaveeye nu vudinyu. 4Valava ni liekuzira, navuzwa valakola ni limanyiriza, kandi valavoora agaveenya. 5Vandu vasiru si valaganaganwa kuva vu luyali mba, anoho mundu mudamanu sialavoorwa kuva musuvirifu mba. 6Mundu musiru alavoora uvusiru, kandi aganagana kokora vindu vidamanu. Goosi agakolaa kandi agaavoola gaveeye gu kuvihiliriza ku Yahova, kandi si ahaanaa viukulia ku avaveeye ninzara anoho siahaanaa ku avaveeye nu vuluhu kindu chu kunwa mba. 7Mundu muyingu aveeye mudamanu kandi akolaa vindu vidamanu. Alohizaa mu vwivisu aduuki kudiviza avadaka na amakuva gu vugadi, kandi ahingiraa vadaka vavuli konyoora uvulungi vwavo. 8Navuzwa mundu wuluyali akolaa vindu nu vusuuvirifu, kandi aveeye muduukiru mu vindu viu vulungi.
Lihaana mageri ku vakali va Jerusalemi
9O, munyi avakali vaveeye ni limenya liovwelemelizi, avataveeye ni lihenda mwoyo, muhulirize amakuva gambolaa. 10Munyala kwiguta kalunu, navuzwa ing'inga kuli yiyi muhiga guzaa mulakave mu kivi kigira simulakave ni liagula lia mazabibu mba. 11Munyi mwamenyangi mulielemeliza, litaveeye ni lihenda mwoyo, navuzwa kalunu, mudegere nu uvuti! Mutulizi zinguvu zienyu, kandi mwevohe zinguvu ziamagunia mu vikenge vienyu. 12Muduyi ku vilitu vienyu mu liverera kigira milimi jinyu migunamu kandi ni milimi ji mizabibu jimali kwononywa. 13Visaka viamafwa kandi nivigunzanguvu vimera mu kivala cha vandu vange. Musiome kigira zinyumba ziosi zia vandu vaali nu vusangali kandi musiome kigira lidaala linene iliali liovomenyo vuduukiru. 14Kali inyumba yu vwami ilakalekwe, kandi lidaala liveeye linene ligali lilakang'anywi. Hango ho vomenyo kandi, minaara jaavakinga vilava amang'anye mihiga ni mihiga. Zibunda ziu mumulitu zilagendagenda mu, kandi amagondi galakanyole yo uvwayiru.
15Navuzwa ing'inga yindi kandi Nyasaye alakuhanira Roho viamo. Kivala chi changarangwi kilava mulimi mugunamu gwi viavo. 16Vuli havundu mu kivala, likalaga liu vulungi nu vusuuvirifu lilavaho. 17Kigira vuli mundu alakola agaveeye amalungi, mirembe ni likingwa vilavaho mihiga ni mihiga. 18Avandu va Nyasaye valava avavoholore kutura mu lihenda mwoyo liavo. Hango haavo halava hovomenyo vwi likingwa kandi hi mirembe. 19Navuzwa imbura ya magina ilakuba mu militu, kandi lidaala linene liradivizwa ligali. 20Vuli mundu alakave navuyanziki lwa mazi nagaveho muvunyingi agukusama ku vitagwa kandi nuvwayiru vunyingi havundu hoosi vwi zibunda kandi mitugu?
©Bible Society of Kenya, 2019