KOHELEZU 1
1
Limenya Liveeye Vuzwa
1Yaga na makuva gu mwilwazi muyaayi wa Daudi, waali mwami wa Jerusalemi.
2Mwilwazi yavoola ndi, voveeye vuzwa, vuzwa! Livamwoyo liveeye vuzwa, vindu viosi viveeye vuzwa. 3Mundu anyoora kindiki ku miyinzi midinyu josi jakola mu kivala? 4Makura na makura gaaza ni gaazia, navuzwa lirova limenya mihiga ni mihiga. 5Liuva litongaa kandi liyera, kandi lididikana kwirana halituli. 6Imbuza ihuuzaa nizia Isavaalu, kandi ihuuzaa nizia Ivaale; kandi ihuuzaa nevodong'ana niyirana hitangiyi. 7Migera josi jizizaa munyanza, navuzwa inyanza si yizula mba. Amazi giranaa wi migera gitangiraa, kandi gatanga kwirana munyanza. 8Vindu viosi viluhi, liluha linene ligali liu mundu anyala kuvula kovora. Zimoni si ziluhaa kolola mba, kinga matui si gizuraa lihulira mba. 9Kindu keveeyeho kalunu, nicho kilivaho, kandi kindu kimali kokolwa kilakakolwi kandi. Si keveeyeho ni kindu kegeni mu kivala choosi mba. 10Avandu vavoola, “Henza, yiki ni kindu kegeni?” Chaliho kutura kale, kandi chaliho kunyi nikukiri kuvaho. 11Siaveeyeho nu mundu wizulizaa vindu viekoleka mu ing'inga ya kale mba, anoho siaveeyeho nu mundu wizulizaa vindu viaza viekoleke mu madiku gaaza ku yavo avaazaa vivulwi mba.
Vogeri Vovee ni Kivuni mba
12Inzi mwilwazi, ndayamiiha kuli mwami wa Isiraeli mu Jerusalemi. 13Ndaatovora ndi ndahenzeriza kandi ndenyeleriza no vogeri vwange vindu viosi viekoleka mu kivala yiki. Yigu nu muyinzi mudinyu gwa Nyasaye amali kuviika ku vandu. 14Mali kolola vuli kindu choosi chekoleka mu kivala yiki, na ngovolera ndi, viosi viveeye vuzwa. Gaveeye vuzwa kuli kudidikana nokolonda imbuza. 15Siunyala kulungikiza kindu chavedeka, kandi siunyala kuvaliza vindu vitaveeyeho mba.
16Ndeevolera, “Inzi mali kuva mundu munene ligali, mugeri ligali kuvita mundu wundi woosi wamihaa Jerusalemi imbiri wange. Inzi manyi vulahi ligali cho vogeri ni limanyiriza viveeye.” 17Ndaatovora kwiga liavukana hagati hi limanya nu vusiru, vogeri kandi uvularu. Navuzwa ndanyoora ndi gaveeye vuzwa kuli kudidikana nokolonda imbuza. 18Kuva novogeri vunyingi, nilwo lwa voletaa lihenda mwoyo linyingi; kuva nilimanya linyingi, kandi nilwo lwa liletaa vovereri vunyingi.
©Bible Society of Kenya, 2019