VAKOLOSAI 1

1Inzi Paolo, mutumwa wa Kristo Yeso kigira uvulariri vwa Nyasaye; harara na Timateo amiitu wiitu 2kong'oderaa munyi Vakrisitayo vosi harara na avaamitu avasuuvirifu mu Kristo avaveeye ha Kolosai: Zimbavasi ni mirembe zive ku munyi kutura ku Nyasaye Baba wiitu.

Lisaala liu Kusandiza

3Kusandizaa Nyasaye, Baba wu Mwami wiitu Yeso Kristo lwa kumusaalira kazozo, 4Kigira kumali kuhulira lisuuvira lienyu mu Kristo Yeso, nu vuyanzi vwinyu vwa muveeye navwo ku avandu va Nyasaye vosi, 5Kigira lisuuvirizwa lia mwaviikirwa mwigulu. Lisuuvirizwa yili mumali kuhulira mu likuva liagiligali lie Ivangeri. 6Ivangeri yiyi imali kuduuka ku munyi kuli wa veeye mu lirova liosi nokoleta vugasu no komeedeka, kuli eveeye ku munyi kandi, kutura lidiku lia mwa hulira nu kumanyiriza zimbavasi zia Nyasaye mu agiligali. 7Mwiga zimbavasi zia Nyasaye kutura ku Epafura mutumwa wiitu, oveeye muyinziri musuuvirifu wa Kristo mu vwiyangu vwitu. 8Niyie wakovolera uvuyanzi vwa muveeye navwo vwa Roho.

9Kigira yaga, kutura nikuhulira, amakuva ginyu kwamenya ni kumusaalira kazozo. Koteva Nyasaye aduuki kumukola Mwizuli limanya liu vulaliri vwivwe, no vogeri vwosi kandi ni limanyiriza liosi lia Roho weve ahaanaa. 10Maku mulamenya mu liiva liu Mwami yenya kandi mulakola ikiyaanzizaa umwami kazozo. Mu limenya lienyu liosi mulakola zing'ano ziosi zie vikolwa vilahi, kandi mulaviruka mu limanya Nyasaye. 11Mudinyirizwi ni zinguru ziosi kolondekana novukumi vwi zinguru zizie kuduuka ku vwikuziri vwosi novohocha vwosi harara nu vusangali; 12musandiza Baba, umali kumuvugilira kusanga mu miandu juvugasu vwa Nyasaye yavikira Vakrisitayo veve mu vwami vwu vulavu. 13Nyasaye yakohonyia kutura mu Zinguru zie kisundi, nakoleeta mu mirembe mu Vwami vwu Mwana weve umuyanze; 14muye koveeye novovoholore kutura mu vuhambe vwu uvwoni kandi, kusamiifwa uvwoni vwitu.

Kristo ni Miyinzi Jije

15Kristo aveeye ligondo lia Nyasaye utalolekaa; utanga kwivulwa, na kandi aveeye umunene ku vilombe viosi; 16muye Nyasaye yalomba vindu viosi, viu mwigulu kandi via hasi ivilolekaa ni vitalolekaa, harara ne, zinguru zio vwami vwa roho, avanene, avamihi nu vunyali. Nyasaye yalomba ligulu liosi kuvitira muye kandi kigira ye. 17Kristo yaali ho imbiri wi vindu viosi, kandi mu lihambanywa harara naye, ivindu viosi viveeye mu vwiyangu vwavio vulahi. 18Aveeye mutwi gwu muviri gwigwe, likanisa; aveeye uvutangiliru vwi livamwoyo liu muviri zana. Aveeye Muyaayi watanga kwivulwa, uwasimugukizwa kutura mu likuza, kunangwa oyo yenyine aduuki kuva wu mu vindu viosi. 19Gaali ku litovola lia Nyasaye ndi, mwana weve mwene ave ni liiva liu vuduukiru vwosi lia Nyasaye. 20Kuvitira mu Mwana, Nyasaye yatovola koleta vilombe viosi viirane kuye umwene. Nyasaye yalomba mirembe kuvitira mu likuza lie sadaka yu Mwana weve ku musalaba; kandi ndio yaleeta vindu viosi ku lirova anoho mwigulu viirane kuye mwene.

21Na munyi, ku maziambiri mwaali ihale kutura ku Nyasaye kandi mwaali avasigu veve mu zing'anagani kandi, mu vikolwa vienyu vidamanu, 22Navuzwa kalunu umali kumuhambanyia kuvitira mu likuza liu Mwana mu muviri gwinyama ya Kristo, kigira likuza lio Mwana weve aduuki kumuleeta imbiri weve avatakatifu, avataveeye nelihiolo kandi avatali nimbara kuye. 23Gamudukira mumenye mu lisuuvira yilio nu kuvikwa ku musingi, muduuki kusingirizwa vudinyu. Mutavugilira kodengeyizwa no koleka lisuuvirizwa lie Ivangeri yeyo ya mwahulira mba. Inzi Paolo, mbeeye mutumwa wi Ivangeri yeyo imali kwilwazirwa avandu vosi vu mukivala.

Miyinzi ja Paolo kuli mutumikiri ku Likanisa

24Kalunu sangala mu vusaliri vwange kigira munyi, kuvitira mu vusaliri vwange vwu muviri, ngonyanilaa cha ligala mu vusaliri vwa Kristo kigira muviri gwigwe, ogoveeye likanisa. 25Kandi mali kokolwa mutumikiri wi likanisa na Nyasaye uwahaana ku inzi muyinzi gwu vulindi yigu ngole kigira uvukala vwinyu. Goveeye muyinzi gwu kwilwaza likuva lia Nyasaye. 26Imbisu yi likuva lia Nyasaye yaaviswa kutura kale ligali ku makura na amakura, navuzwa kalunu imali kuvurwa ku avandu va Nyasaye. 27Nyasaye yalohiza kuvulira vandu veve imbisu yeeye imbisu yu vutugi harara nu vukumi vwaveeye navwo ku vandu vosi imbisu eveeye ndi Kristo aveeye mu munyi, gaveeye kovora ndi mulakasange mu vukumi vwa Nyasaye. 28Kunangwa kwilwazaa Kristo ku vandu vosi kutumikira vogeri vwosi kuviganihiza kandi kuvigiza, kuduuki koleta vuli mundu imbiri wa Nyasaye, kuli mundu muduukiru mu Kristo. 29Kolola ndi yaga gekoleki, nyang'anaa nokokola miyinzi vudinyu ligali nindumikiraa zinguru zinene zia Kristo ahaanaa, kandi zikolaa miyinzi mu inzi.

Currently Selected:

VAKOLOSAI 1: LOGOOLI

Highlight

Copy

Compare