VAHEBURAINA 1
1
Likuva lia Nyasaye kuvitira mu Mwana weve
1Mu zing'inga zia kale, Nyasaye yavolerana na vaguuga viitu haali kanyingi muliiva lugano lugano kuvitira mu vaporofeti. 2Navuzwa mu madiku gu kumaliriza yaga umali kovolerana ni kunyi kuvitira mu Mwana weve wayatovola kuva mwene vindu viosi mu limalirika, kandi kuvitira muye yalomba ligulu ni lirova. 3Amanyia ovong'ereng'anu vwu vukumi vwa Nyasaye kandi liiva lieligali lia Nyasaye mwene, kulinda ligulu ni zinguru zie likuva lilie. Niyakamara konyoora uvusamiihi vwu vwoni vwa vandu, yikala mwigulu ha mukono mulungi gwa Nyasaye, oveeye Zinguru Zinene.
Ovonene vwu Mwana wa Nyasaye
4Mwana yamanya naakolwa kuva Munene kuvita zingelosi, kuli lieta lia Nyasaye yamugulika liveeye linene ligali kuvita agaavo. 5Nyasaye si yavoolela ku zingelosi,
“Ivi oveeye Mwana wange;
lero inzi mali kugwa Baba woovo?”
Anoho si yavoola ku engelosi woosi,
“Inzi ndava Baba weve, naye alava Mwana wange?”
6Navuzwa lwa Nyasaye yaali ahimbi kutuma Mwana weve wukutanga mu lirova, yavoola,
“Zingelosi vosi va Nyasaye kuduuka vamusigamiri.”
7Navuzwa ko zingelosi, Nyasaye yavoola ndi,
“Nyasaye akolaa zingelosi veve kuva zimbuza
kandi avatumikiri veve kuva lumemo lwu muliru.”
8Navuzwa ku Mwana, Nyasaye yavoola, ndi:
“ O, Nyasaye, Uvwami vuvwo, vulahindira mihiga ni mihiga!
Wamiihaa avandu vovo nu vulungi.
9Ivi uyanzaa vulungi na udunyiraa uvudamanu.
Yicho nicho kigira Nyasaye, Nyasaye woovo,
umali kokotovola nu kukuvaka maguta,
kandi umali kuhaana ku ivi uvusangari vwu luyali
voveeye vonene kuvita avache vovo.”
10Yavoola kandi,
“Ivi Mwami, mulitanga walomba lirova liosi
kandi walomba ligulu na makono googo.
11Viosi viladiva, navuzwa ivi ulatigala uhindiri mihiga ni mihiga;
viosi vilakunguha kuli zinguvu!
12Ivi ulavilinga kuli likoti,
vilagirung'anywa, kandi kuli inguvu.
Navuzwa ivi oveeye mulala mwere kazozo,
kandi livamwoyo liilio sililava ne keheri mba.”
13Navuzwa nivwaha ku zingelosi, wa Nyasaye yavolera;
“Yikala ha mukono gwange mulungi,
kuduuka mbiki avasigu vovo
kuva kituva chi virenge vivio.”
14Kunangwa zingelosi nivwaha? Vaveeye vatumwa vatumikira Nyasaye, kandi vatumwa na Nyasaye, kuzia kokonya avandu vaadukana vanyoore vohonyi.
Ovohonyi Vonene
Currently Selected:
VAHEBURAINA 1: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
