KOHELEZU 2
2
1Ndaatovora kwisangaliza nu kwenya kumanya ndi vuyanzi voveeye ki. Navuzwa ndanyoora ndi viosi viali vuzwa kandi. 2Ndanyoora ndi lisekelera liveeye vusiru, kandi lieyaanziza si liveeye nuvulahi vwosi mba. 3Lwa ndimilirwa ni liegomba ovogeri, ndaatovora kwiyaanziza ni iwaini nukusangara. Ndaganagana ndi yiyi yaali inyala kuva inzira indahi ya vandu vanyara kutumikira mulimenya liavo liveeye limbi mu kivara.
4Ndaakola miyinzi minene. Ndiyumbakira zinyumba kandi ndataga milimi ji mizabibu. 5Ndaalima milimi ninjikumberiza nulugaga, nindaga mu misaala ja makuyu zing'ano ziosi. 6Ndalomba madavalia ga mazi gu kusama militu ji misaala midoto. 7Ndaagula vatugwa vivulirwa munyumba yange. Ndaali ni mitugu kandi viayo vinyingi vie zing'ombe na magondi kuvita mundu wundi woosi wamihaa mu Jerusalemi imbiri wange. 8Ndaavungiza izahabu kandi ifeza inyingi ligali kutura mu mavikiru gu vwami vwi vivala via ndamiiha. Ndaali na vimbi vi kikali kandi vi kisaza vanyanziza ni liemba; kandi ndaali na vakali vaviika vanyingi vu musaza wundi yaali anyala kuva navo.
9Ndaali mundu munene ligali kuvita mundu wundi woosi waali mu Jerusalemi; kandi ndaali mugeri. 10Kindu choosi cha ndeenya, ndakenyoola. Si ndigayaku lieyaanziza mba. Ndaali ni liegingilira ni miyinzi josi ja ndaakola; na yivi viosi viali madanyi gange. 11Maku ndaganagana ku viosi via ndaali nengoli kuli ndaali ninyinziyi vudinyu, na ndayoola ndi viosi viali vuzwa. Gaali vuzwa kuli kudidikana nokolonda imbuza, na si ndaali ni kindu cha ndanyoora mu kivala mba. 12Kunangwa ndatanga kuganagana kigira ovogeri, uvusiru kandi uvularu. Inyima wa yaga, ndaalora ndi, mwami winyima anyala kokora ki kuvita chu mwami wimbiri yakola mu litanga. 13Maku ndaalora ndi, “Ovogeri voveeye vulahi ligali kuvita uvusiru, kuli uvulavu voveeye vulahi kuvita kisundi. 14Avandu vageri valora wavaziza, na vandu vasiru sivalola wa vazizaa mba.” Navuzwa ndaalora ndi vombi vanyoola vudinyu vulala vwere. 15Maku ndaganagana nimbora, “Inzi ndakanyoole kivi kilala chere kuli avasiru. Kunangwa, kindiki chamali konyoora kutura ku liiva mugeri?” Ndaativura, “Yaga kandi gaveeye vuzwa.” 16Siaveeyeho nu mundu wizulizaa vandu vageri mba, kandi siaveeyeho nu mundu wizulizaa vandu vasiru mba. Mu madiku gaaza, kunyi kwosi kulakivilirwi. Kuduuka kwosi na kukuzi, avageri na vasiru vombi vaveeye kindu kilala. 17Kunangwa ndaduunyira livamwoyo, kigira kindu choosi chandaakola mu kivala, chandetera vovereri. Vindu viosi viveeye vuzwa. Goosi gaveeye vuzwa kuli kudidikana nokolonda imbuza.
18Ndaduunyira miyinzi jange josi ja ndaakola vudinyu mu kivala; kigira ndaamanya ndi ndaleka miyinzi yiji josi ku mundu waza yaaze inyima wange, 19Hawundi anyala kuva mugeri anoho musiru, nivwaha umanyi? Navuzwa alakavuguri vuli kindu choosi cha mali konyoora mu liyinzira vudinyu no vogeri vwange mu kivala yiki. Yaga goosi gaveeye vuzwa. 20Kunangwa ndidura inzi mwene kandi ndaayinzira vudinyu ligali mu kivala yiki. 21Mundu ayinziraa vudinyu novogeri vwivwe vwosi, kandi limanya lilie liosi, navuzwa inyima alekera mundu wundi vindu viosi, mundu uvuli kuyinziraku kali hakuzu. Yaga goosi gaveeye vuzwa, kandi vudamanu ligali! 22Mundu ayinziraa vudinyu nokohenda mwoyo mu livamwoyo lilie liosi, anyoora kindiki mu lididikana lilie liosi mu kivala? 23Madiku goosi gu mundu amenyi mu kivala, vuli kindu choosi chakolaa keletaa lihenda mwoyo kandi vuzunu. Kali vudiku, zing'anagani zizie si zisosaa mba. Yaga goosi gaveeye vuzwa.
24Kindu kilahi ligali chu mundu anyala kokora mu kivala nukulia kandi kunwa, nukusangalira viosi viamali konyoora mu liyinzira vudinyu. Navuzwa ndaalora ndi vindu yivi viosi vituraa ku Nyasaye. 25Nivwaha unyala kulia nu kunwa kandi kusangara vugira Nyasaye? 26Nyasaye ahaanaa ovogeri, limanya kandi uvusangari ku yavo avamuyaanzizaa, navuzwa akolaa avoni kuyinzira vudinyu nokonyoora kandi kuviika mu kedeera, kunangwa vindu via vanyooye viduuki kuhaanwa ku yavo avayaanzizaa Nyasaye. Yaga goosi gaveeye vuzwa. Gaveeye vuzwa kuli kudidikana nokolonda imbuza.
©Bible Society of Kenya, 2019