HOSEA 12
12
1Vuli kindu cha avandu va Isiraeli vakoola kutura mugamba zuri kuduuka vudiku, keveeye icha vuzwa kandi ichilidiviza. Vugadi kandi vikolwa viekirage viameedeka muvo. Valomba malagano navandu va Asiria kandi vahiraa maguta gimizeituni mu Egebeti.”
2Yahova aveeye namayalo ku vandu vi Ivuyuda. Azizaa kandi kuhaana mageri ku avandu va Isiraeli kigira likora liavo. Alavatuunga ku agavamali kokora. 3Muguuga wavo Yakobo yang'usana na amwavo weve Esau malongo lwa vombi vaali nivakikiri munda mwa mama wavo. Lwa Yakobo yaviruka yalwana na Nyasaye. 4Yalwana nengelosi kandi naguuta. Yalira kandi nateeva ligasizwa. Nyasaye yaza ku guuga wiitu Yakobo ha Bezeli kandi namoloma naye. 5Uyu ni Yahova Nyasaye Wuvunyali Yahova liveeye lieta lienyekaa lisigamirwi. 6Kunangwa munyi visukululwi via Isiraeli, musuuviri mu Nyasaye winyu kandi mwirane kuye. Muve avasuuvirifu kandi vilikalaga lirungi, ma ku mulindiliri Nyasaye winyu kazozo.
Makuva Gandi Manyingi Gilikalaga
7Yahova avoora, “Avandu va Isiraeli si vaveeye avasuuvirifu mba; vayaanza kugaada avakiranyi niligera liuvugadi. 8Vavoola, ‘Kunyi koveeye avatugi ligali kandi; kunyi kumali kugwa avahinda. Si aveeyeho mundu unyala konyoora uvugadi, nuvuhinda vwitu vwosi mba.’ 9Navuzwa inzi, Yahova Nyasaye winyu uwa muletaa kutura Egebeti, ndamukora mumenye mumahema kandi, kuli mwakora lwa inzi ndaaza ku munyi muchangalangwe.
10“Inzi ndaamoloma ku vaporofeti kandi nimbaha malola manyingi. Inzi ndiganihiza avandu vange kuvitira ku avaporofeti. 11Navuzwa vifananyi visigamirwa mu Gileadi, kandi yavo avavisigamira valakakuzi. Zigiriki zihaanangwa kuli kisiuviriru mu Giligali, kandi uvwali uwene yeyo navugwi vitumi via magina mu mulimi gwaalimwa.”
12Guuga wiitu Yakobo yiruka nazia Mesopotamia, uwa yakolera wundi mundu miyinzi jukulinda magondi geege kunangwa anyoore mukali. 13Yahova yatuma muporofeti kuzia kosoola avandu va Isiraeli kutura muvutumwa mu kivala cha Egebeti kandi nukuvalinda. 14Avandu va Isiraeli vamali kokora Yahova kuva nu vutima vululu. Gavadukiraa vakuzi kigira mahiolo gaavo. Yahova naavahe mageri kigira vamali kumuviika muzisoni.
©Bible Society of Kenya, 2019