KOHELEZU 3
3
Vuli kindu keveeye ni ing'inga yacho
1Vuli kindu choosi keveeye ni ing'inga yacho;
kandi madiku gaveeyeho ga vuli kindu choosi chekoleka mu kivala.
2Ing'inga eveeyeho yu kwivulwa kandi ing'inga yu kukuza;
ing'inga yu kutaga kandi ing'inga yo kogesa,
3Ing'inga yu kwita kandi ing'inga yo kohonyia,
ing'inga yu kusambula kandi ing'inga yu kwumbaka.
4Ing'inga yu kulira kandi ing'inga yo koseka,
ing'inga yu kusioma kandi ing'inga yu kuyaanza,
5Ing'inga yu kuva harara kandi ing'inga yu kuvula kuva harara,
ing'inga yu kukumberana kandi ing'inga yu kuvula kukumberana;
6Ing'inga yu kwenyeleriza kandi ing'inga yokogotiza;
ing'inga yu kuviika kandi ing'inga yu kusiuva.
7Ing'inga yu kutandura kandi ing'inga yu kunava.
Ing'inga yu kukiling'ana kandi ing'inga yu komoloma.
8Ing'inga yu kuyaanza kandi ing'inga yu kudunya,
Ing'inga yu vulwani kandi ing'inga yi mirembe.
9Ni vukala ki vwakonyoolaa ku miyinzi jietu josi? 10Ndaamanya vuliduhu vwa Nyasaye yavika ku kunyi. 11Yalomba vindu viosi vilahi mu ing'inga yavio; kandi ya viika limanya lie mihiga ni mihiga muziganagani ziu mundu, navuzwa mundu si yamanyiriza ga Nyasaye yakola kutura mulitanga kuduuka mulimalirika mba. 12Maku ndaamanya ndi goosi ga kunyala kokora ni kuva nuvuyanzi kandi kokora agaveeye malahi ligali lwa kukikiri mwoyo. 13Gakuduukiraa kunyi kwosi kulie, kunwi kandi kusangaliri miyinzi jietu. Yiki ni kihanwa cha Nyasaye.
14Manyi ndi kindu choosi cha Nyasaye akolaa kilahindira mihiga ni mihiga. Siunyala komeedaku kindu choosi, anoho siunyala kutulizaku kindu choosi mba. Kandi kindu kilala cha Nyasaye akolaa nokokola kunyi kusingila imbiri weve nu kumutia. 15Kindu choosi keveeho chamala kuvaho; chaza keveeyeho, chaliho kutura kale. Nyasaye alombaa kindu kilala chere kwekoleka kazozo.
Likalaga Litaveeye Lirungi mu Kivala
16Komeeda ku yaga, ndaalora ndi mu kivala yiki, ulanyora uvuchamu nivoveeye ha vundu hi likalaga lirungi lienyekanaa live. 17Ndavoora mumwoyo gwange, “Nyasaye alakakaragiri avandu valungi na vachamu likalaga lilala, kigira vuli kindu kandi vuli kekolwa kilakekoleke ing'inga yakialagilwamu.” 18Mulimalirika ndaalora ndi, Nyasaye akogelizaa kukumanya ndi, sikoveeye avalahi kuvita zinyama mba. 19Inyima wa yaga goosi, mugavo gwa vandu harara ni zinyama ni mulala. Likuza lilava lilala liere ku viombi. Mundu siaveeye mulahi kuvita inyama mba, kigira livamwoyo siliveeye nikivuni ku viombi mba. 20Viombi vizizaa havundu harara, viatula ku luguchi kandi viombi vilakilane mu luguchi. 21Mundu anyala kusuvira ndi mwoyo gwu mundu guzizaa mwigulu lwu mwoyo gwi inyama guzizaa hasi mu malova? 22Kunangwa ndaalora ndi kindu kilahi cha kunyala kokora ni kusangalira miyinzi ja kumali kokora. Sikoveeyeho ni kindu kindi cha kunyala kokora mba. Sihaveeyeho ninzira ya kunyala kumanyiriza ku kindu kiliekoleka ni kwakakuza mba.
©Bible Society of Kenya, 2019