KUTURA 32

Igiriki yizahabu

(Liz. 9:6-29)

1Lwa avandu valora ndi Musa ulindagiyi kwika kutura mukigulu, vivungikiza himbi na Haruni, nivamuvoolera, “Sikumanyi ikimali kwekoleka ku mundu uyu Musa uwakwimilira kutura Egebeti mba; kunangwa okolombere umunyasaye unyala kukwimilira.”

2Haruni yavavolera, “Tulizi zimingiri zie izahabu ziveeye mumatu ga vakana na vayaayi vinyu kandi avakali vinyu, mundeetere.” 3Kunangwa avandu vosi vatuliza zimingiri ziosi ziezahabu ziavaali nazio mu matu gaavo, nivazileeta ku Haruni. 4Naye yavugula zinono yizio kutura mu makono gaavo, naziviika mukisambiru zisaluluki, niyitulura izahabu zana mu kelongero, nagivaaza nuluvaziru, nalomba kemoli kigiriki yizahabu.

Avandu vavoola, “Isiraeli, uyu niyie munyasaye wiitu, uwakwimilira kutura Egebeti!”

5Maku Haruni yumbaka uvwali imbiri wi igiriki yizahabu ma nalandiza kovora, “Mugamba lilava lidiku lie lisavo kuhaana luyali ku Yahova.” 6Mugambazuri lidiku lialonda ku valeta zinyama ziukusamba kuli visiuviliru kandi zindi kuli zisadaka zie mirembe. Avandu viikara hasi kulia, nivanwa, nivavina; vagirung'ana ni vakora voheyi.

7Yahova yavolera Musa, “Yika hasi vwangu, kigira avandu vovo avawimilira kutura mu kivala cha Egebeti, vamali kwona mbitilira. 8Vamali koleka inzira ya ndaavalaga kolonda ku: vamali kwelombera kifananyi chi igiriki kutura ku izahabu isialulukiziywi nukugisigamira, nukuhaana kucho visiuviliru. Vavoola ndi oyo numunyasaye wavo, uwavatuliza mu kivala cha Egebeti. 9Inzi manyi vulahi kirage cha avandu yava vaveeye nacho. 10Kalunu, utageriza kungaya mba. Mbeeye nu vutima navo ligali kandi nziza kuvadiviza. Maku ndaakola ivi harara ni visukululwi vivio kuva ihiiri enene.”

11Navuzwa Musa yagoonya Yahova Nyasaye weve, navoora, “Yahova, kigira ki uvutima vuvwo voveeye ku avandu vovo, avawahonyia nuvunyari vuvwo vonene nuvatuliza mu kivala cha Egebeti? 12Kigira ki avandu va Egebeti vavoole ndi ivi wimilira avandu vovo kutura mu kivala chavo kuvitira mu vigulu noveeye nililohiza liukuvadiviza ligali? Lekera kuva nu vutima; girung'anyia zing'anagani zizio, na utaleta ikivi yiki ku vandu vovo mba. 13Wizulizi Lilagana lia walomba na avatumikiri vovo Aburahamu, Isaka na Yakobo. Wizulizi lisuuviriza lia walomba navo ndi ulavaha visukululwi vinyingi kuli zing'ereng'ani ziu mwigulu, kandi kuvaha kivala chawavasuuviriza kuva miandu jaavo mihiga ni mihiga.” 14Kunangwa Yahova yaagirung'anyia zing'anagani zizie, siyaleeta ku avandu veve kivi cha yaali navooye mba.

15Musa yagirung'ana nasulunguta kutura mu Kiguru, nagiingi vibaho viviri mu mukono gwigwe na malago nigang'odeywi ku zimbega ziombi. 16Nyasaye mwene yaali naalombi vibaho yivi nang'odi gamalago kuvio.

17Joshua yahulira avandu nivahanzuka navolera Musa, “Mbulira liyoga liu vulwani hokososa.” 18Musa yavoola, “Yigu sigoveeye mwoyo gwisango yiliguuta mba, anoho lilira lieliguutwa mba; eveeye isango yiliemba.” 19Kunangwa lwa Musa yisunda ahimbi hokososa, yalora kifananyi chi igiriki yizahabu na avandu nivavina, yaali nu vutima ligali. Ahene yaho hasi hi kiguru, yalasa hasi vibaho viayaali nagiingi niviadika. 20Yavugula kemoli chi igiriki cha vaali nivalombi, naakisaamba mu muliru, nukukisia kuduuka nikigwa uvusie, kandi nazuganyia na amazi. Maku yaniga avandu va Isiraeli kuganwa. 21Yavolera Haruni, “Avandu yava vakoli kinduki yiki? Ivi ndi uvakoli vingili mu vwoni vonene vwukutihiza kuli ndi?”

22Haruni yativura, “Utava nu vutima ninzi mba ivi umanyi vulahi avandu yava, vaveeye nu mwoyo gwokokola uvudamanu. 23Vaamboleye ndi ‘Sikumanyi ichekolekaa ku mundu Musa uyu, uwakwimilira kutura Egebeti mba, kunangwa okolombere umunyasaye, ukwimirira.’ 24Inzi ndavateeva vandeetere viju viavo viezahabu, na yavo avaari navio vaamba. Ndaaviviika mu muliru, kandi chatula mu ekemoli chi igiriki yiki.”

25Kunangwa Musa yamanya ndi Haruni niyie uwaleka avandu vibaale kandi vaagwa vindu viokosekerizwa na vasigu vaavo. 26Kunangwa Musa yasingira mukirivwa cha hokososa na hanzuka navoora, “Umundu woosi oveeye kolovega lwa Yahova, yisundi ku inzi!” Kunangwa vandu vihiiri ya Levi vosi visunda kuye kumukumberiza 27na yavavolera, “Yahova, Nyasaye wa Isiraeli avoora ndi; Mwevohe sa mulala ni kivavi chiche mu kekenge, na muviiti yiyi na yiyi kutura mu kirivwa yiki kuduuka mukirivwa yiki hagati ha hokososa, na vuli mundu yiiti amwavo weve, wache weve, nu mutende weve.” 28Avandu vi hiiri ya Levi vaakora kuli Musa yavalaga, na vita ahimbi avasaza 3,000 ku lidiku yilio. 29Musa yavolera vandu vi hiiri ya Levi, “Lidiku yili mumali kwivika halovega kuli vasaalisi mu vutumiki vwa Yahova kuliita vuli mundu muyaayi weve, amwavo weve kunangwa Yahova amuhe uvugasu vwivwe.”

30Kunangwa lidiku lialondaku Musa yavolera avandu, “Mumali kokora uvwoni ovonene ligali. Navuzwa kalunu ndanigira kuzia mukigulu ku Yahova; mbula ndanyoora lisamiifwa kigira vwoni vwinyu.” 31Musa yirana ku Yahova navoora, “Avandu yava vamali kokora uvwoni vonene ligali, na velombeeye umunyasaye wizahabu. 32Navuzwa kalunu nuuva nuyanza kuvasamiiha uvwoni vwavo, nigataveeye ndio, ngusaala, mwaza, utulizi lieta liange mu kitabu chicho cha waang'oda mu mita ga vandu vovo.”

33Yahova yavolera Musa, “Vandu vosi vamali kokora vwoni ndatuliza amita gaavo mu kitabu change. 34Kunangwa kalunu uzie, kwimilira avandu vaduuki havundu ha mali kokovoolera. Wizulizi ndi engelosi wange alakwimilira; navuzwa mu ing'inga yiza lwa ndihaana mageri ku avandu yava kigira uvwoni vwavo.”

35Kunangwa Yahova yatuma vulwaye vudamanu ku avandu, kigira vaakora Haruni kolomba kemoli chizahabu.

Currently Selected:

KUTURA 32: LOGOOLI

Highlight

Copy