HOSEA 11
11
Vuyanzi vwa Nyasaye ku Vandu Veve Avibaali
1Yahova avoora,
“Lwa Isiraeli yaali mwana inzi ndamuyanza
kandi ndamuranga kutura Egebeti kuli mwana wange.
2Navuzwa lwa ndameda kumuvalanga,
nilwo lwayazizagilira kutura ku inzi.
Avandu vange vahaana visiuviliru ku Baali,
kandi vasamba vifunya mwayu ku vifananyi.
3Kali niiva wigiza vandu va Isiraeli kogenda.
Ndaavavika mu makono gange,
navuzwa si vamanyiriza ndi ni inzi wavahonyia mba.
4Ndaavaleta nizimbavasi kandi nuvuyanzi.
Ndaatuliza inara ku mavega gaavo,
kandi nimbaliihiza.
5“Vasuura kwirana ku inzi, na kulwayago kuduuka viirane Egebeti, kandi mwami wa Asiria alakavamiihi. 6Vulwani vuliva mu madaala gaavo manene, kandi navwononyie zitiru zievilivwa viavo nokoheliza lilohiza liavo. 7Avandu vange vasaviyi kugirung'ana kutura ku inzi. Navaaniri kigira iniira eveeye kuvo, navuzwa umundu kali mulala si alivagingira mba.
8“Avandu va Isiraeli, inzi nyara ndi kumuleka?
Inzi nyara ndi kusuura munyi?
Inzi nyara kumudiviza kuli ndaadiviza Adamali,
anoho inzi nyara kumukolera kuli ndaakolera Zeboiimu?
Inzi si nyara kokora ndio mba!
Vuyanzi vwange ku munyi voveeye vunyingi ligali.
9Inzi si ndamuha mageri mu vutima vwange mba.
Sindadiviza avandu va Isiraeli kandi mba.
Inzi mbeeye Nyasaye na si mbeeye umundu mba.
Inzi, oveeye Mutakatifu mbeeye ni munyi.
Si ndaza ku munyi nu vutima mba.
10“Inzi Yahova, ndahuuma kuli isimba ku avasigu vaavo, kandi avana vange valirana nivadegera kutura Imadioli. 11Valaza vwangu kuli manyonyi kutura Egebeti, kandi valaza vwangu kuli makuulu kutura Asiria. Inzi ndakaviranyie yengo wavo kandi. Inzi Yahova, mali kovora.”
Avandu va Isiraeli navandu vi Ivuyuda Vakalagiywi
12Yahova avoora, “Avandu va Isiraeli vakumberizi novovehi kandi nuvugadi. Avandu vi Ivuyuda vakikiri avibaalu ku inzi, Nyasaye musuuvirifu kandi Mutakatifu.
©Bible Society of Kenya, 2019