ISAYA 31
31
Nyasaye alakinga avandu va Jerusalemi
1Avandu vazizaa Egebeti konyoora ovokonyi vaveeye mu kivi! Vasuuvira mu liihi lia Egebeti lie zinguru, lie zibarasi ziu kunina ku lia magare gu vulwani kandi lia vasikari. Navuzwa si vasuuvira mu Yahova, Nyasaye Mutakatifu wa Isiraeli mba, anoho si vateevaa ovokonyi kutura kuye mba. 2Yahova amanyi agaakolaa, kandi aletaa ikivi ku avadamanu. Adukizaa litihiza lilie kandi ahaanaa mageri ku vadamanu na yavo avakingaa vadamanu. 3Avandu va Egebeti sivaveeye vanyasaye mba, navuzwa vaveeye vuzwa avandu. Zibarasi ziavo si ziveeye roho mba, navuzwa ziveeye izinyama. Lwa Yahova ahaanaa amageri, ihiiri eveeye yi zinguru ilikigatala, kandi ihiiri eveeye endedekele yakonywa ilagwa. Vombi valadivizwa.
4Yahova yambolera, “Kali avayi ni vahanzuka ni vakuba liyoga, sivanyala kutihiza anoho kukunga isimba kutura ku inyama ya imali kwita mba: Kunangwa, siaveeye ho nu mundu unyala kungaya inzi Yahova Wuvunyali kukinga kiguru cha Ziyoni mba. 5Inzi Yahova Wuvunyali ndakinga kandi ndahonyia avandu va Jerusalemi, kuli linyonyi likumberiza nokohonyia avana valio.” Kunangwa inzi Yahova Wuvunyali ndakinga kiguru cha Ziyoni.
6Yahova yavoola, “O, munyi avandu va Isiraeli, mumali kokora uvwoni imbiri wange nu kuhing'ana ninzi; navuzwa kalunu mwirane ku inzi! 7Ing'inga yiza lwa mwinyi mwosi mulakasiuve vifananyi viuvwoni viamwalomba vie ifeza kandi vie zahabu. 8Avandu va Asiria si valitwa ni kivavi chu mundu mba, navuzwa valitirwa mu vulwani. Avandu va Asiria valiruka kutura mu vulwani, na avasoleri vaavo valagumirwa nokokorwa vatugwa. 9Mwami wavo aliruka mu vuti vonene, na vatumikiri valatiihizwa nokoleka ibendera yaavo yu vulwani.” Yahova wukusigamirwa mu Jerusalemi, kandi wu muliru gwadukaa yo kigira visiuviliru - Yahova umali kovora.
©Bible Society of Kenya, 2019