LIZULIZA 31

Joshua avugulaa vwiyangu vwa Musa

(Liv. 27:12-23)

1Kunangwa Musa yaazizagilira komoloma ku avandu va Isiraeli, 2navavoolera, “Inzi mbeeye ni mihiga mia moja na sirini kandi simbeeye unyaliza kuva mwimiliri winyu mba. Kandi komeeda ku yaga Yahova amali kombolera ndi sindambuka mugera gwa Jorodani mba. 3Yahova Nyasaye winyu mwene alimiira imbiri winyu. Aladiviza zihiiri zimenyaa yo kunangwa muduuki kuvugura kivala chavo. Joshua alava mwimiliri winyu kuli Yahova yavoola. 4Yahova aladiviza avandu yavo kuli yaguuta Mwami Sihoni na Ogu; avami va Vaamori, kandi naadiviza kivala chavo. 5Yahova alavahaana ku munyi kandi kuduuka muvakole goosi aga amali kumulaga. 6Muve avagulu kandi avaluviriri. Mutatia kandi mutadegerizwa navo mba, kigira Yahova Nyasaye winyu alazia harara nimunyi. Sialamuleka anoho kumusuura mba.”

7Kunangwa Musa yalanga Joshua namuvolera imbiri wa avandu va Isiraeli vosi, “Ove mugulu kandi muluviliri, kigira ivi niyie wimilira avandu yava kwingira mu kivala cha yasuuviriza avaguuga vaavo. 8Yahova mwene alakwimilira kandi ave harara niivi. Sialamuleka anoho kumusura mba, kunangwa utakuza mwoyo anoho kutia mba.”

Lilaga kosomwa vuli muhiga gwa saba

9Kunangwa Musa yang'oda Lilaga lia Nyasaye yili kandi nalihaana ku avasaalisi avuluvamba lwa Levi avalindaa Lisandugu lie Lilagana lia Yahova kandi ku aviimiliri va Isiraeli vosi. 10Musa yavalaga navoora, “Mu limalirika lia vuli muhiga gwa saba, lwi mihiga ga magovi gatulizwaho kuduuka, osoma Lilaga yili vudinyu ing'inga yi Lisavo lia madiri. 11Ulisome ku avandu vosi va Isiraeli lwa vava nivaaza kusigamira Yahova Nyasaye woovo havundu harara heng'ine vuzwa ahukusigamira. 12Vungiza harara avandu vosi, avasaza, avakali, avana navageni vamenyaa mu madaala ginyu goosi, kunangwa vuli mundu aduuki kuhulira makuva yaga nukwiiga kuhaana luyali ku Yahova Nyasaye winyu kandi kulinda nokokola amigizu goosi gililaga yili. 13Munzira yiyi, visukululwi vienyu, avakikiri kuhulira ku Lilaga lia Yahova Nyasaye winyu kali hakuzu, valalihulira. Kandi ndio, valiiga kutia Yahova Nyasaye winyu madiku goosi aga mulimenya mu kivala cha muveeye ahimbi kukivugula, engeleka wumugera gwa Jorodani.”

Amigizu gu kumaliriza ga Yahova yaaha Musa

14Maku Yahova yavolera Musa, “Lidiku lie likuza liilio liesundi ahimbi. Laanga Joshua na umuleete mu Lihema liu kuvuganira mu, kunangwa nduuki kuhaana kuye amigizu geege.” Kunangwa Musa harara na Joshua viingira mu lihema liu kuvuganira mu na Yahova. 15Yahova yaloleka kuvo umwene yimwo mu munara gwi lilesi, ugwasingira ha kiliango chi Lihema.

16Yahova yavolera Musa, “Ivi uzizaa kukuza vwangu, na inyima wi likuza liilio avandu yava sivalava avasuuvirifu ku inzi kandi mba, valavunanyia lilagana liange lia ndalomba harara navo. Valandeka nu kusigamira avanyasaye vandi vi kivala cha vaveeye ahimbi kwingira mu. 17Lwa yago galiekoleka, ndakave nu vutima vonene ligali. Ndakavaleke kandi valakadivizwi. Amaduywa gukutihiza, manyingi ni kivi galakavagwiri, ma kandi valakamanyirizi ndi vindu yivi viekoleka kuvo kigira inzi, Nyasaye wavo simbeeye navo kandi mba. 18Kandi ndakasuuli kuvakonya, kigira vamali kokora uvudamanu, kandi kusigamira avanyasaye vandi.

19“Kalunu, ng'oda hasi ulwimbu yilu. Ulwigizi ku avandu va Isiraeli, kunangwa love kuli kelolero change kuvo. 20Ndavahila mu kivala kitugi kandi kenoru yiki, kuli ndasuuviriza avaguuga vaavo. Uwene yeyo valava ni chukulia choosi cha venya, na valamenya mu lielemeriza. Navuzwa valayeeka halovega kandi vasigamiri avanyasaye vandi. Valasura nukuvunanyia lilagana liange, 21kandi maduywa gukutihiza manyingi ni kivi vilavagwira. Navuzwa ulwimbu yilu lulimbwa kandi lulava kelolero change kuvo. Kali kalunu, ningikiri kuvahila mu kivala cha ndavasuuviriza ndavaha, manyi icha vaganagana.”

22Kunangwa Musa yang'oda ulwimbu zana ku lidiku zana yilio, kandi niyigiza avandu va Isiraeli.

23Maku Yahova yamoloma ku Joshua, mwana wa Nuni namuvolera, “Ove umugulu kandi muluviliri. Ulimilira avandu va Isiraeli kuduuka mu kivala cha ndavasuuviriza, na Inzi ndava harara niivi.”

24Musa yang'oda makuva gi Lilaga lia Nyasaye mu kitabu vugira koleka kindu choosi. 25Lwa yamala, yavolera avasaalisi va Levi, vahevwe uvulindi vwi Lisandugu lie Lilagana lia Yahova.

26“Vuguli kitabu chi Lilaga yiki mukiviiki halovega hi Lisandugu lie Lilagana lia Yahova Nyasaye winyu, kunangwa kiduuki kuva kuli kilolekizi ku avandu veve. 27Manya kirage chavo nuvwibaali vwavo. Henza, niiva vibaara ku Yahova ing'inga ya ngikiri mwoyo harara navo, navalandi inyima wi likuva liange! 28Vuganyia harara imbiri wange avakulundu vosi vizihiiri zienyu ziosi, navimiliri vinyu vosi, kunangwa nduuki kuvavoolera vindu yivi. Ndalanga ligulu nilirova vive ivilolekizu vinge kuvo. 29Manyi ligali ndi inyima wilikuza liange, avandu valagwa avadamanu kandi vasuuli icha ndaavigiza. Mu ing'inga yizaa, maduywa gukutihiza galavagwira, kigira valava ni vakora Yahova kuva nu vutima mulikola ga yavagaya vavuli kokora.”

30Maku Musa yimba ulwimbu yilu lwosi, avandu vosi va Isiraeli nivahulirizaa.

Currently Selected:

LIZULIZA 31: LOGOOLI

Highlight

Copy

Compare