KUTURA 33
33
Yahova yalaga avandu va Isiraeli vatuli ku kiguru cha Sinai
1Yahova yavolera Musa, “Tuli havundu hano, ivi harara na avandu vawaleeta kutura Egebeti, kandi muzie mukivala cha ndasuuviriza kuhaana ku Aburahamu Isaka na Yakobo kandi kuvisukululwi viavo. 2Ndatuma engelosi kumwimilira, kandi ndakunga vandu va Kanaani, Amori, Hiti, Perizi, Hivi, na Jebusi. 3Muzizaa mukivala kigunamu ligali. Navuzwa inzi mwene sindazia nimunyi mba, kigira muveeye avandu vi kirage, kandi hawundi nyara kumudivizira kunzira.”
4Lwa avandu vahulira makuva madamanu yaga, vatanga kusioma kandi sihaali ho nu mundu uwiviika viukwisiaha vivie mba. 5Kigira Yahova yaali nalagi Musa avavoolere ndi, “Munyi muveeye avandu vikirage. Niiva ndakaziiyi ni munyi ku ing'inga engekeeke, ndakamudivizi ligali. Kalunu mutulizi viukwisiaha vienyu, na inzi ndalora ichanyala kumukolera.” 6Kunangwa inyima wu kutura ku kiguru cha Sinai avandu va Isiraeli siviviika viukwisiaha viuvuguli mba.
Lihema liukwaganira mu Yahova
7Vuli lwosi lwa vandu va Isiraeli vumbaka hokososa Musa yavugula Lihema Liukuvuganiramu ma aliumbaka ihale kutura havundu hokososa. Mundu woosi wenyaa kumanya vulaliri vwa Yahova yingira mu. 8Lwa Musa yaazizaa ichova, uwene yeyo, avandu vasingilaa havwingiliru vwa mahema gaavo nivamuhenza kuduuka lwa Musa yingira mulio. 9Inyima wa Musa yalange niyakingira mu Lihema, munara gwi lilesi gwika hasi, na Yahova yamoloma na Musa kutura mumalesi. 10Lwa avandu valora munara gwi lilesi nigusingiyi imbiri wu vwingiliru vwi Lihema, vinamaa hasi. Vuli mundu yasigamiraa Yahova ha lihema lilie. 11Yahova yamoloma na Musa moni na moni, kuli mundu amolomaa nu mulina weve ma Musa yirana hokososa. Navuzwa musoleri Joshua, uwaali Mukonyeleri weve, mwana wa Nuni, yaatigara mu Lihema liukuvuganira mu.
Yahova yasuuviriza kuva na avandu veve
12Musa yavolera Yahova, “Henza, gaveeye agiligali ndi ivi umali kombolera nzimiliri avandu yava kuzia mu kivala yicho, navuzwa siomboleye nivwaha wautumaa kuzia harara ninzi mba. Umali kovora ndi umanyi vulahi ligali kandi uyanziziywi ninzi. 13Niiva uyanziziywi ninzi, mbolera zing'anagani zizio, kunangwa nduuki kukutumikira kandi nzizagiliri kukuyaanziza. Wizulizi ndi umali kotovola ihiiri yiyi kuva ihiiri yooyo.”
14Yahova yavoola, “Inzi mwene ndazia nivi na ndakuha iliguuta.”
15Musa yativura, “Niiva siulazia nikunyi utakokola kutuli havundu hano mba. 16Ganyala kumanyikana ndi ivi uyanziziywi na avandu vovo kandi ninzi, niiva siulazia nikunyi? Lizia liilio harara nikunyi, lilamanyia liavukanyia hagati hiitu na avandu vandi vosi avaveeye mu lirova.”
17Yahova yavolera Musa, “Ndakora kuli umali koteeva, kigira ndakumanya vulahi ligali kandi nyanziziywi nivi.”
18Maku Musa yateeva, “Mwaza, nuyanza umanyie uvukumi vuvwo kalunu.”
19Yahova yamutivulira, “Ndavitiza uvulahi nuvukumi vwange imbiri woovo, ndalandiza lieta liange litakatifu. Inzi mbeeye Yahova. Ndava ni zimbavasi na uyu wanyenyaa koveera zimbavasi. Kandi ndava ni livererera ku uyu owanyenya koverererwa. 20Sindaleka olole mumoni mwange mba, kigira sihaveeye ho nu mundu unyala kondola ma ave mwoyo mba, 21navuzwa hano haveeye ho na havundu kolovega lwange aha unyala kusingila ku lwanda. 22Na galava ndi lwu uvukumi vwange vuvitaa, ndakuvika mu luhangaywa lwu lwanda na ndakufuma numukono gwange kuduuka lwamba nindakavita. 23Maku ndatuliza ho mukono gwange, na ulalola mugongo mwange, navuzwa siulalola mumoni mwange mba.”
Currently Selected:
KUTURA 33: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
